ব্যস্ত জীৱনশৈলীত নিজৰ স্বাস্থ্যক সময় দিয়াটো প্ৰায় সকলোৰে বাবে এক প্ৰত্যাহ্বান। কিন্তু ভাল খবৰটো হ’ল যে সপ্তাহত মাত্ৰ ৫ দিন ৩০ মিনিট খোজ কাঢ়িলে আপোনাৰ স্বাস্থ্যৰ ওপৰত ইয়াৰ প্ৰভাৱ পৰিব পাৰে। বিশেষজ্ঞসকলৰ মতে নিয়মীয়াকৈ খোজ কঢ়াটোৱেই আটাইতকৈ সহজ আৰু ফলপ্ৰসূ কম তীব্ৰতাৰ ব্যায়াম। খোজ কঢ়াটো কম প্ৰভাৱৰ ব্যায়াম যিয়ে হৃদযন্ত্ৰৰ স্বাস্থ্য বৃদ্ধি কৰিব পাৰে, মেজাজ উন্নত কৰিব পাৰে, জ্ঞানমূলক কাৰ্য্য বৃদ্ধি কৰিব পাৰে আনকি দীৰ্ঘায়ুতো অৰিহণা যোগাব পাৰে। বয়স বঢ়াৰ লগে লগে নিয়মীয়া শাৰীৰিক কাৰ্য্যকলাপ আমাৰ জীৱনত অন্তৰ্ভুক্ত কৰাটো আৰু অধিক গুৰুত্বপূৰ্ণ হৈ পৰে আৰু খোজ কঢ়াটো ইয়াৰ অন্যতম সুবিধাজনক আৰু উপকাৰী উপায়।
খোজ কাঢ়িলে শৰীৰৰ কি কি হয় জানো আহক-
- খোজ কঢ়াৰ ফলত ৰক্ত সঞ্চালন উন্নত হয়, যাৰ ফলত হৃদযন্ত্ৰ শক্তিশালী হয়। ইয়াৰ উপৰিও ৰক্তচাপ নিয়ন্ত্ৰণত সহায় কৰে, যাৰ ফলত হৃদৰোগৰ সম্ভাৱনা কম হয়।
- নিয়মিত শাৰীৰিক কাৰ্য্যকলাপে শৰীৰৰ ইনচুলিন সংবেদনশীলতা বৃদ্ধি কৰে, যাৰ বাবে তেজৰ চেনিৰ মাত্ৰা নিয়ন্ত্ৰণত থাকে।
- খোজ কাঢ়িলে কেলৰি কমে, যিয়ে ওজন কমা বা বজাই ৰখাত সহায় কৰে।
- খোজ কঢ়াই হাড়ৰ ঘনত্ব বজাই ৰাখে আৰু পেশীৰ শক্তি বৃদ্ধি কৰে, যাৰ ফলত গাঁঠিৰ বিষ কম হয় আৰু আঘাতৰ সম্ভাৱনাও কম হয়।
- খোজ কাঢ়িলে মানসিক চাপ কমে, মেজাজ উন্নত কৰে আৰু লগতে টোপনিৰ মান উন্নত কৰে। ইয়াৰ উপৰিও হতাশা আৰু উদ্বেগৰ লক্ষণসমূহ হ্ৰাস কৰাত সহায়ক হ’ব পাৰে।
যদি আপুনি ব্যায়াম কৰিবলৈ আৰম্ভ কৰিছে তেন্তে ৩০ মিনিট খোজ কঢ়াটো কঠিন যেন লাগিব পাৰে। এনে পৰিস্থিতিত লাহে লাহে আৰম্ভ কৰক। ১০ মিনিটৰ পৰা আৰম্ভ কৰি ক্ৰমান্বয়ে প্ৰতি সপ্তাহত ৫ মিনিট বৃদ্ধি কৰক। ইচ্ছা কৰিলে দিনটোত দুবাৰকৈ ১৫ মিনিট খোজ কাঢ়িবও পাৰে।
খোজ কাঢ়োতে সদায় মনত ৰাখিব এইকেইটা কথা-
- আৰামদায়ক জোতা পিন্ধিব।
- দ্ৰুত বা মধ্যমীয়া গতিৰে খোজ কাঢ়িব লাগে, যাতে আপোনাৰ উশাহ-নিশাহৰ অলপ কষ্ট অনুভৱ হয়, কিন্তু যাতে কথা ক’ব পাৰে তাৰ প্ৰতি লক্ষ্য ৰাখিব।
- নিৰাপদ আৰু সমতল পথত খোজ কাঢ়িব।
- লগত পানী লৈ যাওক আৰু হাইড্ৰেটেড হৈ থাকক।
- বন্ধু বা পৰিয়ালৰ কোনো সদস্যৰ সৈতে খোজ কাঢ়িব, ইজনে সিজনক প্ৰেৰণাও দিব পাৰিব।
আজিৰ পৰাই ৩০ মিনিট খোজ কঢ়াৰ অভ্যাস গঢ়ি তোলক, সুস্থ আৰু সুখী জীৱনৰ দিশে আগবাঢ়ি যাওক!