অনলাইন বাৰ্তা, 3মে’ঃ উচ্চ তাপত ক’ৰ’ণা ভাইৰাছ মাৰিবলৈ এটা অত্যাধুনিক যন্ত্ৰ নিৰ্মাণ কৰিছে ভাৰতে৷ এই যন্ত্ৰটোৰ নাম ‘অতুল্য’৷ এই যন্ত্ৰটোৰে ক্ৰমাগতভাৱে তাপ এৰি ক’ৰ’ণা ভাইৰাছৰ আৰএনএ মাৰি পেলাব৷ ভাৰতৰ প্ৰতিৰক্ষা মন্ত্ৰালয়ে আবিষ্কাৰ কৰা এই নতুন যন্ত্ৰৰে ক’ৰ’ণাৰ সংক্ৰমণ কমোৱাৰ আশা সঞ্চাৰ হৈছে৷ উল্লেখ্য যে ‘অতুল্য’ৰ ওজন তিনি কিলোগ্ৰাম৷ ই মূলত ‘মাইক্ৰৱেভ ষ্টেৰিলাইজাৰ’৷ কোনো বস্তুৰ গাত ক’ৰ’ণা ভাইৰাছ লাগি থাকিলে অতুল্যই ধ্বংস কৰিব৷ ভাৰতৰ প্ৰতিৰক্ষা মন্ত্ৰালয়ৰ বিজ্ঞানীয়ে ইতিমধ্যে এই যন্ত্ৰৰ কাৰ্যকাৰিতাৰ প্ৰমাণ পাইছে৷ সাধাৰণ মানুহে যাতে কম খৰচত এই যন্ত্ৰ ব্যৱহাৰৰ সুবিধা পাই সেই দিশত দৃষ্টি দিছে ডিআৰডিয়ে৷ ‘অতুল্য’ আবিষ্কাৰৰ সম্পূৰ্ণ কৃতিত্ব ভাৰতৰ ডিফেন্স ইনষ্টিটিউট অব এডভান্স টেকন’লজীৰ বিজ্ঞানীৰ৷ উল্লেখ্য যে কোনো পাতল বস্তুত লাগি থকা ক’ৰ’ণা ভাইৰাছ ‘অতুল্য’ই ধ্বংস কৰিব পাৰে৷ এই যন্ত্ৰৰ পৰা নিৰ্গত অতিবেঙুনীয়া ৰশ্মিয়ে ভাইৰাছটোক ধ্বংস কৰে৷ যন্ত্ৰটো আৰম্ভ কৰিলে এক মিনিট ধৰি ৫৬ৰ পৰা ৬০ ডিগ্ৰী চেলচিয়াচৰ তাপ প্ৰবাহ ক্ৰমাগতভাৱে নিৰ্গত হয়৷ ক্ৰমাগত তাক সহ্য কৰিব নোৱাৰে ক’ৰ’ণা ভাইৰাছে৷
