গুৱাহাটী, ২৪ নৱেম্বৰঃ ২৪ বছৰীয়া দীৰ্ঘ বিৰতিৰ পাছত অৱশেষত চামগুৰিৰ(Samaguri) পৰা অৱসান ঘটিল ৰকিবুল হুছেইনৰ পৰিয়াল কেন্দ্ৰিক ৰাজনীতিৰ(Family-centric politics)।
২০০১ চনৰ পৰা চামগুৰিৰ কংগ্ৰেছী বিধায়ক হিচাপে নিৰ্বাচিত হৈ অহা ৰকিবুল হুছেইনে চামগুৰি সমষ্টিবাসী ৰাইজলৈ পিঠি দি ২০২৪ চনৰ লোকসভা নিৰ্বাচনত ধুবুৰী লোকসভা সমষ্টিৰ পৰা প্ৰতিদ্বন্দিতা কৰি দহ লাখ ভোটৰ ব্যৱধানত জয়লাভ কৰিছিল৷(BJP)
হুছেইনে লোকসভালৈ নিৰ্বাচিত হোৱাৰ পিছত চামগুৰি সমষ্টিৰ খালি হোৱা আসনখনৰ বাবে নিজৰ পুত্ৰক উপ নিৰ্বাচনত প্ৰতিদ্বন্দিতা কৰাই চামগুৰিত ৰকিবুলৰ পিতৃৰ দিনৰ পৰা চলি অহা পৰিয়াল কেন্দ্ৰিক ৰাজনীতিৰ পুনৰবাৰ প্ৰতিষ্ঠা কৰিবলৈ চেষ্টা কৰিছিল।
ৰাজনীতিৰ অ আ ক খ নজনা পুত্ৰ তাঞ্জিল হুছেইনক চামগুৰিৰ উপ-নিৰ্বাচনত প্ৰতিদ্বন্দিতা কৰাই পুত্ৰক বিধান সভালৈ পঠাই চামগুৰি আসনখন নিজৰ পুত্ৰৰ বাবে সংৰক্ষিত কৰিব বিচাৰিছিল।
চামগুৰি সমষ্টিটো পুনৰ নিৰ্ধাৰণ হোৱাৰ পিছটো উপ-নিৰ্বাচন হোৱাৰ বাবে পুৰণি সমষ্টিৰ মতেই নিৰ্বাচন অনুষ্ঠিত হৈছিল।ৰাজনীতিত নিজৰ পৰিয়ালৰ কথা চিন্তা কৰি অহা ৰকিবুলে সমষ্টিৰ সহজ সৰল সংখ্যালঘু ৰাইজৰ কান্ধত বন্দুক থৈ নিৰ্বাচনী বৈতৰনী পাৰ কৰিছিল। ভয়, ভাবুকি, গুণ্ডাগিৰিৰ বাবে চামগুৰিৰ ভোটাৰ ৰাইজে মুকলিকৈ আন দলক সমৰ্থন আগবঢ়াব পৰা নাছিল।
বিগত নিৰ্বাচন সমূহত জয়লাভ কৰাৰ পিছতে যিসকলে আন দলক সৰ্মথন কৰিছিল তেওঁলোকক বিভিন্ন ধৰণে ৰকিবুলৰ গুণ্ডা বাহিনীয়ে হাৰাশাস্তি কৰি আহিছিল। ৰকিবুলৰ ভেৰোণীয়া গুণ্ডাই নিৰ্বাচনৰ পিছতে আন দলৰ সমৰ্থকৰ ঘৰৰ টিঙ খুলি নিয়া, খেতিৰ ধান কাটি নিয়া, দম কল উঠাই নিয়া, ঘৰলৈ শিলগুটি দলিওৱা আদি কাৰ্য্য সংঘটিত কৰাৰ গুৰুতৰ অভিযোগ উত্থাপন হৈ আহিছিল।
অতি ভিতৰুৱা অঞ্চলত বসবাস কৰা সংখ্যালঘূ ৰাইজে এনে ধৰণৰ সন্ত্ৰাসৰ বাবে মুকলিকৈ আন দলক সমৰ্থন কৰিব পৰা নাছিল। যাৰ সুবিধা ৰকিবুল বাহিনীয়ে লৈ আহিছিল। বৰ্তমান সময়ত ৰকিবুল বাহিনীৰ এই গুণ্ডাৰাজৰ অৱসান ঘটাবলৈ সংখ্যালঘু ৰাইজৰ লগতে আন লোক সকলেও উপ নিৰ্বাচনটোক মুল অস্ত্ৰ হিচাপে লৈছিল।
