শিলচৰ তাৰাপুৰৰ মদন মোহন ৰোড অঞ্চলত সোমবাৰে পবিত্ৰ ঈদ-উজ-জোহাৰ দিনত গো মাংস কটা লৈ উত্তেজনা। এজন ব্যক্তিৰ ঘৰত গো-মাংস উদ্ধাৰ হোৱা ঘটনাৰ আধাৰত অঞ্চলটোত তীব্ৰ উত্তেজনা সৃষ্টি হৈছে। ইফালে, স্থানীয় মহিলা আৰু পুৰুষে ৰাজপথলৈ ওলাই আহি প্ৰতিবাদ সাব্যস্ত কৰাত পৰিস্থিতি জটিল হৈ পৰে । আৰক্ষীয়ে ঘটনাস্থলীত উপস্থিত হৈ অঞ্চলটোৰ থিনাং ৰংমাই আৰু চামলক পো ৰংমাইৰ ঘৰৰ পৰা বেগত ভৰাই থোৱা গো-মাংস উদ্ধাৰ কৰে। তদুপৰি দুয়োকে আটক কৰে যদিও মূল অভিযুক্তই পলায়ন কৰিবলৈ সক্ষম হয়। ইফালে হিন্দু সংগঠনৰ বিষয়ববীয়াৰ লগতে ক্ষুব্ধ ৰাইজে একত্ৰিত হৈ তাৰাপুৰ থানা ঘেৰাও কৰে। দীৰ্ঘ সময় ধৰি প্ৰতিবাদ আৰু বিভিন্ন শ্লোগান দিয়ে তেওঁলোকে।
পৰিস্থিতি নিয়ন্ত্ৰণৰ বাবে তাৰাপুৰ আৰক্ষী থানা এলেকাত বৃহৎ কমাণ্ডো আৰু আৰক্ষী বাহিনী মোতায়েন কৰা হয় । প্ৰতিবাদৰ সময়ত শিলচৰৰ বিধায়ক দীপায়ন চক্ৰৱৰ্তী উপস্থিত হৈ দোষীক গ্ৰেপ্তাৰ কৰাৰ দাবী জনায়। এই ঘটনাক তীব্ৰ গৰিহণা দি বিধায়কগৰাকীয়ে অঞ্চলটোত শান্তি-শৃংখলা বজাই ৰাখিবলৈ সকলোকে সহযোগিতা আগবঢ়াবলৈ আহ্বান জনায়। ইফালে হিন্দু সংগঠনসমূহৰ বিষয়াসকলে ক্ষোভ প্ৰকাশ কৰি কয় যে, তেওঁলোকে কেতিয়াও গো-মাংসৰ কাণ্ড মানি নলয়। লগতে শীঘ্ৰে অভিযুক্তক গ্ৰেপ্তাৰ নকৰিলে পৰিস্থিতি ভয়াৱহ ৰূপ ধাৰণ কৰিব ।
ফলস্বৰূপে অঞ্চলটোত যদি কোনো অপ্ৰীতিকৰ ঘটনা সংঘটিত হয় তেন্তে তাৰ বাবে আৰক্ষী জগৰীয়া হ’ব বুলিও হুংকাৰ দিয়ে।
ইপিনে হিন্দু সংগঠন আৰু স্থানীয় ৰাইজৰ হেঁচাত আৰক্ষীয়ে গো-মাংসৰ কাণ্ডৰ সৈতে জড়িত মূল অভিযুক্ত জিয়ানপুনা ৰংমাইক গ্ৰেপ্তাৰ কৰি ঘটনাৰ দুঘণ্টাৰ ভিতৰতে থানালৈ লৈ আহে। ইফালে স্থানীয় ৰাইজে মূল অভিযুক্তক গ্ৰেপ্তাৰ কৰাৰ বাবে তাৰাপুৰ আৰক্ষীক অভিনন্দন জনাই প্ৰতিবাদী কাৰ্যসূচী সমাপ্ত কৰে। সম্প্ৰতি তাৰাপুৰ অঞ্চলৰ পৰিস্থিতি সম্পূৰ্ণ নিয়ন্ত্ৰিত হোৱাৰ লগতে অঞ্চলটোত শান্তি ঘূৰি আহিছে।