সুখবৰ, প্ৰত্যাহাৰ কৰা হ’ব পেট্ৰ’ল-সুৰাৰ ওপৰত আৰোপ কৰা অতিৰিক্ত কৰ

২০২১ বৰ্ষৰ প্ৰথম দিনটোতে মন্ত্ৰী হিমন্ত বিশ্ব শৰ্মাই ৰাজ্যবাসীৰ বাবে আগবঢ়ালে সুখবৰ। ফ্ৰেব্ৰুৱাৰী মাহৰ পৰা প্ৰত্যাহাৰ কৰা হ’ব পেট্ৰ’ল- সুৰাৰ ওপৰত আৰোপ কৰা অতিৰিক্ত কৰ। কেৱল ইমানেই নহয়, কোৰোণা ভাইৰাছৰ মহা সক্ৰমণৰ সময়ত অৰ্থনৈতিক দিশত ৰাজ্যখন সুস্থিৰ কৰি ৰাখিবলৈ ৰাজ্য চৰকাৰে যিকেইটা দিশত অতিৰিক্ত কৰ আৰোপ কৰিছিল,সেই আটাইবোৰ অহা ফেব্ৰুৱাৰী মাহৰ পৰা কৰ্তন কৰা হ’ব বুলি জনাইছে মন্ত্ৰী হিমন্ত বিশ্ব শৰ্মাই ।

উল্লেখযোগ্য যে, ল’ক ডাউনৰ পিছতে পেট্ৰ’ল-ডিজেলৰ ওপৰত ৰাজ্য চৰকাৰে অতিৰিক্ত ৫ টকাৰ কৰ আৰোপ কৰিছিল। সেইদৰে কৰ আৰোপ কৰিছিল সুৰাৰ ওপৰত। বিশেষকৈ পেট্ৰ’ল-ডিজেলৰ ওপৰত কৰ আৰোপ কৰাৰ ফলত সাধাৰণ নাগৰিকৰ ওপৰত পৰিছিল ইয়াৰ প্ৰভাৱ ।

কোৰোণা পৰিস্থিতি সুস্থিৰ হোৱাৰ পিছত সকলোৱে দাবী জনাইছিল যে, কোৰোণাৰ সময়ত আৰোপ কৰা অতিৰিক্ত কৰ কৰ্তন কৰিব লাগে ৰাজ্য চৰকাৰে। আৰু পহিলা জানুৱাৰীৰ দিনাই এই সুখবৰ দিলে মন্ত্ৰী হিমন্ত বিশ্ব শৰ্মাই ।