ঢেকিয়াজুলিস্থিত শ্ৰীশ্ৰী সূৰ্য ষষ্ঠী প্ৰাঙ্গনৰ শ্ৰী সূৰ্য মন্দিৰত বুধবাৰে ৰাতি ১২:৪৫ বজাত এক চুৰি কাৰ্য সংঘটিত হয়। চুৰে চুৰি কাৰ্য সংঘটিত কৰি মন্দিৰৰ ভিতৰৰ অন্যান্য সামগ্ৰীও লণ্ড-ভণ্ড কৰি থৈ যায়। চুৰি কাৰ্য সংঘটিত কৰাৰ সময়ত চুৰৰ মুখমণ্ডল সম্পূৰ্ণৰূপে ঢকা আছিল। ইতিমধ্যে ঢেকিয়াজুলিৰ ভাৰপ্ৰাপ্ত আৰক্ষী বিষয়া ৰাজা সৰকাৰৰ সৈতে ঢেকিয়াজুলি আৰক্ষী মন্দিৰত উপস্থিত হৈ ঘটনাৰ বুজ লয়।
উক্ত ঘটনাৰ সন্দৰ্ভত মন্দিৰৰ মুখ্য সমিতিৰ অধ্যক্ষ বলৰাম বৰ্মাই ঢেকিয়াজুলিৰ স্থানীয় সংবাদদাতা সকলক জনায় যে – যোৱাটো বৰ্ষৰ পৰা এতিয়ালৈকে ছট পূজাৰ দান পাত্ৰ খোলা হোৱা নাই। দান পাত্ৰৰ পৰা চুৰে কমেও পোন্ধৰ-বিশ হাজাৰমান টকা লৈ যায়। সমিতিৰ সম্পাদক ৰামায়ণ গুপ্তাই জনোৱা মতে ঘটনাৰ চিচি টিভিৰ ফুটেজ মন্ত্ৰী অশোক সিংহললৈ প্ৰেৰণ কৰা হৈছে। উল্লেখ্য যে, ঢেকিয়াজুলিৰ বিধায়ক তথা অসম চৰকাৰৰ মন্ত্ৰী অশোক সিংহলৰ দ্বাৰা প্ৰস্তাৱিত তথা মন্দিৰ সমিতিৰ সহযোগত শ্ৰী শ্ৰী সূৰ্য মন্দিৰৰ প্ৰাণ প্ৰতিষ্ঠা ২০২২ বৰ্ষৰ ২৩ জানুৱাৰীত সম্পন্ন হৈছিল।