ৰকিবুলৰ পৰিয়াল কেন্দ্ৰিক শাসনৰ অৱসান ঘটাবলৈ বিজেপিৰ প্ৰাৰ্থী দিপ্লুৰঞ্জন শৰ্মাক সংখ্যা লঘু ৰাইজেও মুকলি সৰ্মথন জনাইছিল। শিক্ষিত তথা এজন দক্ষ নেতা দিপ্লুৰঞ্জনক পাই চামগুৰি বাসীয়ে দম্ভ, অহংকাৰী ৰকিবুল হুছেইনক এসেকা দিয়া আৰু পৰিয়াল কেন্দ্ৰিক ৰাজনীতিক অৱসান ঘটাবলৈ দিপ্লুৰঞ্জনক বিপুল ভোটেৰে কৰালে জয়লাভ।
সাধাৰণতে সংখ্যালঘু ৰাইজে বিজেপি দলক সমৰ্থন নকৰে বুলি ভবা যায় বা সচেতন মহলে ক’ব খোজে যদিও চামগুৰিৰ সংখ্যা লঘু ৰাইজ তাৰ ব্যতিক্ৰম হোৱা দেখা গ’ল। সংখ্যালঘু ভোটাৰৰ মাজৰ পৰা বিজেপিৰ প্ৰাৰ্থী গৰাকীয়ে ৪২ শতাংশৰো অধিক ভোট লাভ কৰিবলৈ সক্ষম হ’ল। যাৰ বাবে সংখ্যালঘু ভোটাৰে নিৰ্ণায়ক ভূমিকা পালন কৰা চামগুৰি সমষ্টিত প্ৰথমবাৰৰ বাবে এইবাৰ পদুম ফুলিল।
চামগুৰিৰ উপ নিৰ্বাচনৰ এই ফলাফলে আগন্তুক ২০২৬ চনৰ বিধানসভা নিৰ্বাচনত প্ৰভাৱ পেলাব বুলি ৰাজনৈতিক মহলে মন্তব্য কৰিছে।
উল্লেখ্য, উপ-নিৰ্বাচনৰ দিন ঘোষণা হোৱাৰ পূৰ্বেই সমষ্টিটোত চামগুৰিৰ কাষৰীয়া সমষ্টিৰ বিধায়ক জিতু গোস্বামী, সদৰ সমষ্টি বিধায়ক ৰূপক শৰ্মা, অগপৰ নগাঁও জিলা সভাপতি মণিমাধৱ মহন্ত, নগাঁও জিলা বিজেপিৰ সভাপতি অভিজিত নাথ, কলিয়াবৰ জিলা বিজেপিৰ সভাপতি বাবুল বৰাকে ধৰি অগপ আৰু বিজেপিৰ নেতৃবৰ্গই চামগুৰি সমষ্টিটো বিজেপিৰ মিত্ৰজোঁটে লাভ ফলাফল পাবলৈ প্ৰচেষ্টা চলাইছিলো।
ইয়াৰ উপৰি বিধায়ক জিতু গোস্বামীয়ে বাট পথকে ধৰি বিভিন্ন উন্নয়ন মূলক কামেৰে ভোটাৰ ৰাইজৰ মাজত সোমাই পৰা বাবে নিৰ্বাচনৰ পূৰ্বৰে পৰা ভোটাৰৰ মন বিজেপি মুখী হ’বলৈ আৰম্ভ কৰে।
ইফালে নিৰ্বাচনত মন্ত্ৰী বিমল বৰা, কেশৱ মহন্ত, কেইবাজনো বিধায়ক, অগপ নেতা মণিমাধৱ মহন্ত, মুজিবুৰ ৰহমান, সুৰেশ বৰাকে ধৰি বিজেপিৰ নেতা-কৰ্মীসকলে ভোটাৰৰ মাজত সোমাই পৰি প্ৰচাৰ চলোৱাৰ বাবে বিজেপিৰ প্ৰাৰ্থী দিপ্লুৰঞ্জন শৰ্মা বিপুল ভোটত জয়লাভ কৰিবলৈ সক্ষম হয়।