গুৱাহাটী, ২২ নৱেম্বৰঃ প্ৰধানমন্ত্ৰী নৰেন্দ্ৰ মোদীৰ চৰকাৰে অসমীয়া ভাষাক ধ্ৰুপদী ভাষাৰ মৰ্যাদা প্ৰদান কৰাৰ আনন্দই(Victory Sculptures) ৰাজ্যবাসীক উল্লাসিত কৰি ৰখাৰ সময়তে অসমত হিমন্ত বিশ্ব শৰ্মা নেতৃত্বাধীন চৰকাৰখনে অনাদৃত ৰূপত পৰি থকা জনজাতীয় কলা-সংস্কৃতি তথা ভাস্কৰ্যক এক নৱৰূপ প্ৰদান কৰাৰ অভিনৱ পদক্ষেপ গ্ৰহণ কৰিছে। সেই পদক্ষেপৰ বৃহস্পিতবাৰে সুন্দৰ প্ৰতিফলন ঘটিল অসম বিধানসভাৰ(Assam Assembly) বাকৰিত।
প্ৰধানমন্ত্ৰীয়ে অসমীয়াক দিলে ধ্ৰুপদী ভাষা স্বীকৃতিৰ উপহাৰ
অসম বিধানসভাৰ অধ্যক্ষ বিশ্বজিৎ দৈমাৰীৰ একান্ত প্ৰচেষ্টা তথা মুখ্যমন্ত্ৰী হিমন্ত বিশ্ব শৰ্মাৰ(CM Himanta Biswa Sharma) আন্তৰিক সদিচ্ছাৰ ফলশ্ৰুতিত আজি অসম বিধানসভাৰ প্ৰৱেশদ্বাৰত প্ৰাণ পাই উঠিল শতিকা প্ৰাচীন কছাৰী ৰাজত্বৰ বিজয় ভাস্কৰ্যই। অসম বিধানসভাৰ অধ্যক্ষ বিশ্বজিৎ দৈমাৰীৰ(Speaker Biswajit Daimari) উপস্থিতিত বৃহস্পতিবাৰে মুখ্যমন্ত্ৰী হিমন্ত বিশ্ব শৰ্মাই অসম বিধানসভাৰ প্ৰৱেশদ্বাৰত আনুষ্ঠানিকভাৱে উদ্বোধন কৰে কছাৰী সাম্ৰাজ্যৰ বিজয় ভাস্কৰ্য।
হিমন্ত বিশ্ব শৰ্মাৰ প্ৰচেষ্টাত জনজাতীয় ঐতিহ্যৰ পুনৰ উজ্জ্বীৱিতকৰণ
একেদৰে অসম বিধানসভাৰ আন্তঃগাঁথনিত নতুন আয়তন সংযোগ কৰি নিৰ্মাণ হোৱা আদেশ তথা নিয়ন্ত্ৰণ কক্ষ, অসম বিধানসভা নতুন ভৱনৰ কেফেটেৰীয়া, ডিজিটেল কৰিড’ৰ, স্মাৰ্ট খুঁটা আৰু প্ৰাচীন অসমৰ বালীয়া পাথৰৰ একক স্তম্ভৰ উদ্বোধন কৰে মুখ্যমন্ত্ৰী ড০ হিমন্ত বিশ্ব শৰ্মাই।
অসম বিধানসভাৰ আন্তগাঁথনিত কেইবাটাও গুৰুত্বপূৰ্ণ তথ্য-প্ৰযুক্তি সংক্ৰান্তীয় পদেপ, কেফেটেৰীয়া আৰু প্ৰাচীন অসমৰ বালিয়া পাথৰৰ একক স্তম্ভৰ উদ্বোধন কৰিলে মুখ্যমন্ত্ৰীয়ে
অসম বিধানসভা চৌহদত আয়োজিত সভাত ভাষণ প্ৰদান কৰি মুখ্যমন্ত্ৰী ড০ শৰ্মাই প্ৰাচীন অসমৰ কছাৰী ৰাজ্যৰ ঐতিহাসিক কীৰ্তিচিহ্নৰ স্বাক্ষৰ বহন কৰা নিখুঁতভাৱে তৈয়াৰী আৰু উৎকৃষ্ট ভাস্কৰ্য শিল্পৰ নিদৰ্শন স্বৰূপ মনলিথ বা শিলাস্তম্ভকে ধৰি তথ্য-প্ৰযুক্তি সংক্ৰান্তীয় পদক্ষেপেৰে অসম বিধানসভাক নৱৰূপ প্ৰদান কৰাৰ দিশত অসম বিধানসভাৰ অধ্যক্ষ বিশ্বজিৎ দৈমাৰী, উপাধ্যক্ষ ডাঃ নোমল মমিন আৰু বিধানসভাৰ সমূহ বিষয়া-কৰ্মচাৰীৰ ভূমিকাক শলাগ লৈ কয় যে অসম বিধানসভাই ডিজিটেল ৰূপান্তৰৰ যাত্ৰাত আজি এক সবল খোজ পেলাবলৈ সক্ষম হৈছে।
