গুৱাহাটী, ৫ নৱেম্বৰঃ নৱ বৈষ্ণৱ ধৰ্মৰ প্ৰচাৰক, সাহিত্য-সংস্কৃতি আৰু সামাজিক ক্ষেত্ৰলৈ অনবদ্য অৱদান আগবঢ়াই যোৱা, অসম আৰু অসমীয়াক গৌৰৱান্বিত কৰা মহাপুৰুষ শ্ৰীমন্ত শঙ্কৰদেৱৰ(Mahapurusha Srimanta Sankardeva) উদাৰ মানৱতাবাদী, আধ্যাত্মিক দৰ্শনৰ আধাৰত প্ৰতিষ্ঠিত ভাৰতবৰ্ষৰ ধৰ্ম-সাহিত্য-সংস্কৃতিৰ সুবৃহৎ গণতান্ত্ৰিক অনুষ্ঠান শ্ৰীমন্ত শঙ্কৰদেৱ সংঘৰ তিতাবৰ জিলা শাখাৰ উদ্যোগত ৩ নৱেম্বৰত দিনজোৰা বৰ্ণাঢ্য কাৰ্যসূচীৰে মহাপুৰুষ শ্ৰীমন্ত শঙ্কৰদেৱ গুৰুজনাৰ(Gurujana) ৫৭৬সংখ্যক আবিৰ্ভাৱ মহোৎসৱ উদযাপন কৰা হয়।
শ্ৰীমন্ত শঙ্কৰদেৱ সংঘৰ(Srimanta Sankardeva Sangha) তিতাবৰ জিলা শাখাৰ অন্তৰ্ভূক্ত ২৬৩খন প্ৰাথমিক শাখা আৰু ১৩খন আঞ্চলিক শাখাত গুৰুজনাৰ আবিৰ্ভাৱ মহোৎসৱভাগী বিগত দুটা পষেকত পৃথকে পৃথকে উদযাপন কৰে।
পিছত তিতাবৰ নগৰৰ ন-আলিস্থিত ফল-ফুলেৰে প্ৰাকৃতিক সৌন্দৰ্য্যৰে সুশোভিত সংঘৰ(Mahapurush Madhabdev) তিতাবৰ জিলা শাখাৰ নামঘৰত জিলা ভিত্তিত উদযাপন কৰে গুৰুজনাৰ আবিৰ্ভাৱ মহোৎসৱ।
পুৱা তিতাবৰৰ চুঙীৰ কুঁহি কমল নাৰ্চাৰীৰ স্বত্বাধিকাৰ তথা প্ৰকৃতিপ্ৰেমী ধ্ৰুৱ কমল হাজৰিকা, সংঘৰ তিতাবৰ জিলা শাখাৰ প্ৰাক্তন সম্পাদক তুৱাকান্ত বৰা, নামঘৰ পৰিচালনা সমিতিৰ সভাপতি ফুলেন হাজৰিকা আৰু জিলা সদস্য ৰেৱ শইকীয়াই নামঘৰ আৰু ‘বৈষ্ণৱ পণ্ডিত সোণাৰাম চুতীয়া(Vaishnava Pandit Sonaram Chutia) বহুমুখী প্ৰকল্প’ৰ চৌহদত গছপুলি ৰোপণ, সংঘৰ তিতাবৰ জিলা শাখাৰ সভাপতি, বিশিষ্ট সমাজকৰ্মী সুশীল গগৈয়ে পতাকা উত্তোলন কৰে।
পিছত খ্যাতিসম্পন্ন বিশিষ্ট নামাচাৰ্য, বৈষ্ণৱ অৰুণ চন্দ্ৰ বৰাৰ পৰিচালনাৰে নাম-প্ৰসঙ্গ অনুষ্ঠিত হয়।
দুপৰীয়া সংঘৰ তিতাবৰ জিলা শাখাৰ শঙ্কৰী সংগীত বিদ্যালয়ৰ প্ৰশিক্ষক আৰু শিক্ষাৰ্থীসকলে দলীয় বৰগীত পৰিৱেশনেৰে শুভাৰম্ভ কৰা আৰু শ্ৰীমন্ত শঙ্কৰদেৱ সংঘৰ মূলৰ সদস্য বিজু কুমাৰ হাজৰিকা, চম্পা আৰান্ধৰা বৰা, মাধৱদেৱ বঁটাপ্ৰাপক ঘনকান্ত শইকীয়া, শৰণ সদস্য প্ৰেম গোৱালা প্ৰমুখ্যে বহুকেইগৰাকী বিশিষ্ট ব্যক্তিৰ উপস্থিতিত সঙ্ঘৰ তিতাবৰ জিলা শাখাৰ সভাপতি, বিশিষ্ট সমাজকৰ্মী তথা ধৰ্মপ্ৰাণ জ্যেষ্ঠ নাগৰিক সুশীল গগৈৰ সভাপতিত্বত অনুষ্ঠিত হোৱা মুকলি সভা উদ্বোধন কৰে সঙ্ঘৰ শৰণ সদস্য তথা শাস্ত্ৰজ্ঞ অজিত বৰাই।
