অসমৰ মুখ্যমন্ত্ৰী হিমন্ত বিশ্ব শৰ্মাই আজি দাবী কৰে যে কৰ্ণাটকৰ মুখ্যমন্ত্ৰী সিদ্ধাৰামাইয়া বা উপ মুখ্যমন্ত্ৰী ডি কে শিৱকুমাৰে লোকসভা নিৰ্বাচনত কংগ্ৰেছক ধ্বংস কৰিছে, যাৰ ফলত কংগ্ৰেছ দলৰ পৰাজয় হ’ব। শৰ্মাই কয় যে এই নেতাসকলে এনে বিষয়বোৰ উত্থাপন কৰিছিল যিয়ে লোকসভা নিৰ্বাচনত কংগ্ৰেছ দলৰ ক্ষতি কৰিছে। হিমন্ত বিশ্বই কয় “মই বিশ্বাস কৰোঁ, সিদ্ধাৰামাইয়া বা ডি কে শিৱকুমাৰ, তেওঁলোকৰ মাজৰে যিকোনো এজনে নিৰ্বাচনত কংগ্ৰেছক ধ্বংস কৰিছে আৰু আত্মঘাতী গ’ল কৰিছে। তেওঁলোকে মুছলমানৰ সংৰক্ষণৰ বিষয়ে কথা পাতিছে, অথচ নেহা হত্যাকাণ্ডকলৈ কৰ্ণাটকৰ লোকসকল খঙত উতলি আছে। লাভ জিহাদ আৰু ৰামেশ্বৰম কেফে বোমা বিস্ফোৰণৰ কথাবোৰকলৈয়ো কৰ্ণাটকবাসীৰ খং উঠি আছে?” টেলিভিছনক দিয়া সাক্ষাৎকাৰৰ সময়ত শৰ্মাই এনেদৰে কয়। তেওঁ লগতে কয় যে নেহা হীৰেমথৰ দুৰ্ভাগ্যজনক হত্যাকাণ্ডৰ বিষয়ে কংগ্ৰেছ উদাসীন আছিল আৰু তেওঁলোকে ইয়াৰ বাবে মূল্য পৰিশোধ কৰিবলগীয়া হৈছে।
হিমন্ত বিশ্ব শৰ্মা দেশত ‘শ্বৰিয়া আইন’ কাৰ্যকৰী কৰাৰ বিৰুদ্ধেও কংগ্ৰেছক সতৰ্ক কৰি দিয়ে। শৰ্মাই কয় যে কংগ্ৰেছে ভাৰতত শ্বৰিয়া আইন কাৰ্যকৰী কৰিব নোৱাৰিব বা মানুহৰ সম্পত্তি কাঢ়ি নিব নোৱাৰিব। মুখ্যমন্ত্ৰী শৰ্মাই কয়”ভাৰতীয় সংস্কৃতিত আমি নিজৰ বাবে নহয়, আগন্তুক প্ৰজন্মৰ বাবে কঠোৰ পৰিশ্ৰম কৰিছো; তেওঁলোকৰ সম্পত্তি কাঢ়ি নিয়াৰ কাৰো অধিকাৰ নাই,”। শৰ্মাই লগতে দাবী কৰে যে মুছলমানসকলৰ মাজত জাতিগত লোকপিয়ল অনুষ্ঠিত কৰাৰ সিদ্ধান্তৰ বাবে, এতিয়া পিছপৰা মুছলমান শ্ৰেণীয়ে বিজেপিক সমৰ্থন কৰিছে। তেওঁ কয় “মুছলমানসকলে আমাৰ চৰকাৰক সমৰ্থন কৰি আছে কাৰণ আমি মুছলমান সম্প্ৰদায়ত এটা জাতিগত লোকপিয়ল অনুষ্ঠিত কৰিম,”।