বছৰৰ প্ৰথমটো বাঢ়নী পানীৰ প্ৰভাৱ পৰিছে পশ্চিম নলবাৰীৰ বিস্তীৰ্ণ অঞ্চলত। বিগত কেইবাদিনো ধৰি অব্যাহত থকা মুষলধাৰ বৰষুণৰ ফলত পশ্চিম নলবাৰীৰ বিভিন্ন অঞ্চলেদি বৈ যৈৱা বুঢ়াদিয়া নদীৰ বাদেও আৰু কানাইখুন্দা জানৰ বাঢ়নী পানীৰ কবলত কৃষিপ্ৰধান পশ্চিম নলবাৰীৰ অঞ্চলৰ নদলা, গামাৰিমূৰী, খাটাৰূপীয়াবাথান, সাহপুৰ, বৰপিত, পূৰ্ণি, কুলবিল, সণোৰা, মাক্ৰাপাৰকে ধৰি কেইবাখনো গাঁৱৰ কিছু কিছু অংশ তথা খেতিপথাৰ ডুবি আছে ৷ ইপিনে, বুঢ়াদিয়া নৈৰ বাঢ়নী পানীয়ে কেইবাঠাইটো মথাউৰি চিঙাৰ দুৰ্ভাৱনা কঢ়িয়াই আনিছে বুলি জানিব পৰা গৈছে।
স্থানীয় ৰাইজে অভিযোগ কৰা মতে যোৱাবেলিৰ বুঢ়াদিয়াৰ বানে পূৰ্ণিস্থিত মথাউৰিৰৰ চাৰি অংশৰ ক্ষতিসাধন কৰিছিল যদিও মথাউৰিৰ সেই অংশবোৰৰ পৰ্যাপ্ত মেৰামতি নোহোৱাত নৈখনৰ জলস্তৰ বৃদ্ধিৰ লগে লগে শংকিত হৈ পৰিছে ৰাইজ। বাৰিষাৰ পূৰ্বে কিয় মথাউৰিটোৰ ভগ্ন অংশ চাৰিটাৰ মেৰামতি সম্পন্ন নহ’ল তাকে লৈ আজি বিভাগীয় কৰ্তৃপক্ষক সংবাদ মাধ্যমৰ সন্মুখতে মুকলিকৈ কেইবাগৰাকী স্থানীয় লোকসহিতে জবাবদিহি কৰে ।
যোৱাবেলিৰ বানে পূৰ্ণিত ভঙা বুঢ়াদিয়াৰ মথাউৰিৰ চাৰিটা অংশৰ পুনঃনিৰ্মাণ সম্পন্ন নোহোৱাক লৈ ক্ষোভ উজাৰি বিভাগীয় লোকগৰাকীক একাংশ ৰাইজে সংবাদ মাধ্যমৰ সন্মুখতে মুকলিকৈ জবাবদিহি কৰে বুলি জানিব পৰা গৈছে। বাতৰি লিখা পৰলৈ বুঢ়াদিয়াৰ বাঢ়নী পানীয়ে ঐতিহ্যমণ্ডিত নদলা বজাৰখন বুৰাই পেলোৱাৰ লগতে বাঢ়নী পানীয়ে চামতা-কৈঠালকুছি পথ, সাহপুৰ-হাৰিভাঙা পথৰো ঠায়ে ঠায়ে প্লাবিত কৰিছে ৷