দিপীলা, ৭ ডিচেম্বৰঃ আজি অসম সত্ৰ মহা সভাৰ অন্তৰ্ভুক্ত দৰং জিলাৰ বঢ়ীনগৰ গাঁও পঞ্চায়তৰ বৰেৰী গাঁৱত ১৫৬৮ খ্ৰীষ্টাব্দতে স্থাপিত শ্ৰীশ্ৰী পালাভিঠা সত্ৰৰ পুনৰ নিৰ্মাণৰ শুভাৰম্ভ অনুষ্ঠান অনুষ্ঠিত হব। মহাপুৰুষ শ্ৰীমন্ত শংকৰদেৱ গুৰুজনাৰ প্ৰপন্ন শিষ্য লেচাকোণীয়া গোবিন্দ আতৈয়ে স্থাপন কৰা সত্ৰ খনৰ শুভাৰম্ভ অসম চৰকাৰৰ অসম দৰ্শন আঁচনিৰ আবণ্টিত ধনেৰে ৰূপায়ণ কৰা হব। দিনযোৰা কাৰ্যসূচীৰে ৰূপায়ণ কৰিবলগীয়া অনুষ্ঠানৰ কাৰ্যসূচী অনুসৰি পুৱা ছয় বজাত সত্ৰ পৰিচালনা সমিতিৰ সম্পাদক অৰূপ জ্যোতি মহন্তৰ দ্বাৰা প্ৰাতঃপ্ৰসংগ , চাৰে সাত বজাত ভাগৱত পাঠ কৰিব খগেন হাজৰিকাই। আঠ বজাৰ স্মৃতি তৰ্পনৰ মুখ্য তৰ্পক হিচাপে অংশ লব অৱসৰপ্ৰাপ্ত শিক্ষক শুভাৰাম হাজৰিকাই। এঘাৰ বজাত সত্ৰৰ নামঘৰ নিৰ্মাণৰ শুবাৰম্ভ কৰিব ছিপাঝাৰ সমষ্টিৰ বিধায়ক বিনন্দ কুমাৰ শইকীয়াই। মংগল সূচক ঘোষা পাঠ কৰিব অসম সত্ৰ মহাসভাৰ কাৰ্যনিৰ্বাহক সদস্য প্ৰদীপ বৰক্ষেত্ৰীয়াই। দৰং জিলা সত্ৰ মহাসভাৰ সভাপতি ৰাজেন মহন্তই সঞ্চালনা কৰা অনষ্ঠানত অসম সত্ৰ মহাসভাৰ প্ৰধান সম্পাদক কুসুম কুমাৰ মহন্ত, অসম চৰকাৰৰ গাঁও আৰু নগৰ পৰিকল্পনা বিভাগৰ বিষয়া কাঞ্চন মহন্ত ৰয়,জিলা সত্ৰ মহাসভাৰ সম্পাদক গংগাৰাম বৈশ্য প্ৰমুখ্যে কেইবাগৰাকী বিশিষ্ট ব্যক্তিয়ে অংশ গ্ৰহণ কৰিব বুলি শ্ৰীশ্ৰী পালাভিঠা সত্ৰৰ সভাপতি দেবেন্দ্ৰ কুমাৰ মহন্ত আৰু সম্পাদক অৰূপ জ্যোতি মহন্তই জনাইছে। অসম চৰকাৰৰ অসম দৰ্শন আঁচনিৰ জৰিয়তে সত্ৰখন পুনৰ নিৰ্মাণৰ ব্যৱস্থা গ্ৰহন কৰি ছিপাঝাৰ সমষ্টিৰ বিধায়ক বিনন্দ কুমাৰ শইকীয়া লোৱা পদক্ষেপত বিধায়ক গৰাকীক ধন্যবাদ জ্ঞাপন কৰিছে সত্ৰ পৰিচালনা সমিতি আৰু আঞ্চলিক ৰাইজে ৷