অসম বিধানসভাত সূচনা হ’ল ডিজিটেল ৰূপান্তৰৰ অন্য এক যাত্ৰাঃ মুখ্যমন্ত্ৰী
অসমৰ সাংস্কৃতিক দৃশ্যপটত জনজাতীয় লোকসকলৰ কলা-কৃষ্টি-সংস্কৃতিয়ে এক গুৰুত্বপূৰ্ণ স্থান দখল কৰি আহিছে বুলি মন্তব্য কৰি তেওঁ কয় যে অসমৰ গৌৰৱময় ইতিহাস ইয়াৰ প্ৰাণৱন্ত সাংস্কৃতিক প্ৰকাশভংগীৰ জৰিয়তে দৃশ্যমান হৈ আহিছে। এই সাংস্কৃতিক সমলসমূহৰ ভিতৰত প্ৰাচীন অসমৰ কছাৰী ৰাজ্যৰ কীৰ্তিচিহ্নসমূহৰ ধ্বংসাৱশেষে উত্তৰ-পূব ভাৰতৰ ইতিহাসত বিশিষ্ট ভূমিকা পালন কৰি আহিছে বুলিও তেওঁ কয়।
অসমৰ সাংস্কৃতিক দৃশ্যপটত জনজাতীয় লোকসকলৰ কলা-কৃষ্টি-সংস্কৃতিয়ে এক গুৰুত্বপূৰ্ণ স্থান দখল কৰিছেঃ মুখ্যমন্ত্ৰী
পুৰণি ইতিহাসৰ অধ্যয়ন তথা ৰাজ্য চৰকাৰৰ দ্বাৰা ইতিহাস, সংস্কৃতি উদ্ধাৰৰ দিশত কৰা অবিৰত প্ৰয়াসে জাতিটোক এক ঐতিহ্যবান আৰু সংস্কৃতিবান জাতিলৈ পৰিৱৰ্তন কৰিবঃ মুখ্যমন্ত্ৰী
শিল্প আৰু স্থাপত্যৰ প্ৰতি কছাৰী ৰজাসকলৰ আগ্ৰহ আৰু প্ৰচেষ্টা এই কীৰ্তিচিহ্নবোৰে প্ৰকাশ কৰে বুলি উল্লেখ কৰি তেওঁ কয় যে অঞ্চলটোৰ অন্যতম পুৰণি ৰাজ্য বুলি গণ্য কৰা কছাৰী ৰাজ্যৰ শিপা সমগ্ৰ উত্তৰ-পূব ভাৰততে বিয়পি আছিল আৰু বৰ্তমানৰ নাগালেণ্ডৰ ডিমাপুৰ খ্ৰীষ্টীয় দশম-ত্ৰয়োদশ শতিকাৰ সময়ছোৱাত কছাৰী ৰাজ্যৰ ৰাজধানী আছিল।
মুখ্যমন্ত্ৰীয়ে কয় যে পৰৱৰ্তী সময়ত কছাৰী ৰাজ্যৰ ৰাজধানী ডিমাপুৰৰ পৰা মাইবঙলৈ(Maibong) স্থানান্তৰিত হৈছিল। তেওঁ লগতে কয় যে ডিমাপুৰত থকা কছাৰী ৰাজ্যৰ স্থাপত্য, নিখুঁত ভাস্কৰ্য শিল্পৰ অপূৰ্ব চানেকি। সম্প্ৰতি ধ্বংসাৱশেষ হিচাপে অৱশিষ্ট হৈ ৰোৱা ৰাজবাৰী পূৰ্বতে তিনিখন দেৱাল আৰু ধনশিৰি নদীৰে সুৰক্ষিত আছিল আৰু বৰ্তমান দেৱাল তিনিখনৰ অস্তিত্ব নাই যদিও ৰাজবাৰীৰ পূব দিশৰ প্ৰৱেশ পথে এতিয়া ডিমাপুৰৰ ঐতিহাসিক তাৎপৰ্য প্ৰতিফলিত কৰি আহিছে বুলি তেওঁ মন্তব্য কৰে।
