দৈনন্দিন বাৰ্তাৰ সেৱা,শিলচৰ,৩০ অক্টোবৰ: নিশা কাছাৰ জিলাৰ উত্তৰ কৃষ্ণপুৰত সংঘটিত হৈছে এক ভয়ংকৰ ঘটনা ৷ কবৰস্থানৰ কবৰৰ পৰা মৃতদেহ তুলিবলৈ আহি ৰাইজৰ হাতত আটক হল এক ভণ্ড তান্ত্ৰিক ৷ (Hypocrite) ধৃত তান্ত্ৰিক গৰাকী কাছাৰৰ শিলডুবিৰ অজিব উদ্দিন । জানিব পৰা মতে, স্থানীয় ফখৰ উদ্দিন নামৰ এগৰাকী ব্যক্তিৰ ২৯ দিন পূৰ্বে মৃত্যু হৈছিল । মৃত্যুৰ পাছত লোক জনক অঞ্চলটোৰ কবৰস্থানত কবৰস্ত কৰা হৈছিল ৷
যোৱা নিশা ফখৰ উদ্দিনৰ পুত্ৰ কবৰস্থানৰ সম্মুখৰে যোৱাৰ সময়ত হঠাৎ প্ৰত্যক্ষ কৰে যে দুজন লোকে তেওঁৰ পিতৃৰ কবৰ খান্দি মৃতদেহ তুলাৰ চেষ্টা কৰি আছে । ঘটনা প্ৰত্যক্ষ কৰি যুবক জনে চিঞৰবাখৰ আৰম্ভ কৰিলে স্থানীয় লোক সকল উপস্থিত হয়। আৰু কবৰ খান্দি থকা দুজন লোকৰ মাজত এজন স্থানীয় লোকে আটক কৰে যদিও আনজন পলাই যাবলৈ সক্ষম হয় । আটক হোৱা লোক জনক ৰাইজে সোধপোছ কৰিলে তেওঁ জনায় যে তন্ত্ৰমন্ত্ৰৰ বাবে তেওঁলোকে কবৰৰ পৰা মৃতদেহ তুলিবলৈ আহিছিল। পলাই যোৱা তান্ত্ৰিক জনৰ নাম চাদ্দাম হুছেইন বুলি জনায় ধৃত তান্ত্ৰিক জনে। ইপিনে ভয়ংকৰ এই ঘটনাৰ পাছত উত্তেজিত একাংশ ৰাইজে লপাথপা দিয়ে ভণ্ড তান্ত্ৰিক জনক আৰক্ষীৰ হাতত গতাই দিয়ে। ঘটনা সন্দৰ্ভত শিলচৰ ৰাঙিৰখাৰি আৰক্ষী চকীত ৰুজু কৰা হৈছে গোচৰ। আনহাতে স্থানীয় ৰাইজৰ অভিযোগ যোৱা ১ বছৰ পূৰ্বে একেই কবৰস্থানৰ পৰা এগৰাকী মহিলাৰ মৃতদেহ কবৰৰ পৰা তুলি কোনো দুৰ্বৃত্তই মূৰ কাটি লৈ গৈছিল।