৯জুনত তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰিব দেশৰ প্ৰধানমন্ত্ৰী নৰেন্দ্ৰ মোদীয়ে! উপস্থিত থাকিব বাংলাদেশৰ প্ৰধানমন্ত্ৰী শ্বেখ হাছিনা…
দেওবাৰে সন্ধিয়া তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰিব দেশৰ প্ৰধানমন্ত্ৰী নৰেন্দ্ৰ মোদীয়ে! ইয়াৰ পূৰ্বে শুনা চৰ্চা হৈছে যে অহা দেওবাৰে তেলেগু দেশম পাৰ্টিৰ মুৰব্বী চন্দ্ৰবাবু নাইডুৱে অন্ধ্ৰ প্ৰদেশৰ মুখ্যমন্ত্ৰী হিচাপে শপত গ্ৰহণ কৰিব পাৰে। নৰেন্দ্ৰ মোদীয়ে ৯ জুন দেওবাৰে তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰিব বুলি খবৰ ওলাইছে।মঙলবাৰে ঘোষণা কৰা হয় লোকসভা নিৰ্বাচনৰ ফলাফল। বুধবাৰে প্ৰধানমন্ত্ৰীৰ পদৰ পৰা পদত্যাগ কৰে মোদীয়ে। তেওঁ পদত্যাগ পত্ৰখন ৰাষ্ট্ৰপতি দ্ৰৌপদী মুৰ্মুক দিয়ে। ৰাষ্ট্ৰপতিয়ে তেওঁৰ পদত্যাগ পত্ৰ গ্ৰহণ কৰে। একে সময়তে নতুন চৰকাৰ গঠন নোহোৱা পৰ্যন্ত এই পদৰ দায়িত্ব চম্ভালিবলৈ মোদীক অনুৰোধ কৰে মুৰ্মুৱে।
খবৰ অনুসৰি পৰিৱৰ্তিত পৰিস্থিতিত চন্দ্ৰবাবুৱে ১২ জুনত শপত গ্ৰহণ কৰিব পাৰে। বিজেপিৰ সূত্ৰ অনুসৰি বাংলাদেশৰ প্ৰধানমন্ত্ৰী শ্বেখ হাছিনা, শ্ৰীলংকাৰ ৰাষ্ট্ৰপতি ৰানিল উইক্ৰেমসিংহ, নেপালৰ প্ৰধানমন্ত্ৰী পুষ্পকমল দাহাল, ভূটানৰ ৰজা জিগমে খেছাৰ নামগ্যাল ৱাংচুকে মোডীৰ শপত গ্ৰহণ অনুষ্ঠানত উপস্থিত থাকিব পাৰে।
মঙলবাৰে দেশৰ ৫৪৩টা সমষ্টিৰ লোকসভা নিৰ্বাচনৰ ফলাফল প্ৰকাশ পায়। এন ডি এয়ে লাভ কৰে ২৯২খন আসন। বিৰোধী মিত্ৰজোঁট ‘ভাৰত’য়ে লাভ কৰে ২৩৩খন আসন। আন দলসমূহে ১৮খন আসন লাভ কৰে। তাৎপৰ্যপূৰ্ণভাৱে এন ডি এয়ে সংখ্যাগৰিষ্ঠতা লাভ কৰিলেও ২০১৪ আৰু ২০১৯ চনৰ দৰে এইবাৰ বিজেপিয়ে এটাও সংখ্যাগৰিষ্ঠতা নাপালে। কাৰণ, ৫৪৫খন আসনৰ (দুখন মনোনীত আসনকে ধৰি) লোকসভাত সংখ্যাগৰিষ্ঠতাৰ বাবে ২৭৩খন আসনৰ প্ৰয়োজন। বিজেপিয়ে এককভাৱে লাভ কৰে ২৪০খন আসন। গতিকে চৰকাৰ গঠন কৰিবলৈ তেওঁলোকে নিজৰ অংশীদাৰ দলৰ ওপৰত নিৰ্ভৰ কৰিব লাগিব। এনে পৰিস্থিতিত বুধবাৰে দিল্লীত এন ডি এৰ অংশীদাৰৰ সৈতে বৈঠকত বহিল মোদী, অমিত শ্বাহ। বুধবাৰে সন্ধিয়া দিল্লীতো “ভাৰত” মিত্ৰজোঁটৰ অংশীদাৰসকলে বৈঠকত মিলিত হয়।