মুখ্যমন্ত্ৰীয়ে কয় যে কছাৰী ৰাজ্যৰ ধ্বংসাৱশেষত তিনিটা সমান্তৰাল শাৰীত প্ৰায় এশটা শিলৰ খুঁটা আছে। এই মনলিথ বা একক শিলৰ স্তম্ভবোৰ বালিচহীয়া শিলৰ পৰা খোদিত কৰা হৈছে। বুৰঞ্জীবিদৰ কথা উল্লেখ কৰি তেওঁ কয় যে এই শিলাস্তম্ভবোৰ মহাদেৱ শিৱৰ সন্মানত নিৰ্মাণ কৰা হৈছিল। ৰাজবাৰী আছিল বিশিষ্ট কছাৰী ব্যক্তিসকলৰ সমাধিস্থল।
বুৰঞ্জীবিদসকলে ভিন্ন আখ্যান আগবঢ়ালেও এই একক শিল্পকলাক কছাৰী ৰাজ্যৰ বিজয় কীৰ্তিচিহ্ন হিচাপে গণ্য কৰা হয় বুলি মন্তব্য কৰি তেওঁ কয় যে ডিমাপুৰৰ কছাৰী ৰাজ্যৰ ধ্বংসাৱশেষে খ্ৰীষ্টীয় দশম শতিকাৰ ইতিহাসৰ এক গুৰুত্বপূৰ্ণ সময়ছোৱাৰ প্ৰতিফলন ঘটায়। মুখ্যমন্ত্ৰীয়ে কয় যে একক শিলাখণ্ডত খোদিত আকৃতি আৰু আৰ্হিবোৰে কছাৰী ৰজাসকলৰ তীক্ষ্ন কলাত্মক আগ্ৰহ চিত্ৰিত কৰিছে আৰু সম্প্ৰতি এই কালজয়ী গাঁথনিবোৰ উত্তৰ-পূব ভাৰতৰ গৌৰৱময় অতীতৰ সাক্ষী হিচাপে থিয় দিছে।
অসম বিধানসভাৰ মজিয়াত এই মনলিথৰ প্ৰতিৰূপ উন্মোচন কৰিবলৈ পাই তেওঁ আনন্দিত হৈছে বুলি মন্তব্য কৰি কয় যে এই পদক্ষেপে জনজাতীয় কৃষ্টি-সংস্কৃতি আৰু ঐতিহ্যৰ সংৰক্ষণ তথা প্ৰসাৰ সাধনৰ দিশত এক অতি গুৰুত্বপূৰ্ণ পদক্ষেপ হিচাপে সদায়ে চিহ্নিত হৈ ৰ’ব। তেওঁ লগতে কয় যে জনজাতীয় কৃষ্টি-সংস্কৃতিৰ সংৰক্ষণৰ বাবে ৰাজ্য চৰকাৰে নিৰন্তৰ প্ৰয়াস চলাই আহিছে।
গুৱাহাটীৰ হেঙেৰাবাৰীত নিৰ্মাণ কৰা অমৃত উদ্যানত অসমৰ মহান জনজাতীয় স্বাধীনতা সংগ্ৰামী ডিমাচা জাতিৰ স্বাভিমান সম্বোধন ফংলোৰ উপৰি উত্তৰ-পূৰ্বাঞ্চলৰ জনজাতীয় সমাজৰ আন ৭গৰাকী স্বনামধন্য স্বাধীনতা সংগ্ৰামী নাগালেণ্ডৰ ৰাণী গাইডিলু, মণিপুৰৰ বীৰ টিকেন্দ্ৰজিৎ সিং, ত্ৰিপুৰাৰ বিদ্ৰোহী ৰতনমণি ৰিয়াং, ছিক্কিমৰ হেলেন লেপছা, মেঘালয়ৰ ইউ তিৰৎ সিং চিয়েম, মিজোৰামৰ ৰাণী ৰপুইলিয়ানী, অৰুণাচল প্ৰদেশৰ মজে ৰিবাৰ প্ৰতিমূৰ্তি স্থাপন কৰা হৈছে।
