বি এইচ বি মহাবিদ্যালয়ৰ উপাধ্যক্ষ আৰু ইতিহাস বিভাগৰ মুৰব্বী অধ্যাপক মোফাজ্জল হুছেইনক তেওঁৰ চাকৰি জীৱনৰ অন্তিম দিনটোত সম্বৰ্ধনা জনোৱাৰ উদ্দেশ্যে শুক্ৰবাৰে এখনি সভাৰ আয়োজন কৰা হয়৷ বি এইচ বি মহাবিদ্যালয়ৰ শিক্ষক গোটৰ সভাপতি ড০ দীপ্তি কলিতাই সভাপতিত্ব কৰা সভাখনৰ উদ্দেশ্য ব্যাখ্যা কৰে সম্পাদক সবিতা টকবিপিয়ে। মহাবিদ্যালয়খনৰ অধ্যক্ষ ড০ নয়ন জ্যোতি দাসে মোফাজ্জল হুছেইনে সুদীৰ্ঘ চাকৰি জীৱনৰ কালছোৱাত ছাত্ৰ-ছাত্ৰীৰ লগতে মহাবিদ্যালয়খনৰ সৰ্বাঙ্গীণ উন্নয়নয়ৰ বাবে আগবঢ়োৱা অৱদানৰ ওপৰত আলোকপাত কৰে আৰু সেই অৱদানৰ বাবে তেওঁক কৃতজ্ঞতা জ্ঞাপন কৰে। অধ্যক্ষ ডঃ নয়নজ্যোতি দাসে তেওঁক সম্বৰ্দ্ধনা পত্ৰ,শৰাই, কিতাপৰ টোপোলা আদিৰে সম্বৰ্ধনা জনোৱাৰ লগতে পেঞ্চন অৰ্ডাৰ (পি পি অ’) প্ৰদান কৰে।
সভাত উপস্থিত থাকি সন্মানীয় শিক্ষকগৰাকীক মহাবিদ্যালয়খনৰ শিক্ষক আৰু অনাশিক্ষক কৰ্মচাৰীসকলৰ লগতে ছাত্ৰ একতা সভাৰ তৰফৰ পৰাও বিভিন্ন উপহাৰ প্ৰদান কৰি সুস্বাস্থ্য আৰু দীৰ্ঘায়ু কামনা কৰে । ফণীধৰ মেচ,ড০ কল্পনা বৈশ্য, নয়নজ্যোতি তালুকদাৰ, প্ৰবোধ কলিতা, ড০ পূৰৱী তালুকদাৰ, প্ৰীতি ৰেখা দত্ত, নৱমণি শইকীয়া, স্বস্তিশ্ৰী শইকীয়া আৰু ডেইজী কলিতাৰ লগতে আন কেইবাজনেও মোফাজ্জল হুছেইনৰ বিভিন্ন গুণ গৰিমা, কতৰ্ব্যনিষ্ঠা আৰু দায়িত্ববোধ সম্পৰ্কে আলোপাত কৰে আৰু তেওঁলোকৰ অভিজ্ঞতাৰ কথা স্মৰণ কৰে। মোফাজ্জল হুছেইনে তেওঁৰ চাকৰি জীৱনৰ বহু মিঠা স্মৃতি ৰোমন্থন কৰি সভাস্থলীত এক আৱেগিক পৰিৱেশৰ সৃষ্টি কৰি সকলোৰে চকু সেমেকাই তোলে। ড০ নমিতা দাসৰ শলাগৰ শৰাইৰে সামৰণি পৰা সভাখনত মহাবিদ্যালয়ৰ পৰিচালনা সমিতিৰ সভাপতি ডঃ অচ্যুত চন্দ্ৰ দাসৰ লগতে মহাবিদ্যালয়ৰ ভালেসংখ্যক ছাত্ৰ-ছাত্ৰীয়েও অংশগ্ৰহণ কৰে৷