নলবাৰী জিলাৰ ডাঙ্গুৱাপাৰাস্থিত প্ৰেৰণা পুথিভঁড়ালৰ নতুন দেহৰ শাখাত যোৱা ২৮ এপ্ৰিল তাৰিখ দেওবাৰে ৰঙালী বিহু উদ্যাপন কৰা হয় | কাৰ্যসূচী অনুসৰি পুৱা পতাকা উত্তোলন কৰে পুথিভঁৰালৰ নতুন দেহৰ শাখাৰ মুখ্য পৰিচালক বনজিত ডেকাই | তাৰপাছতে একাদিক্ৰমে ভেশচন প্ৰতিযোগিতা পৰিচালনা কৰে মধুস্মিতা বৰ্মনে, কাৰ্তিক বৰ্মনে পৰিচালনা কৰে বিভিন্ন খেল-ধেমালি প্ৰতিযোগিতা, হৰিহৰ কলিতাই আকস্মিক বক্তৃতা প্ৰতিযোগিতা, সুশীল মালাকৰে কুইজ প্ৰতিযোগিতা, কস্তুৰী ডেকাই বিহুগীত প্ৰতিযোগিতা আৰু ডিম্পীমনি ডেকাই পৰিচালনা কৰে বিহুনৃত্য প্ৰতিযোগিতা । ভেশচন প্ৰতিযোগিতাত প্ৰথম স্থান লাভ কৰে কুঁৱলী ডেকা আৰু নিবিৰ ভূঞাই, দ্বিতীয় স্থান লাভ কৰে অৰ্নৱ ডেকাই, তৃতীয় স্থান লাভ কৰে ইছা বৰ্মন, নম্ৰতা দাস আৰু বিকি দাসে | আকস্মিক বক্তৃতা প্ৰতিযোগিতাত প্ৰথম স্থান লাভ কৰে মধুস্মিতা বৰ্মন আৰু ঋষিকেশ তালুকদাৰে, দ্বিতীয় স্থান লাভ কৰে কাৰ্তিক বৰ্মনে আৰু তৃতীয় স্থান লাভ কৰে বিকি দাসে | কুইজ প্ৰতিযোগিতাত প্ৰথম স্থান লাভ কৰে হিমাদ্ৰী মালাকৰে , দ্বিতীয় স্থান যুটীয়াভাৱে লাভ কৰে কস্তুৰী ডেকা আৰু ঋষিকেশ তালুকদাৰে আৰু তৃতীয় স্থান লাভ কৰে ডিম্পীমনি ডেকাই |
বিহুগীত প্ৰতিযোগিতাত প্ৰথম, দ্বিতীয় আৰু তৃতীয় স্থান লাভ কৰে ক্ৰমে কস্তুৰী ডেকা, অংকিতা কাশ্যপ আৰু মধুস্মিতা বৰ্মনে | বিহুনৃত্য প্ৰতিযোগিতাত প্ৰথম, দ্বিতীয় আৰু তৃতীয় স্থান লাভ কৰে ক্ৰমে কৰিস্মিতা বৰ্মন, হিমাদ্ৰী মালাকৰ আৰু অংকিতা কাশ্যপে |
অনুষ্ঠানত উপস্থিত থাকি প্ৰেৰণা পুথিভঁড়ালৰ প্ৰতিষ্ঠাপক তথা মুখ্য পৰিচালক দ্বিজেন্দ্ৰ নাৰায়ণ শৰ্মাই কয় যে – এটা সময়ত গুণাভিৰাম বৰুৱা, বুদ্ধিন্দ্ৰনাথ ভট্টাচাৰ্য আদি প্ৰাত:স্মৰণীয় অসমীয়াই বিহুক ইতৰ শ্ৰেণীৰ লোকৰ অশ্লীল নৃত্য-গীত বুলি অভিহিত কৰিছিল । কিন্তু লক্ষ্মীনাথ বেজবৰুৱা প্ৰমুখ্যে এচামে কিন্তু বিহুৰ মৰ্ম বুজিছিল । পৰৱৰ্তীকালত হেমাংগ বিশ্বাসে বিহুগীতৰ সংজ্ঞা দি কৈছিল – যি নাই বিহুগীতত, সি নাই অসমত ; যি নাই অসমত, সি নাই বিহুগীতত । অৰ্থাৎ বিহুগীতবোৰ অসম আৰু অসমীয়াৰ দাপোনস্বৰূপ । অসমীয়াৰ হাঁহি-কান্দোন, সুখ-দুখ, প্ৰেম-বিৰহ আদিৰ লগতে সমাজত চলি থকা অন্যায়-অসূঁয়া, জাত-পাত, বিভেদ-বৈষম্য আদিও ফুটি উঠিছিল বিহুগীতত । বিহুৰ দৰ্শন সম্পৰ্কে ক’বলৈ গৈ একেগৰাকী হেমাংগ বিশ্বাসে কৈছিল – ধৰ্মপ্ৰভাৱমুক্ত ইহজাগতিকতা আৰু শ্ৰমশীল জীৱনৰ প্ৰতি অসীম মমতা – এয়াই বিহুৰ দৰ্শন । অৰ্থাৎ বিহু কোনো ধৰ্মীয় উৎসৱ নহয়, ইয়াত ইহজগতৰ কথাহে আছে, পৰজগতৰ কথা নাই । বিহুৰ জৰিয়তে প্ৰকাশ পায় হালোৱা-হজুৱা, কৃষক-শ্ৰমিক আদিৰ প্ৰতি অসীম মমতা । কিন্তু আজি এচামে বিহুক আজি হিন্দুৰ উৎসৱলৈ পৰ্যবসিত কৰিছে, বিহুক আজি কৃষক-শ্ৰমিকৰ পৰা হাইজেক কৰা হৈছে । বিহু, বিহুৰ গায়ক – সকলো আজি পন্য । পন্যৰ প্ৰতি মানুহৰ আসক্তি বাঢ়িছে । সেয়ে মাজনিশা মঞ্চত উঠি অশ্লীল অংগীভংগী কৰা গায়কক চাবলৈ ৰাইজ হিলদল ভাঙি যায় । এই আসক্তিয়ে বিহুৰ অকালমৃত্যু ঘটাব অথবা ই বিকৃত ৰূপত জীয়াই থাকিব । আনহাতে গড়ভিতৰ শাখাৰ মুখ্য পৰিচালক নূৰ ইছলাম আলীয়ে তেখেতৰ বক্তৃতাত বিহু উৎসৱটো ধৰ্মীয়কৰণৰ বাহিৰত ৰাখিবলৈ আহ্বান জনায় ।
ইয়াৰোপৰি গল্পকাৰ কমলেন্দ্ৰ শৰ্মা, সাংবাদিক ভাস্কৰজ্যোতি ডেকা, গৱেষক ছাত্ৰ পৰেশ দাস, প্ৰশান্ত মিলি, শুভাকাংক্ষী কৌশিক দাস, প্ৰদীপ তালুকদাৰ, প্ৰণৱ জ্যোতি ডেকা,বিজুমনি ডেকা, জিন্তু দাস, মামণি দেৱী, আদিয়ে চমু বক্তৃতা প্ৰদান কৰে।
সন্ধিয়া ছয় বজাত বন্তি প্ৰজ্বলন কৰি সাংস্কৃতিক অনুষ্ঠান উদ্বোধন কৰে জ্যেষ্ঠ ব্যক্তি নিৰোদা ডেকা, নীলিমা বৰ্মন আৰু অপতী বৰ্মনে | সাংস্কৃতিক অনুষ্ঠানত শিক্ষক তপন কলিতাৰ পৰিচালনাত পুথিভঁড়ালৰ সদস্যসকলে দলীয় বিহুনৃত্য আৰু মধুস্মিতা বৰ্মন, দিক্ষীতা দাস, গৰিমা ডেকা আৰু লিজা ডেকাই দলীয় নৃত্য প্ৰদৰ্শন কৰে | তাৰোপৰি এককভাৱে আধুনিক নৃত্য প্ৰদৰ্শন কৰি দৰ্শকক আমোদ দিয়ে ক্ৰমে হিমাদ্ৰী মালাকৰ, কৰিস্মিতা বৰ্মনে | সাংস্কৃতিক অনুষ্ঠানৰ আন এক মুখ্য আকৰ্ষণ আছিল সংগীত শিল্পী জিন্তু বৰ্মনৰ গীতৰ শৰাই | শিল্পী জিন্তু বৰ্মনৰ সংগীতানুষ্ঠানে উপস্থিত প্ৰতিগৰাকী দৰ্শককে মোহিত কৰে | সৰ্বত্ৰে বিহু উৎসৱটো কেৱল লাখ লাখ টকা চান্দা তুলি সৰ্বসাধাৰণ ৰাইজক হাৰাশাস্তি কৰাৰ বিপৰীতে মুখ্য পৰিচালক বনজিত ডেকা, উদযাপন সমিতিৰ সভাপতি তপন কলিতা, সম্পাদক জিন্তু হাজৰিকা, সহকাৰী সম্পাদকদ্বয় চিন্তু তালুকদাৰ আৰু নিশামনি দাস, সাংস্কৃতিক সম্পাদক হৰিহৰ কলিতা, সাংগঠনিক সম্পাদক সুকুমাৰ শৰ্মাৰ লগতে পুথিভঁৰালৰ পৰিচালক মণ্ডলীৰ সহযোগত সদস্য-শুভাকাংক্ষীয়ে স্বইচ্ছাই আগবঢ়োৱা ধনেৰে আনুষ্ঠানটোৰ সফল সমাপ্তি ঘটাই পুথিভঁৰালটোৱে সকলোৰে দৃষ্টি আকৰ্ষণ কৰিছে ।
প্ৰেৰক, দিগন্ত বৰ্মণ, বৰ্মণ।