তেওঁ লগতে কয় যে জনজাতীয় সংস্কৃতি, পৰম্পৰা আৰু ধৰ্মীয় বিশ্বাসৰ সংৰক্ষণ তথা প্ৰসাৰৰ দিশত কাম কৰিবলৈ অসম চৰকাৰে ৰাজ্যত প্ৰথমবাৰৰ বাবে খিলঞ্জীয়া আৰু জনজাতীয় বিশ্বাস আৰু সংস্কৃতি বিভাগ স্থাপন কৰিছে। মুখ্যমন্ত্ৰীয়ে কয় যে আজি বিধানসভাত ডিজিটেল কৰ্মৰাজিৰ পৰা ৰাজ্যখনৰ বৰ্ণাঢ্য ঐতিহ্যৰ স্বাক্ষৰ স্থাপনৰ দ্বাৰা, পৰম্পৰা আৰু আধুনিকতা তথা ঐতিহ্য বহন কৰা এক প্ৰচেষ্টা চলোৱা হৈছে।
তেওঁ কয় যে এনে ধৰণৰ ব্যৱস্থাসমূহে অসমৰ পুৰণি ইতিহাস অৱলোকন কৰিবলৈ সকলোকে প্ৰেৰণা যোগাব। পুৰণি ইতিহাসৰ অধ্যয়ন তথা ৰাজ্য চৰকাৰৰ দ্বাৰা ইতিহাস, সংস্কৃতি উদ্ধাৰৰ দিশত কৰা অবিৰত প্ৰয়াসে জাতিটোক এক ঐতিহ্যবান আৰু সংস্কৃতিবান জাতিলৈ পৰিৱৰ্তন কৰি বুলিও মুখ্যমন্ত্ৰীয়ে কয়।
তেওঁ লগতে মন্তব্য কৰে যে চতুৰ্দশ শতিকাতে অসমীয়া ভাষাৰ আৰম্ভণি সম্পৰ্কে ৰাজ্য চৰকাৰে দাখিল কৰা তথ্যসমৃদ্ধ দলিলৰ পৰিপ্ৰেক্ষিততে প্ৰধানমন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে অসমীয়া ভাষাক ধ্ৰুপদী ভাষাৰ মৰ্যাদা প্ৰদান কৰি যি সন্মান আগবঢ়ালে সিয়ে ৰাজ্য চৰকাৰৰ সমগ্ৰ প্ৰচেষ্টাৱলীক আৰু এখোজ আগলৈ লৈ গ’ল। তেওঁ কয় যে এই সময়ছোৱাৰ ভিতৰতে চৰাইদেউ মৈদামক বিশ্ব ঐতিহ্যলৈ লৈ যোৱাটো সম্ভৱ হৈ উঠিল।
তেনেদৰে অসমৰ বিহুৱে নতুন ৰূপত বিশ্ব দৰবাৰত পৰিচিতি লাভ কৰিলে। ইয়াৰ উপৰি ঝুমুৰ নৃত্যকো আন্তঃৰাষ্ট্ৰীয় পৰ্যায়লৈ লৈ যাবলৈ ৰাজ্য চৰকাৰে বিশেষ পদক্ষেপ গ্ৰহণ কৰিব বুলিও তেওঁ কয়। এনেধৰণৰ প্ৰচেষ্টাসমূহে অসমক এখন সংস্কৃতিবান প্ৰদেশ আৰু অসমীয়াক এটা সংস্কৃতিবান জাতিলৈ ৰূপান্তৰ কৰিব বুলিও মুখ্যমন্ত্ৰীয়ে কয়।
এই অনুষ্ঠানত অসম বিধানসভাৰ অধ্যক্ষ বিশ্বজিৎ দৈমাৰী, সংসদীয় পৰিক্ৰমা আদি বিভাগৰ মন্ত্ৰী পীয়ূষ হাজৰিকা, শিক্ষা আদি বিভাগৰ মন্ত্ৰী ডাঃ ৰণোজ পেগু, ৰাজহ আৰু পুনৰ সংস্থাপন আদি বিভাগৰ মন্ত্ৰী যোগেন মহন, বস্ত্ৰ শিল্প আদি বিভাগৰ মন্ত্ৰী ইউ জি ব্ৰহ্ম, চাহ জনজাতি কল্যাণ আদি বিভাগৰ মন্ত্ৰী সঞ্জয় কিষাণ, শক্তি আদি বিভাগৰ মন্ত্ৰী নন্দিতা গাৰ্লোছা, অসম বিধানসভাৰ উপাধ্যক্ষ ডাঃ নোমল মমিন, বিটিআৰৰ অধ্যক্ষ কাতিৰাম বড়োৰ উপৰি কেইবাগৰাকীও বিধায়ক, অসম বিধানসভা সচিবালয়ৰ শীৰ্ষ বিষয়া আৰু গণ্য-মান্য ব্যক্তিসকল উপস্থিত থাকে।