আঘোণ মানেই ন-খোৱা উৎসৱ। পূৰ্বৰ পৰাই অসমৰ গ্ৰাম্যাঞ্চলত প্ৰচলিত হৈ আহিছে ন-ধানৰ চাউলেৰে সকলোৱে মিলি এসাজ খোৱাৰ পৰম্পৰা। এই ন-খোৱা উৎসৱ চুতীয়া জনগোষ্ঠীৰ অন্যতম পৰম্পৰা।(Na Khua)
অতীজৰে পৰা আঘোণৰ বতৰত হাঁহে-মাহে নতুন ধানৰ চাউলেৰে সকলোৱে একেলগে এসাঁজ খোৱাৰ পৰম্পৰা ধৰি ৰাখিছে জনগোষ্ঠীটোৰ জনতাই। অৱশ্যে আধুনিকতাৰ ধামখুমীয়াত ক্ৰমাৎ এই ন-খোৱা পৰ্ব কিছু পৰিমাণে হ্ৰাস পাবলৈ ধৰিছে যদিও চুতীয়া জনগোষ্ঠীৰ বহু গাঁৱত আজিও পৌৰাণিক ৰীতি-নীতিয়ে এই পৰ্ব পালন কৰি অহা হৈছে।
সাতামপুৰুষীয়া পৰম্পৰা অটুট ৰাখি তথা নৱ প্ৰজন্মৰ ইয়াৰ লগত চিনাকি কৰাই দিয়াৰ মানসেৰে ৰাজধানী গুৱাহাটীৰ মহানগৰীতো এইবাৰ চুতীয়া জনগোষ্ঠীৰ ৰাইজে ন-খোৱা উৎসৱ আয়োজন কৰিছে।
চুতীয়া সাংস্কৃতিক বিকাশ কেন্দ্ৰৰ উদ্যোগত কাইলৈ অৰ্থাৎ ১৫ ডিচেম্বৰত বৰবাৰীৰ মেগাজিনস্থিত বীৰাংগনা সাধনী ভৱনত ন-খোৱা উৎসৱৰ আয়োজন কৰা হৈছে।
দিনৰ ১২ বজাৰ পৰা আৰম্ভ হ’বলগীয়া এই উৎসৱলৈ মহানগৰীত বসবাস কৰা জনগোষ্ঠীটোৰ ৰাইজসকলক সাদৰে নিমন্ত্ৰণ জনাইছে উদ্যোক্তাই। এই সন্দৰ্ভত উদ্যোক্তা মনোজ কুমাৰ দাসৰ 6001641534 লগত যোগাযোগ কৰিব পাৰিব।