গুৱাহাটী, ১২ নৱেম্বৰঃ পাৰ্বত্য জিলা পশ্চিম কাৰ্বি আংলঙৰ(West Karbi Anglong) বৈঠালাংছ’স্থিত ছেৰদিহুন আক্লাম ক্ষেত্ৰত আজি ভূমিপট্টা বিতৰণ কৰে কাৰ্বি পৰিষদৰ মুখ্য কাৰ্যবাহী সদস্য ড° তুলিৰাম ৰংহাঙে৷
জিলাখনৰ ১১২নং আমৰি বিধানসভা সমষ্টিৰ অন্তৰ্গত তথা দোৱাৰ আমলা পৰিষদীয় সমষ্টিৰ ছেৰদিহুন আক্লাম ক্ষেত্ৰত অনুষ্ঠিত কৰা এক ৰাজহুৱা সভাত বিনামূলীয়াকৈ ভূমিপট্টা(Free Land Patta) বিতৰণ কৰা হয়৷
সাংসদ অমৰছিং তিছ’ৰ উপস্থিতিত অনুসূচিত জনজাতি লোকৰ বাবে এই ভূমিপট্টা বিতৰণ কৰা হয়৷
১১২নং আমৰিত বিনামূলীয়া ভূমিপট্টা বিতৰণ তুলিৰাম ৰংহাঙৰ‘পুৰথিমি আকেমাং’ শীৰ্ষক অনুষ্ঠানৰ জৰিয়তে জিলাখনৰ দুটা বিধানসভা সমষ্টি ক্ৰমে ১১১নং ৰংখাং আৰু ১১২নং আমৰিৰ(Amri) বাবে সৰ্বমুঠ পোন্ধৰ হাজাৰ ভূমিপট্টা প্ৰথমাৱস্থাত বিতৰণ কৰা হ’ব বুলি প্ৰকাশ কৰে মুখ্য কাৰ্যবাহী তুলিৰাম ৰংহাঙে৷
তাৰোপৰি, ১৯৫১ চনৰ পূৰ্বে আহি কাৰ্বি আংলঙত বসবাস কৰি থকা প্ৰতিগৰাকী লোকেই ভূমিপট্টা পাব বুলি মন্তব্য কৰে৷
ইয়াৰ বাহিৰে কোনোলোকেই কাৰ্বি ভূমিত পট্টা নাপাব বুলিও জানিবলৈ দিয়ে৷ আজিৰ এই গুৰুত্বপূৰ্ণ অনুষ্ঠানটিত মুখ্য কাৰ্যবাহী তুলিৰাম ৰংহাঙৰ উপৰিও কাৰ্বি ৰজা লংছিং ৰংহাং, সাংসদ অমৰছিং তিছ’, পৰিষদৰ অধ্যক্ষ ৰাজু তিছ’, বিধায়ক ক্ৰমে ৰূপছিং টেৰন, দৰছিং ৰংহাং, বিদ্যাছিং ইংলেং, কাৰ্যবাহী সদস্য প্ৰভাত চন্দ্ৰ তাৰ’, ডি উফিং মাছলাই, ৰিতেশ ইংহি, লুনছিং তেৰন, পাৰিষদ ক্ৰমে লংবিছন বে’, হেদছিং ৰংফাৰ, অভিজিৎ ক্ৰ’, কাচে ৰংপিপি, তিলোত্তমা হাষ্ণু, জিলা আয়ুক্ত সাৰংগপাণি শৰ্মা, জিলা বিজেপিৰ সভাপতি ৰদীপ ৰংহাং, চৰকাৰী গাঁওবুঢ়াবৃন্দ, প্ৰাক্তন সাংসদ, বিধায়ক, পাৰিষদবৃন্দ, কাৰ্বি পৰিষদৰ বৰ্ডৰ অধ্যক্ষবৃন্দৰ লগতে দহসহস্ৰাধিক ৰাইজ উপস্থিত থাকে৷