বিশিষ্ট লেখক ডক্টৰ ধীৰেণ কলিতাই বাৰ্ষিক আলোচনী ‘অমৃত নিজৰা’ উন্মোচন কৰা সভাত চাৰি বছৰ বয়সৰ শিশু বক্তা অভিলাষা শইকীয়াৰ উপৰি অপ্ৰমেয় শইকীয়া, যুৱ বক্তা কল্যাণজ্যোতি শইকীয়া আৰু সঞ্জীৱ বৰাই ভাষণ প্ৰদান কৰে।
সংঘৰ তিতাবৰ জিলা শিশু, যুৱ আৰু আই-মাতৃ সমাৰোহৰ বিভিন্ন প্ৰতিযোগিতাত স্থান লাভ কৰা প্ৰতিযোগীসকলক পুৰস্কাৰ প্ৰদানৰ উপৰি শ্ৰীমন্ত শঙ্কৰদেৱ সংঘৰ একালৰ নিষ্ঠাবান সেৱক, ধৰ্মপ্ৰাণ গণেশ চাংমাই সোঁৱৰণত শ্ৰীমন্ত শঙ্কৰদেৱ সংঘৰ তিতাবৰ জিলা শাখাৰ অন্তৰ্গত কাকডোঙা সীমান্তৱৰ্তী আঞ্চলিক শাখাৰ সঙ্গী স্মৃতি ৰেখা চাংমাইয়ে আগবঢ়োৱা আৰ্ত সাহাৰ্য তিতাবৰ সমজিলাৰ তিনিটা পৰিয়াল ক্ৰমে নগাবাট শঙ্কৰদেৱ বিদ্যালয়ৰ বিৰাজ গগৈ, জালুকনিবাৰী আঞ্চলিক শাখাৰ পপী বৰা, আমগুৰি খৰিকটীয়া আঞ্চলিক শাখাৰ জুৰি বৰুৱাক প্ৰদান কৰে।
লগতে গীত-নৃত্য-বাদ্য পৰিৱেশন আৰু হৰিনামৰ ধ্বনিৰে মুখৰিত অনুষ্ঠানত সমগ্ৰ তিতাবৰ সমজিলাৰ অগণন ভকত-বৈষ্ণৱ, শ্ৰীমন্ত শঙ্কৰদেৱ গুৰুজনাৰ অনুগামী তথা বাপ, আই, যুৱ, শিশু, সেৱক-সেৱিকাৰ উপৰি শ্ৰীমন্ত শঙ্কৰদেৱ সংঘৰ বহুসংখ্যক শুভাকাঙ্খী লোকে লোকাৰণ্য হয় সঙ্ঘৰ তিতাবৰ জিলা শাখাৰ নামঘৰৰ লগতে বৈষ্ণৱ পণ্ডিত সোণাৰাম চুতীয়া বহুমুখী প্ৰকল্প’ৰ সুবিশাল চৌহদ।
ৰাতিলৈ সঙ্ঘৰ তিতাবৰ জিলা সেৱা বাহিনীৰ দ্বাৰা শঙ্কৰী সংগীত বিদ্যালয়ৰ শিক্ষাৰ্থী, সংস্কৃতি শাখা আৰু সেৱা বাহিনীৰ বাচকবনীয়া শিল্পীবৃন্দৰ গায়ন-বায়ন পৰিৱেশন আৰু বলিষ্ঠ অভিনয়ে শ্ৰীমন্ত শঙ্কৰদেৱ সংঘৰ তিতাবৰ জিলা শাখাৰ নামঘৰৰ পৱিত্ৰ মজিয়াত সমবেত হোৱা অগণন দৰ্শকক মুগ্ধ কৰে।
‘দৈনন্দিন বাৰ্তা’ৰ তিতাবৰৰ প্ৰতিবেদক প্ৰসেনজিৎ ৰাজখোৱাৰ প্ৰতিবেদন