গুৱাহাটী, ১৮ নৱেম্বৰঃ কামপুৰত চতুৰ্থবাৰৰ বাবে অনুষ্ঠিত হোৱা কামপুৰ গ্ৰন্থ উৎসৱৰ(Kampur Book Festival 2024) দেওবাৰে সফলতাৰে সামৰণি পৰে।
কামপুৰ নিউজ নেটৱৰ্কৰ সপ্তম বাৰ্ষিক প্ৰতিষ্ঠা দিৱস উপলক্ষে কমল-কিৰণ গ্ৰন্থালয় আৰু গ্ৰন্থপ্ৰেমীৰ সহযোগত ১৪ নৱেম্বৰৰ পৰা অনুষ্ঠিত হোৱা গ্ৰন্থ উৎসৱৰ প্ৰথম কাৰ্যসূচী শ্বহীদ বেদীৰ সন্মুখত বন্তি প্ৰজ্বলন কৰে কামপুৰৰ জ্যেষ্ঠ সাংবাদিক সভাৰাম মজুমদাৰে।
তাৰ পাছতেই বিষ্ণুৰাভা দেৱৰ প্ৰতিমূৰ্তিৰ সন্মুখত বন্তি প্ৰজ্বলন কৰে কামপুৰ আঞ্চলিক কবি সন্মিলনৰ সভাপতি গুণ কাকতীয়ে। গ্ৰন্থ উৎসৱৰ দ্বাৰ মুকলি কৰে নগাঁও জিলা সাহিত্য সভাৰ সভাপতি থগিত মহন্তই। দ্বাৰ মুকলি কৰি জিলা সাহিত্য সভাৰ সভাপতি গৰাকীয়ে কয় যে-” গ্ৰন্থ অধ্যয়নে মানুহক জ্ঞানী কৰি তোলে। গ্ৰন্থ অধ্যয়ন নিয়মীয়াকৈ কৰিব লাগে। গ্ৰন্থ হৈছে মানুহৰ প্ৰকৃত বন্ধু”।
বিশিষ্ট অতিথি হিচাপে উপস্থিত থাকি লেখিকা বিণু লস্কৰ ঠাকুৰীয়ই কয় যে- “কামপুৰ নিউজ নেটৱৰ্ক আৰু কমল-কিৰণ গ্ৰন্থালয়ে গ্ৰন্থ উৎসৱ পালন কৰি কামপুৰত গ্ৰন্থ অধ্যয়নৰ এক সুস্থ পৰিৱেশ সৃষ্টি কৰিছে।
গ্ৰন্থ উৎসৱৰ দৰে অনুষ্ঠানে গ্ৰাম্যাঞ্চলত ভাষা-সাহিত্যৰ ভৰাল সমৃদ্ধ কৰিব”। যুৱ লেখক ৰাজু সমীৰণে আঁত ধৰা গ্ৰন্থ উৎসৱৰ দ্বাৰ মুকলি অনুষ্ঠানত উপস্থিত থাকে নগাঁও জিলা সাহিত্য সভাৰ সম্পাদক ৰেৱত কুমাৰ হাজৰিকা, সদৌ অসম কবি সন্মিলনৰ মুখপত্ৰ “নতুন কবিতা”ৰ প্ৰাক্তন সম্পাদক, বিশিষ্ট কবি মদাৰজ্যোতি,সদৌ অসম কবি সন্মিলনৰ সম্পাদক পৱন শৰ্মা, নগাঁও জিলা কবি সন্মিলনৰ প্ৰাক্তন সভাপতি দ্বিজেন্দ্ৰ নাথ হাজৰিকা, জিলা কবি সন্মিলনৰ সভাপতি দূৰ্গেশ্বৰ বৰকটকী, সম্পাদক দীপজ্যোতি কাকতি, কামপুৰ শাখা সাহিত্য সভাৰ সভাপতি লক্ষীকান্ত নাথ, উপ-সভাপতি ত্ৰিদিৱ লস্কৰ, সম্পাদক শৰৎ চন্দ্ৰ গোস্বামী, বিশিষ্ট লেখক মোলান লস্কৰ, জ্যেষ্ঠ সাংবাদিক নলিনী বৰঠাকুৰ,ধৰণী শইকীয়া,প্ৰমোদ বৰা,কামপুৰৰ জ্যেষ্ঠ নাগৰিক, শিক্ষাবিদ সুধাময় দাস,সমাজকৰ্মী প্ৰমোদ লস্কৰ,মতিউৰ ৰহমান,দেউতি বৰা,যতীন বৰা, কবি অশোকৰাম ভট্টাচাৰ্যকে প্ৰমূখ্য কৰি কেবাগৰাকী বিশিষ্ট ব্যক্তি।
অনুষ্ঠানত উপস্থিত থাকে কামপুৰ লেখিকা সমিতিৰ বিষয়ববীয়াকে ধৰি সদস্যা সকল। ১৬ নৱেম্বৰত ছাত্ৰ-ছাত্ৰীৰ বৌদ্ধিক বিকাশৰ বাবে কুইজ,কবিতা আবৃত্তি, আকস্মিক বক্তৃতা প্ৰতিযোগিতা অনুষ্ঠিত হয়। প্ৰতিযোগিতাত শতাধিক ছাত্ৰ-ছাত্ৰীয়ে অংশ গ্ৰহণ কৰে। বিজয়ী প্ৰতিযোগীসকলক মানপত্ৰ আৰু গ্ৰন্থ প্ৰদান কৰে উদযাপন সমিতিয়ে।
গ্ৰন্থ উৎসৱত অংশ লয় প্ৰিয়দৰ্শিনী গ্ৰন্থ বিক্ৰেতা আৰু বনচাই প্ৰকাশনে। অনুষ্ঠানৰ সৰ্বদিশতে সহযোগিতা আগবঢ়োৱাৰ বাবে গ্ৰন্থপ্ৰেমী ৰাইজক কৃতজ্ঞতা জ্ঞাপন কৰিছে কামপুৰ গ্ৰন্থ উৎসৱ উদযাপন সমিতিয়ে।