ৰাষ্ট্ৰীয় শিক্ষাৰ্থী বাহিনীৰ গুৱাহাটীস্থিত ৬০ আসাম গাৰ্লছ এন চি চি বেটেলিয়ানৰ সামূহিক বাৰ্ষিক প্ৰশিক্ষণ শিবিৰ ২৪ এপ্ৰিলৰ পৰা ২ মেলৈ দহদিনীয়াকৈ নাৰেংগী সেনা কেন্টনমেন্ট চৌহদত অনুষ্ঠিত হয়। দহদিনীয়া সামূহিক বাৰ্ষিক প্ৰশিক্ষণ শিবিৰত (চি এ টি চি) বেটেলিয়ানৰ অধীনৰ বিভিন্ন শিক্ষা প্ৰতিষ্ঠানৰ ৪৮২জনী জুনিয়ৰ আৰু ছিনিয়ৰ কেডেট, ৬ জন সহযোগী এন চি চি বিষয়াই ভাগ লয় ।
আনহাতে শিবিৰৰ কেম্প কমাডেণ্টৰ দায়িত্বত আছিল ৬০ আসাম গাৰ্লছ বেটেলিয়ান এন চি চিৰ কমাণ্ডিং অফিচাৰ , কৰ্ণেল অজয় কুমাৰ শৰ্মা। দহদিনীয়া শিবিৰত কেডেট সকলক .২২ বৰৰ ৰাইফল চালনাৰ প্ৰশিক্ষণ দিয়াৰ উপৰিও শাৰীৰিক অনুশীলন, পেৰেড, ড্ৰিল, মেপ ৰিডিং, যুদ্ধত শত্ৰুক পৰাজিত কৰাৰ কৌশল, ব্যক্তিত্ব বিকাশ, মানসিক ভাবে সৱল হৈ থকাৰ উপায় , সেনাকে ধৰি সশস্ৰ বাহিনীত ভৰ্ত্তি বা নিযুক্তি লাভৰ উপায় আদিৰ প্ৰশিক্ষণ দিয়া হৈছিল। তেনেদৰে এন ডি আৰ এফ , নেডফি, এছ বি আই আদিৰ সহযোগত ভাগে ভাগে বিভিন্ন প্ৰশিক্ষণ দিয়া হৈছিল ।
পহিলা মে’ৰ দিনা সন্ধিয়া শিবিৰৰ সামৰণি অনুষ্ঠানৰ লগত সংগতি ৰাখি অনুষ্ঠিত হোৱা এক অনুষ্ঠানত কেডেট সকলে নৃত্য, গীতকে ধৰি বাৰে ৰহনীয়া সাংস্কৃতিক কাৰ্যসূচী প্ৰদৰ্শন কৰে। অনুষ্ঠানত কেম্প কমাডেণ্ট , কৰ্ণেল অজয় কুমাৰ শৰ্মাই শিবিৰত ভাগ লোৱা সকলো কেডেটৰ উজ্বল ভবিষ্যত কামনা কৰি এনে ধৰণৰ শিবিৰত ভাগ ললে এন চি চিৰ তিনিটা চাৰ্টিফিকেট পৰীক্ষা ক্ৰমে – এ, বি আৰু চিত অবতীৰ্ণ হোৱাৰ যোগ্যতা অৰ্জন কৰা সন্দৰ্ভত আলোকপাত কৰে।