গুৱাহাটী, ২৮ ছেপ্তেম্বৰ: কাৰ জেপত সোমাই অনুসূচিত জাতিৰ উন্নয়নৰ বাবে আৱণ্টিত ধন ? এই কথা এতিয়া চৰ্চাৰ বিষয় হৈ পৰিছে ৷ কিয়নো অনুসূচিত জাতিৰ বাবে আৱণ্টন দিয়া ধন কাৰ পকেটলৈ যায় সেই কথা অনুমান পোৱা গৈছিল এটা সংগঠনে শেহতীয়াকৈ সৰৱ হৈ থকা এক দুৰ্নীতিক লৈ(Assam Welfare Fund Corruption) ৷ অনুসূচিত জাতি সংগ্ৰামী যুৱ পৰিষদ নামৰ সংগঠনটোৱে শেহতীয়াকৈ অসম অনুসূচিত জাতি কল্যাণ সঞ্চালকালয়ত ১৪০ কোটি টকাৰ বিয়াগোম কেলেংকাৰী সংঘটিত হোৱাৰ অভিযোগ আনিছে (Corruption in Welfare Funds)৷
ইতিমধ্যে সংগঠনটোৱে অনুসূচিত জাতি সঞ্চালকালয় ঘেৰাও কৰি প্ৰতিবাদ সাব্যস্ত কৰাৰ লগতে প্ৰধানমন্ত্ৰীৰ কাৰ্যালয়, ৰাষ্ট্ৰীয় অনুসূচিত জাতি আয়োগ আৰু অসমৰ মুখ্যমন্ত্ৰীক অভিযোগ দাখিল কৰিছে ৷ প্ৰধানমন্ত্ৰীৰ কাৰ্যালয়(Prime Minister Office), ৰাষ্ট্ৰীয় অনুসূচিত জাতি আয়োগে অসমৰ মুখ্য সচিবক তদন্ত কৰি প্ৰতিবেদন ৰাজহুৱা কৰিবলৈ নিৰ্দেশ দিছিল যদিও বৰ্তমানলৈকে তদন্ত নাই কৰা বুলি অভিযোগ উত্থাপন কৰিছে অনুসূচিত জাতি সংগ্ৰামী যুৱ পৰিষদে ৷
শনিবাৰে সংগঠনটোৱে অসমৰ মুখ্যমন্ত্ৰীক স্মাৰক পত্ৰ প্ৰদান কৰি ১৪০ কোটি টকীয়া দুৰ্নীতিৰ তদন্ত এগৰাকী অৱসৰপ্ৰাপ্ত ন্যায়াধীশৰ নেতৃত্বত কৰিবলৈ দাবী উত্থাপন কৰিছে ৷ অনুসূচিত জাতি সংগ্ৰামী যুৱ পৰিষদৰ সভাপতি সঞ্জীৱ দাস আৰু সাধাৰণ সম্পাদক লক্ষ্যজ্যোতি হাজৰিকাই দুৰ্নীতিৰ সঠিক তদন্ত নোহোৱাত তীব্ৰ ক্ষোভ ব্যক্ত কৰি কয় যে দ্বিতীয়বাৰৰ বাবে আমি মুখ্যমন্ত্ৰী হিমন্ত বিশ্ব শৰ্মা(Assam CM Himanta Biswa Sarma) আৰু সামাজিক ন্যায় আৰু সবলীকৰণ বিভাগৰ আয়ুক্ত সচিবক স্মাৰক পত্ৰ প্ৰদান কৰিছো ৷ শেষৰবাৰ ৰাজ্য চৰকাৰৰ মুৰব্বীক স্মাৰক পত্ৰ প্ৰদান কৰিছো ৷ যদি দুৰ্নীতিৰ তদন্ত কৰে কৰক ৷ অন্যথাই জংগী আন্দোলন কৰিবলৈ আমি সাজু হৈছো ৷
স্মাৰক পত্ৰযোগে সংগঠনটোৱে মুখ্যমন্ত্ৰীক কয় যে ৰাজ্য চৰকাৰৰ সামাজিক ন্যায় আৰু সবলীকৰণ বিভাগ আৰু অনুসূচিত জাতি কল্যাণ সঞ্চালকালয়ে(Assam SC Welfare Department) ২০২২-২৩ বৰ্ষত আঁচনি যুগুত কৰি অনুসূচিত জাতিৰ হিতাধিকাৰীক একোটাকৈ টিভি, টিভি থবলৈ প্লাষ্টিকৰ চেবুল-চকী, প্লাষ্টিকৰ মগ, বাল্টি, প্লাষ্টিকৰ কণ্টেইনাৰ, গেছৰ চৌকা, প্ৰেচাৰ কুকাৰ দিয়াৰ ব্যৱস্থা কৰিছিল ৷ টিভি আৰু পাকঘৰৰ সামগ্ৰী প্ৰদানৰ নামত ১৪০ কোটি টকা আৱণ্টন দিয়া বুলি অৱগত ৷ ঠিকা লাভ কৰিছিল বিতৰ্কিত ঠিকাদাৰ নুপূৰ চাহাই ৷ কিন্তু সামগ্ৰী বিতৰণৰ নামত বৃহৎ অনিয়ম হোৱা প্ৰত্যক্ষ কৰি বিভিন্ন কৰ্তৃপক্ষক অৱগত কৰিছিলো ৷ কিন্তু আজিলৈ উচ্চ পৰ্যায়ৰ তদন্ত কৰা নহ’ল ৷ হিতাধিকাৰীক দিয়া প্লাষ্টিকৰ চকীসমূহ ইমানে পাতল যে মানুহে বহিবই নোৱাৰে ৷ টেবুলখনৰো অৱস্থা একেই ৷ পাকঘৰৰ সামগ্ৰীসমূহ যেনে প্লাষ্টিকৰ মগ, বাল্টি, প্লাষ্টিকৰ কণ্টেইনাৰ, গেছৰ চৌকা, প্ৰেচাৰ কুকাৰ আদি প্ৰদান কৰা হৈছে ৷ টিভিসমূহো ব্ৰেণ্ডেড নহয় আৰু অত্যন্ত কম দামৰ ৷ বজাৰত ৬০০ টকাত লাভ কৰা প্ৰেচাৰ কুকাৰ কিনি ২৭০০ টকা দেখুৱাইছে ৷ ২৩ হাজাৰ টকীয়া টিভি ৫৯ হাজাৰ টকাত কিনা দেখুওৱা হৈছে ৷ এই সামগ্ৰীসমূহ নিম্ন মানদণ্ডৰ আৰু ব্যৱহাৰৰ অনুপযোগী ৷
মুখ্যমন্ত্ৰীক স্পষ্ট কৰি কয় যে, এই দুৰ্নীতিত জড়িত সঞ্চালিকা কুলশ্ৰী নাথ, সুবৰ্ণময় দেৱ আৰু প্ৰকল্প বিষয়া লিটন মিত্ৰ৷ অনুসূচিত জাতি কল্যাণ সঞ্চালকালয়ৰ কাৰ্যালয়টোৰ ত্ৰিমূৰ্তি কুলশ্ৰী নাথ, ষ্টেনোগ্রাফাৰ সুবৰ্ণময় দেৱ আৰু প্ৰকল্প বিষয়া লিটন মিত্ৰৰ বিৰুদ্ধে তদন্ত কৰক ৷ অনুসূচিত জাতি কল্যাণ সঞ্চালকালয় আৰু সামাজিক ন্যায় আৰু সবলীকৰণ বিভাগত সংঘটিত এই দুৰ্নীতিৰ তদন্ত কৰিবলৈ অৱসৰপ্ৰাপ্ত ন্যায়াধীশৰ নেতৃত্বত তদন্ত সমিতি গঠন কৰক৷ সুবৰ্ণময় দেৱ নামৰ ষ্টেনোগ্রাফাৰজন প্ৰায় ৫০ কোটি টকাৰ সম্পত্তিৰ গৰাকী ৷ নিবিদাৰ নিয়ন্ত্ৰণ আৰু ঠিকাদাৰ তেওঁৰ হাতত৷ সুবৰ্ণময় দেৱৰ বিৰুদ্ধে কেন্দ্ৰীয় তদন্তকাৰী সংস্থা, আয়কৰ বিভাগ আৰু অসমৰ চিআইডিৰ দ্বাৰা তদন্ত কৰা হওক ৷ প্ৰায় ৫০ হাজাৰ টকা দৰমহা পোৱা এজন লোকে কেইটামান বছৰৰ ভিতৰত ইমান সম্পত্তি গঢ়িলে কেনেকৈ ? আয়তকৈ তেওঁৰ সম্পত্তি অধিক ৷ সেয়েহে আয় বহিৰ্ভূত সম্পত্তিৰ তদন্ত কৰিবলৈ মুখ্যমন্ত্ৰীৰ অধীনত থকা সংস্থাক নিৰ্দেশ দিবলৈ আহ্বান জনাই অনুসূচিত জাতি সংগ্ৰামী যুৱ পৰিষদে ৷
লগতে অনুসূচিত জাতি কল্যাণ সঞ্চালকালয়ত ষ্টেনোগ্রাফাৰ পদৰ প্ৰয়োজনীয়তা নাই বুলি উল্লেখ কৰি সুবৰ্ণময় দেৱক শীঘ্ৰে ডেপুটেচনত অন্য কাৰ্যালয়লৈ বদলি কৰাৰ দাবী জনায় সংগঠনটোৱে ৷ লগতে অনুসূচিত জাতি কল্যাণ সঞ্চালকালয়ৰ কাৰ্যালয়ৰ অৰ্থনৈতিক পৰিসংখ্যা বিভাগৰ কৰ্মচাৰী লিটন মিত্ৰক শীঘ্ৰে নিজৰ বিভাগলৈ বদলি কৰিবলৈ মুখ্যমন্ত্ৰীক পুনৰবাৰ আহ্বান জনালে সংগঠনটোৱে ৷
লগতে পঢ়ক: গুৱাহাটী পৌৰ নিগমৰ পাঁচ নম্বৰ সংমণ্ডলৰ দুই অৱসৰী কৰ্মচাৰীক বিদায় সম্বৰ্দ্ধনা