চেলেংহাতট আটাছুৰ অৱস্থান ধৰ্মঘট : জনজাতিকৰন আৰু পৌৰাণিক কৃতিচিহ্ন সমূহ সংৰক্ষণ দাবীৰে স্মাৰক পত্ৰ প্ৰদান

যোৰহাট জিলাৰ চেলেংহাতৰ ষ্টেচনৰ সমীপত আজি দিনৰ ১১ বজাৰ পৰা টাই আহোম ছাত্ৰ সন্থাৰ চেলেংহাত আঞ্চলিক সমিতিয়ে এক অৱস্থান ধৰ্মঘট কাৰ্যসূচী ৰূপায়ন কৰে। আটাছুৰ সদস্য সকলে আহোম যুগৰ প্ৰাচীন কৃতি চিহ্ন সমূহৰ সংৰক্ষণ আৰু আহোম সকলক জনজাতিকৰণৰ দাবীৰে উত্তাল প্ৰতিবাদ সাব্যস্ত কৰে। ধৰ্মঘটৰ অন্তত চেলেংহাত আঞ্চলিক টাই আহোম ছাত্ৰ সন্থাৰ সভাপতি ত্ৰলোক্য গগৈ আৰু সম্পাদক প্ৰদ্যুত ফুকন স্বাক্ষৰ সম্বলিত এক স্মাৰক পত্ৰ টীয়ক ৰাজহ চক্ৰ বিষয়া লিনা দলেৰ হাতত অৰ্পণ কৰে। উক্ত পত্ৰখনত ছাত্ৰ সংগঠন তোৰ জন্মৰ পৰাই জনজাতি কৰণৰ দাবী কৰি আহিছে যদিও চৰকাৰী পক্ষই প্ৰতিশ্ৰুতিৰ বাদে কোনো কাৰ্য্যকৰী ব্যৱস্থা গ্ৰহণ কৰা নাই। আনহাতেদি চেলেংহাতৰ পৰাই উৎপত্তি হোৱা চিন্তামণিগড়, লাদৈগড় বেদখল মুক্ত কৰা, চেলেং বাগিচাৰ মাজত অৱস্থিত নাওবৈছা ফুকন কোঁৱৰ- কুঁৱৰীৰ মৈদাম সংৰক্ষণ, ৰহধলা পুখুৰীৰ সংৰক্ষণ আদিৰ ক্ষেত্ৰৰ বহুবাৰ চৰকাৰী পক্ষক আবেদন নিবেদন কৰিও কোনো সুফল পোৱা নাই বুলি অভিযোগ উত্থাপন কৰি অনতিপলমে উক্ত দাবীসমূহৰ ক্ষেত্ৰত ইতিবাচক পদক্ষেপ গ্ৰহনৰ দাবী কৰে। আজিৰ প্ৰতিবাদ স্থলীত যোৰহাট জিলা আটাছুৰ যুটীয়া সম্পাদক মণ্টু ফুকন, ললিত গগৈ, যোৰহাট মহকুমা আটাছুৰ উপ সভাপতি বদন গগৈ , সম্পাদক হেমন্ত গগৈৰ লগতে আটাছুৰ বহু ছাত্ৰ কৰ্মী উপস্থিত থাকে।