মাজুলীৰ ৰাস মহোৎসৱৰ আজি দ্বিতীয়টো দিন।এই দ্বিতীয় দিনা মাজুলীৰ ৰাস মহোৎসৱ দৰ্শন কৰিবলৈ অসমৰ বিভিন্ন প্ৰান্তৰ ৰাইজে ভিৰ কৰা পৰিলক্ষিত হৈছে।মাজুলী এতিয়া গকুল বিন্দাবনলৈ পৰ্যবেক্ষিত হৈছে।মাজুলীত ৰাস উপভোগ কৰিবলৈ যোৱা পৰ্যটন আৰু সাংস্কৃতিৰ মন্ত্ৰী তথা মাজুলীৰ অভিভাৱক মন্ত্ৰী বিমল বৰাই মাজুলীত যোৱা কালি কেবাটাও অনুষ্ঠানত অংশ গ্ৰহণ কৰাৰ পাছত মাজুলীৰ উত্তৰ কমলাবাৰী সত্ৰকে আদি কৰি কেবাখনো সত্ৰত সেৱা লৈ মাজুলী ৰাস উপভোগ কৰে।
আজি মাজুলীৰ কমলাবাৰীত পৰ্যটন বিভাগৰ দ্বাৰা নিৰ্মীয়মান অৱস্থাত থকা লগ কেবিনযুক্ত ৰিজৰ্টৰ নিৰ্মাণকাৰ্যৰ অগ্ৰগতিৰ বুজ লয়। নিৰ্মাণস্থলীত উপস্থিত বিষয়াবৰ্গ আৰু অন্যান্য কৰ্তৃপক্ষক অতি শীঘ্ৰেই নিৰ্মাণকাৰ্য সম্পূৰ্ণ কৰাৰ লক্ষ্যৰে যুদ্ধকালীন তৎপৰতাৰে বাকী থকা কামবোৰ সম্পন্ন কৰিবলৈ নিৰ্দেশ দিয়ে মন্ত্ৰী বিমল বৰাই। লগতে মন্ত্ৰী গৰাকীয়ে উপায়ুক্তৰ কাৰ্যালয়ৰ সভা কক্ষত মাজুলীত বিভিন্ন সাংস্কৃতিক সংগঠন, ট্যুৰ অপাৰেটৰ আৰু হোটেল মালিক সন্থাৰ প্ৰতিনিধিসকলৰ সৈতে পৰ্যটন তথা সাংস্কৃতিক পৰিক্ৰমা বিভাগৰ বিষয়াসকলৰ উপস্থিতিত অনুষ্ঠিত এখন বিশেষ বৈঠকত অধ্যক্ষতা কৰে।
মন্ত্ৰী গৰাকীয়ে বিভিন্ন আঁচনি ৰূপায়ণৰ পৰ্যালোচনা কৰাৰ লগতে মাজুলীত পৰ্যটনৰ নতুন সম্ভাৱনীয়তা পূৰণ কৰিবলৈ উপস্থিত সকলোৰে সৈতে আলোচনা কৰি তেওঁলোকৰ দিহা-পৰামৰ্শ কামনা কৰে।মন্ত্ৰী গৰাকীয়ে মাজুলীৰ উন্নয়ন সম্পৰ্কীয় কাম-কাজসমূহ ৰাষ্ট্ৰসংঘৰ ঐতিহ্যক্ষেত্ৰৰ নিৰ্দেশনা অনুসৰি সম্পন্ন কৰাটো প্ৰয়োজনীয়। এইক্ষেত্ৰত জিলা প্ৰশাসনক মাজুলীৰ বিভিন্ন সাংস্কৃতিক সংগঠনৰ সৈতে ঐক্যবদ্ধভাৱে কাম কৰিবলৈ আহ্বান জনাই এক সুনিৰ্দিষ্ট ৰ’ড মেপ প্ৰস্তুত কৰিবলৈও নিৰ্দেশ দিয়ে।মাজুলীৰ বিভিন্ন স্থানত তথ্য কেন্দ্ৰ স্থাপনৰ লগতে ফেৰী আৰু আন সকলো যান-বাহনত গাইড মেপ তথা নদীদ্বীপ জিলাখনৰ বিভিন্ন সত্ৰ আৰু অন্যান্য আকৰ্ষণীয় পৰ্যটনস্থলী সম্পৰ্কে সঠিক তথ্যসূচী সংলগ্ন কৰাৰ বিষয়েও বৈঠকত আলোচনা কৰে।ইয়াৰ উপৰিও পৰ্যটক আৰু দৰ্শনাৰ্থীসকলৰ সুবিধাৰ্থে প্ৰয়োজনীয় সঠিক তথ্যৰ প্ৰচাৰ-প্ৰসাৰৰ বাবে মাজুলীৰ ঐতিহ্যমণ্ডিত স্থানসমূহৰ ওপৰত পৰ্যাপ্ত জ্ঞান থকা লোকসকলকহে ‘পৰ্যটক গাইড’ হিচাপে নিযুক্তি দিবলৈ বিষয়াসকলক নিৰ্দেশ দিয়ে মন্ত্ৰী গৰাকীয়ে।বৈঠকত অতিৰিক্ত মুখ্য সচিব (পৰ্যটন বিভাগ) পৱন কুমাৰ বৰঠাকুৰ , মাজুলীৰ জিলা উপায়ুক্ত পুলক মহন্ত আৰু অন্যান্য বিষয়াসকল উপস্থিত থাকে।