পশ্চিম কাৰ্বি আংলং জিলাৰ ডংকামোকামস্থিত ৱাইচং ষ্টেডিয়ামত দেওবাৰে অসম চৰকাৰৰ প্ৰজ্ঞান ভাৰতী আঁচনিৰ জৰিয়তে ড° বানীকান্ত কাকতি সোঁৱৰনী মেধা বঁটা প্ৰদান কাৰ্যসূচী ৰূপায়ন কৰা হয় ৷ পাৰ্বত্য জিলাখনৰ ৪৭ গৰাকী মেধাবী ছাত্ৰীয়ে বিগত উচ্চতৰ মাধ্যমিক চূড়ান্ত পৰীক্ষাত সুখ্যাতিৰে প্ৰথম বিভাগত উত্তীৰ্ণ হোৱাৰ বাবে আজি অসম চৰকাৰৰ প্ৰতিশ্ৰুতি অনুসৰি ষ্টুটি প্ৰদান কৰে কাৰ্বি আংলং স্বায়ত্ত্ব শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, ডিফু লোকসভা সমষ্টিৰ সাংসদ হৰেণছিং বে’, বৈঠালাংছ’ বিধানসভা সমষ্টিৰ বিধায়ক ডাঃ মানছিং ৰংপিয়ে ৷ পশ্চিম কাৰ্বি আংলং জিলা উপায়ুক্তৰ তত্বাৱধানত আয়োজন কৰা অনুষ্ঠানটিত সৰ্বশিক্ষাৰ জিলা মিছন সমন্বয়ক হাকিম ৰংপিয়ে ভাৰতৰ ৰাষ্ট্ৰীয় সংগীতটি সাংঘাতিকভাৱে ভূলকৈ পৰিবেশন কৰি হাঁহিয়তাৰ পাত্ৰ হৈ পৰে ৷ উল্লেখযোগ্য যে এগৰাকী শিক্ষা বিষয়াই যদি সাধাৰণ ৰাষ্ট্ৰীয় সংগীতটিও শুদ্ধকৈ পৰিবেশন কৰিব নোৱাৰে তেন্তে কেনেদৰে এখন জিলাৰ সৰ্বশিক্ষাৰ দায়িত্ব লাভ কৰিছে বা তেওঁলোকৰ পৰা জিলাখনৰ শিক্ষাখণ্ডত কিবা উন্নতি হ’বনে বুলি তীব্ৰ সমালোচনা কৰে সচেতন মহলে ৷ কাৰ্বি পৰিষদৰ মুখ্য কাৰ্যবাহী সদস্য তুলিৰাম ৰংহাং উপস্থিত থকা সভাখনিত ভূলকৈ ৰাষ্ট্ৰীয় সংগীত পৰিবেশন কৰা এগৰাকী উচ্চ পৰ্যায়ৰ শিক্ষা বিষয়াৰ বিৰুদ্ধে এইক্ষেত্ৰত কি ব্যৱস্থা গ্ৰহণ কৰিব সেইয়া পৰবৰ্তী সময়ত লক্ষনীয় হ’ব ৷
