পঞ্চম বাৰৰ বাবে মাক হ’বলৈ ওলাইছে পাকিস্তানৰ পৰা আহি ভাৰতত উপস্থিত হোৱা সীমা হায়দৰে

পূৰ্বে তেওঁ চাৰিটি সন্তানৰ মাতৃ। ভাৰতীয় যুৱকৰে হোৱা প্ৰেমৰ বাবেই নিজৰ দেশ এৰি চাৰি সন্তানৰ সৈতে ভাৰতত উপস্থিত হোৱা পাকিস্তানী মহিলা সীমা হায়দৰে ভাৰতলৈ অহাৰ ছমাহ পিছত ভাল খবৰটো দিছে। সীমা পঞ্চম বাৰৰ বাবে মাক হ’বলৈ ওলাইছে। এয়া হ’ব সীমাৰ ভাৰতত জন্ম দিবলগীয়া প্ৰথম সন্তান। সীমা হায়দৰে যোৱা বছৰৰ জুন মাহত পাকিস্তানৰ পৰা সীমান্ত অতিক্ৰম কৰি ভাৰতলৈ আহিছিল। ভাৰতীয় যুৱক শচীন মীনাৰ প্ৰেমত পৰিছিল সীমা। শচীনৰ সৈতে সংসাৰ কৰিবলৈয়েই সীমাই সীমান্ত পাৰ হৈছিল। উল্লেখ্য সীমাৰ প্ৰথম স্বামীৰ ফালৰ পৰা চাৰিটা সন্তান আছে। পাবজি খেলি খেলিয়েই ভাৰতীয় যুৱক শচীনৰ প্ৰেমত পৰিছিল সীমা। বৰ্তমান সীমাৰ ডাঙৰজনী ছোৱালীৰ বয়স ৮ বছৰ। অবৈধভাৱে ভাৰতত প্ৰৱেশ কৰাৰ বাবে সীমাক ৪ জুলাইত গ্ৰেপ্তাৰ কৰা হৈছিল। তেওঁ পিছত জামিন পাইছিল আৰু শচীনৰ সৈতে সংসাৰ আৰম্ভ কৰিছিল। সীমাই তেওঁৰ চাৰিটা সন্তানৰ সৈতে ষচীনৰ সৈতে নতুন পৰিয়াল আৰম্ভ কৰিছিল। অৱশ্যে সীমাৰ বিৰুদ্ধে তদন্ত এতিয়াও চলি আছে।

অনুসন্ধানৰ সময়ত আৰক্ষীয়ে সীমাৰ পাছপোৰ্ট, পাকিস্তানী আইডি কাৰ্ড আৰু তেওঁৰ সন্তানৰ পাছপোৰ্টকে ধৰি কেইবাটাও নথি পত্ৰ জব্দ কৰিছিল। এ টি এছে সীমাৰ সকলো তথ্য পৰীক্ষা কৰিবলৈ পাকিস্তানী দূতাবাসলৈ প্ৰেৰণ কৰিছে। এতিয়া সীমাই কৈছে যে ২০২৪ বৰ্ষটোৱে তেওঁলোকৰ পাৰিবাৰিক জীৱনত যথেষ্ট আনন্দ কঢ়িয়াই আনিব। কাৰণ তেওঁ মাক হ’বলৈ গৈ আছে। শচীনৰ সৈতে বিবাহৰ পিছত এয়া তেওঁৰ প্ৰথম সন্তান হ’ব।