নিউজ ডেস্কঃ কলোৱে জানে যে ৰাতিপুৱা কেঁচা হালধী নিয়মীয়াকৈ খালে ই শৰীৰক বহু উপকাৰ সাধন কৰে। বহুতেই খালী পেটত কেঁচা হালধী খায়, আৰু বহুতে গৰম পানীৰ লগত মিহলাই হালধীৰ গুড়ি খায়। ইপিনে হালধীৰ লগত জলকীয়া খোৱাৰ সুফল কেইবাগুণ বেছি বুলি জানিব পৰা গৈছে। আচলতে হালধী আৰু জলকীয়া, দুয়োটা শৰীৰৰ বাবে অতি উপকাৰী। কিন্তু পৃথকে পৃথকে খোৱাৰ পৰিৱৰ্তে এই দুই উপকৰণক একেলগে খোৱা দেখা যায় বহুতকে।
হালধীত কাৰকুমিন নামৰ এবিধ পদাৰ্থ থাকে। এই কাৰকুমিনৰ ওপৰত হালধীৰ উপকাৰিতা বহু পৰিমাণে নিৰ্ভৰ কৰে। কিন্তু কাৰকুমিনক শৰীৰত ভালদৰে শোষণ কৰিব নোৱাৰে, ইয়াক জলকীয়াৰ লগত খালেহে সম্পূৰ্ণৰূপে শৰীৰে শোষণ কৰে। এই দুটা ৰন্ধন উপাদানে আক্ষৰিক অৰ্থত যাদুৰ দৰে কাম কৰি শৰীৰৰ একাধিক ৰোগৰ বিৰুদ্ধে যুঁজিব পাৰে বুলি গৱেষক সকলে কয়।
বিষৰ চিকিৎসাত হালধী বহুদিনৰ পৰা ব্যৱহাৰ কৰি অহা হৈছে। হালধীয়ে আচলতে শৰীৰটোক ভিতৰৰ পৰাই সুস্থ কৰি আনে যদিও ইয়াত জলকীয়া দিলে ই বেছি খৰকৈ কাম কৰে। জলকীয়াত থকা পাইপেৰিনে কোষবোৰ সক্ৰিয় কৰে। এই মছলা দুটাই দীৰ্ঘদিনীয়া বিষ বা স্নায়ু সম্পৰ্কীয় বিষো নিৰাময় কৰে। আয়ুৰ্বেদত বাতবিষৰ বিষ কমোৱাৰ বাবে হালধী ব্যৱহাৰৰ কথা উল্লেখ আছে।
হালধী আৰু জলকীয়াই ডায়েবেটিছ নিয়ন্ত্ৰণত সহায় কৰে। কেঁচা হালধী আৰু জলকীয়া একেলগে মিহলাই খালে শৰীৰৰ অতিৰিক্ত চৰ্বি গলাত সহায় কৰে। প্ৰতিদিনে পুৱা খালী পেটত গৰম পানীত হালধী, জলকীয়া আৰু আদা খালে বিপাকীয় ক্ৰিয়া বৃদ্ধি পায়।
হালধী আৰু জলকীয়া একেলগে কেন্সাৰৰ বিৰুদ্ধেও যুঁজিব পাৰে। হালধীত থকা কাৰকুমিনে কেন্সাৰ কোষ ধ্বংস কৰাত সহায় কৰে। স্তন কেন্সাৰ প্ৰতিৰোধৰ ক্ষেত্ৰত হালধীৰ ভূমিকা বিশেষভাৱে গুৰুত্বপূৰ্ণ।