অনলাইন বাৰ্তা, ৫ ডিচেম্বৰঃ এটা কুকুৰে এগৰাকী মহিলাৰ প্ৰান বচাই নিজে হত্যাৰ বলি হবলগীয়া ঘটনাই সমগ্ৰ অঞ্চলতে তীব্ৰ চাঞ্চল্যৰ সৃষ্টি কৰিছে। মৰিগাওঁ জিলাৰ মিকিৰভেটা আৰক্ষী থানাৰ বৰিবজাৰ আৰক্ষী চকীৰ অৰ্ন্তগত জাজৰি চাহ খোৱা পূখৰী চাৰি আলিৰ কামাল উদ্দিনৰ ঘৰৰ কাষত থকা ফইজুল হকৰ ঘৰত ৩ ডিচম্বৰৰ নিশা ১১ বজাত মদ, ভাং খাই বেয়া গালি-গালাচ পাৰি হুলস্থুল কৰাত ফইজুল হকৰ ঘৈনীয়েকে মুছফিকা বেগমে ঘৰৰ ভিতৰৰ পৰাই বাধা দিয়ে। পাছত ফইজুল হকে মৰিয়ম নেচা আৰু আৰিফা বেগমক লগত লৈ মুচফিকা বেগমৰ স্বামী ঘৰত নথকাৰ সুযোগত বলপূৰ্বক ভাবে প্ৰবেশ কৰি মুচফিকাৰ ডিঙিত গামোচা লগাই চুচুৰাই ফইজুলৰ ঘৰত লৈ যায়। অকলশৰীয়া মহিলা গৰাকীক দলবদ্ধভাবে মাৰপিট কৰাৰ লগতে প্ৰানে হত্যা কৰাৰ চেষ্টা কৰে। মহিলা গৰাকীৰ ঘৰত থকা পোহনীয়া কুকুৰ আৰু অকনমানি ৩ বছৰীয়া শিশুৰ চিঞৰ বাখৰ শুনি ওচৰ চুবৰীয়া আহি মিহিলা গৰাকীৰ প্ৰান ৰক্ষা কৰে । পিছদিনা ৪ ডিচেম্বৰত অকলশৰীয়া মুচফিকাই বৰিবজাৰ আৰক্ষী চকীত ফইজুল হক,মৰিয়ম নেচা আৰু আৰিফা বেগমৰ বিৰুদ্ধে এজাহাৰ দাখিল দি ঘৰত আহি দেখে কোনো দুৰ্বৃত্তই কুকুৰটোক বিষ খোৱাই হত্যা কৰে। এনে জঘন্য কান্ড সংগঠিত কৰা দুৰ্বৃত্তৰ বিৰুদ্ধে আৰক্ষী প্ৰশাসনে কি ব্যৱস্থা লয় সেয়া হব লক্ষনীয়।
