অসমীয়া সংস্কৃতিৰ আপুৰুগীয়া সম্পদ অংকীয়া নাট, বৰগীত, সত্ৰীয়া নৃত্য, চালি নৃত্য, ঝুমুৰা নৃত্য, দশাৱতাৰ নৃত্যৰ চৰ্চা আৰু সাধনা, সংবৰ্ধন, সংৰক্ষণ আদিৰ লগতে পুৰণি পুথি-পাঁজিৰ বুৰঞ্জীৰ ভঁৰাল হৈছে অসমৰ সত্ৰ অনুষ্ঠান সমূহ। এই মন্তব্য বিশিষ্ট কবি -সাহিত্যিক, শিক্ষাবিদ তথা নগাঁও মহাবিদ্যালয়ৰ অৱসৰপ্ৰাপ্ত অধ্যক্ষ ড৹ শৰৎ বৰকটকীৰ।(satriya sanskriti diwas) যোৱা ১৫ নৱেম্বৰত “সদৌ নগাঁও জিলা সত্ৰ মহাসভা”ৰ উদ্যোগত পুৰণিগুদাম তেলীয়াগাওঁস্থিত ঐতিহ্যমণ্ডিত শ্ৰী শ্ৰীব্ৰহ্মচাৰী সত্ৰত অনুষ্ঠিত সত্ৰীয়া সংস্কৃতি দিৱস উপলক্ষে অনুষ্ঠিত হোৱা মুকলি সভা ও সম্বৰ্দ্ধনা অনুষ্ঠানত মুখ্য অতিথি হিচাপে অংশগ্রহণ কৰি ড৹ বৰকটকীয়ে কয় যে “সদৌ অসম সত্ৰ মহাসভা”ই সত্ৰীয়া কলা-সংস্কৃতিৰ লগতে গুৰুজনাৰ সৃষ্টি আদৰ্শ কৰ্মৰাজিক বিশ্বৰ দৰবাৰত প্ৰতিষ্ঠা কৰাৰ ক্ষেত্ৰত যি পদক্ষেপ গ্ৰহণ কৰিছে সেয়া সঁচাকৈয়ে প্ৰশংসনীয়।(Satriya culture practitioners honoured)
মহাপুৰুষ শংকৰদেৱ আৰু মাধৱদেৱে অসমত নৱবৈষ্ণৱ ধৰ্মৰ প্ৰসাৰ আৰু প্ৰচাৰৰ লগতে সত্ৰসমূহৰ জৰিয়তে নৈতিক, সামাজিক মূল্যবোধৰ ভেটি স্থাপন কৰি থৈ গৈছে। মহাপুৰুষ শ্ৰীমন্ত শংকৰদেৱ প্ৰতিজন অসমীয়াৰ বাবে চিৰকাললৈ অফুৰন্ত প্ৰেৰণাৰ উৎস হৈ থাকিব। ভাষণ প্ৰসংগত ড৹ বৰকটকীয়ে সত্ৰীয়া কলা-সংস্কৃতিৰ প্ৰচাৰ-প্ৰসাৰ, বিকাশৰ লগতে গুৰুজনাৰ সৃষ্টি আদৰ্শ আৰু কৰ্মৰাজিক বিশ্বৰ দৰবাৰত প্ৰতিষ্ঠা কৰাৰ ক্ষেত্ৰত গ্ৰহণ কৰা ভূমিকাৰ বাবে নগাঁও মহাবিদ্যালয়ৰ এসময়ৰ ছাত্ৰ “সদৌ অসম সত্ৰ মহাসভা”ৰ প্ৰধান সম্পাদক তথা নগাঁও জিলাৰ শ্ৰীশ্ৰীজগৰাল সত্ৰৰ সত্ৰাধিকাৰ প্ৰান্তিক গোস্বামীক ভূমিকাক ভূয়সী প্ৰশংসা কৰে। বিশিষ্ট সমাজকৰ্মী দয়াৰাম কলিতাৰ সভাপতিত্বত অনুষ্ঠিত উক্ত সভাত বিশিষ্ট অতিথি হিচাপে অংশগ্রহণ কৰি চামগুৰি মহাবিদ্যালয়ৰ অধ্যক্ষ তথা সাহিত্যিক ইন্দ্ৰজিত বেজবৰুৱাই কয় যে যুগৰ লগত মিলিবলৈ সত্ৰীয়া সমাজে আত্মবিশ্লেষণ কৰাৰ প্ৰয়োজন। তেওঁ অসমীয়া সংস্কৃতিক লৈ অসমীয়া সমাজে গৌৰৱবোধ কৰা উচিত বুলিও তেওঁ মন্তব্য কৰে।(nagaon)
“সদৌ নগাঁও জিলা সত্ৰ মহাসভা”ৰ সম্পাদক প্ৰদীপ শইকীয়া আৰু সহকাৰী সম্পাদক ললিত ফুকনে যুটীয়াভাৱে আঁত ধৰা সভাখনত সত্ৰীয়া সংগীত শিল্পী দক্ষিণা কাশ্যপে পৰিবেশন কৰা বৰগীত আৰু দৰ্শনা হাজৰিকাৰ সত্ৰীয়া নৃত্যই উপস্থিত জনতাক মন্ত্ৰমুগ্ধ কৰি তোলে। সভাত দিহানাম পৰিবেশন কৰে ব্ৰহ্মচাৰী সত্ৰৰ মহিলা শিল্পীসকলে । উক্ত সভাতে সত্ৰীয়া কলা-সংস্কৃতি তথা গুৰুজনাৰ সৃষ্টি আদৰ্শ আৰু কৰ্মৰাজিৰ প্ৰচাৰ, প্ৰসাৰ তথা বিকাশৰ ক্ষেত্ৰত প্ৰভূত বৰঙণি আগবঢ়োৱা নগাঁও জিলাৰ জাজৰীৰ শ্ৰীশ্ৰী বাঘমৰা বজালবাৰী সত্ৰৰ সত্ৰাধিকাৰ লাৰুধন গোস্বামী, নগাঁও জিলাৰ ৰহাৰ সাহিত্যিক, অসম সাহিত্য সভাৰ সাংগঠনিক সম্পাদক বিনু লস্কৰ ঠাকুৰীয়া, বঢ়মপুৰৰ বিশিষ্ট সমাজকৰ্মী দয়াৰাম কলিতা আৰু চামগুৰিৰ শিল্পীৰ কেকোৰাচুকৰ বিশিষ্ট সমাজকৰ্মী প্ৰবীণ বৰাক সম্বৰ্দ্ধনা জনোৱা হয়।
ইয়াৰ পূৰ্বে পুৱাৰ ভাগত “সদৌ অসম সত্ৰ মহাসভা”ৰ পতাকা উত্তোলন কৰে সদৌ নগাঁও জিলা সত্ৰ মহাসভা”ৰ সভাপতি তথা শ্ৰীশ্ৰী ব্ৰহ্মচাৰী সত্ৰৰ সত্ৰাধিকাৰ জনাৰ্দন গোস্বামীয়ে। নামপ্ৰসংগতো নামাচাৰ্য হিচাপে অংশগ্ৰহণ কৰে সত্ৰাধিকাৰ জনাৰ্দন গোস্বামীয়ে । বৰ্ণাঢ্য কাৰ্য্যসূচীৰ মাজেৰে সত্ৰীয়া সংস্কৃতি দিৱসটি সামৰণি পৰে l