তীব্ৰ গৰমে দহিছে দেশৰ ৰাজধানী চহৰ নতুন দিল্লীক। বতৰ বিজ্ঞান বিভাগৰ মতে দিল্লীত সৰ্বোচ্চ উষ্ণতা ৫১ ডিগ্ৰী চেলছিয়াছৰ দৰে “অনুভৱ” হৈছে। ইয়াৰ লগে লগে ৰাম মনোহৰ লোহিয়া হাস্পতালত গৰমৰ ফলত ৫ জন লোকৰ মৃত্যু হোৱাৰ বিপৰীতে তিনিদিনত কমেও ১৫ জন লোকৰ মৃত্যু হোৱাৰ বাতৰি পোৱা গৈছে। মৃত্যু ঘটা বেছিভাগেই দৈনিক মজুৰি কৰা শ্ৰমিক। বহু লোকে এতিয়া ভেণ্টিলেটৰৰ জীৱনৰ বাবে যুঁজি আছে। আৰ এম এল হাস্পতালৰ অধীক্ষক ডাঃ অজয় শুক্লাৰ মতে মঙলবাৰে হিট ষ্ট্ৰ’কত আক্ৰান্ত হোৱা ১১ জন লোকক চিকিৎসালয়ত ভৰ্তি কৰোৱা হয়। কালিৰে পৰা কমেও ৪৫ জন লোকক ভৰ্তি কৰোৱা হৈছে।
বিষয়াগৰাকীয়ে কয় যে, “মুঠ ২২জন ৰোগীক চিকিৎসালয়ত ভৰ্তি কৰা হৈছে আৰু ৫জন ৰোগীয়ে সন্দেহযুক্ত হিটষ্ট্ৰ’কৰ বাবে প্ৰাণ হেৰুৱাইছে। ১২জন ৰোগী ভেণ্টিলেটৰত আছে আৰু তেওঁলোকৰ অৱস্থাও সংকটজনক হৈ আছে। অধিকাংশ ৰোগীয়েই হৈছে শ্ৰমিক।” . তেওঁ লগতে কয় যে মৃত্যুৰ মূল কাৰণ হ’ল চিকিৎসালয়ত উপস্থিত হোৱাত পলম হোৱা।