ৱাৰ্ডে ৱাৰ্ডে মিত্ৰজোঁটৰ নেতৃত্ব নামি পৰিছে নিৰ্বাচনী যুঁজত
লোকসভা নিৰ্বাচনৰ দিন চমু চাপি অহাৰ লগে লগে আমগুৰিত অগপ আৰু বিজেপিৰ যৌথ নিৰ্বাচনী প্ৰচাৰ তুংগত উঠা পৰিলক্ষিত হৈছে। যোৰহাট লোকসভা সমষ্টিৰ বিজেপি আৰু অগপ মিত্ৰজোঁটৰ প্ৰাৰ্থী তপন কুমাৰ গগৈৰ সমৰ্থনত দুয়োটা দলৰ নেতা-কৰ্মীয়ে ৱাৰ্ডে ৱাৰ্ডে চলাই গৈছে জোৰদাৰ প্ৰচাৰ অভিযান।
মিত্ৰজোঁটৰ নেতৃত্ব নামি পৰিছে নিৰ্বাচনী যুঁজত। আজিও আমগুৰি ৫ নং ৱাৰ্ডৰ পেঙেৰা গাঁৱত দেখা গ’ল একেই পৰিৱেশ। দুয়োটা দলৰ নেতৃত্ব আৰু সদস্য-সদস্যাসকলৰ লগতে শতাধিক লোক আজি স্বতঃস্ফূৰ্তভাৱে ওলাই আহে। উদ্দেশ্য এটাই ৰণাংগনৰ বাকৰিত তৰ্জনীৰ চাপৰেৰে ইতিহাস ৰচি উন্নয়ন আৰু বিকাশৰ ধাৰাবাহিকতা বৰ্তাই ৰখা। বিজেপ-অগপৰ মিত্ৰজোঁটৰ প্ৰাৰ্থীক জয়ী কৰোৱাৰ বাবে প্ৰৱল আত্মবিশ্বাসেৰে, বজ্ৰ কঠোৰ দৃঢ়তাৰে মুষ্টিবদ্ধ দুহাত তুলি আজি শত শত পেঙেৰা গাঁৱৰ পুৰুষ-মহিলা অংগীকাৰবদ্ধ হয়।
এই উপলক্ষে আজি পেঙেৰা গাঁৱত অনুষ্ঠিত নিৰ্বাচনী সভাত উপস্থিত থাকে আমগুৰি পৌৰসভাৰ পৌৰপতি অনামিকা নেওগ বৈশ্য, উপ-পৌৰপতি মানসী বৰা, প্ৰাক্তন পৌৰপতি জ্যোতি গগৈ, বিজেপিৰ জিলা কাৰ্যনিৰ্বাহক পুতুল বৰুৱা, পংকজ ভট্টাচাৰ্য, ভৰত গগৈ, মণ্ডলৰ উপ-সভাপতি নৃপেন গোহাঁই, হৰিশ বাহাদুৰ, মণ্ডলৰ সম্পাদক অন্তু ডেকা, অগপৰ নগৰ বিধায়িনী পৰিষদৰ সভাপতি দেবেশ্বৰ গগৈ, শক্তিকেন্দ্ৰৰ আহ্বায়ক ৰাজেন বৰুৱা, বিশিষ্ট সমাজকৰ্মী কিৰণ শৰ্মা, নিৰ্মল সিনহাকে আদি কৰি বহু গণ্য মান্য ব্যক্তি।