আজি সন্ধিয়া ৪ বজাত সদ্য অনুষ্ঠিত উপ-নিৰ্বাচনত বিজয়ী অসমৰ নৱ-নিৰ্বাচিত ৫ গৰাকী বিধায়কক আজি নতুন বিধানসভাত মুখ্যমন্ত্ৰী ড° হিমন্ত বিশ্ব শৰ্মা, কেবিনেট মন্ত্ৰী আৰু বিধায়কসকলৰ উপস্থিতিত শপত গ্ৰহণ কৰাই অসম বিধান সভাৰ অধ্যক্ষ বিশ্বজিৎ দৈমাৰীয়ে। উক্ত পাঁচজন বিধায়কৰ ভিতৰত আছে বিজেপিৰ তিনিজন, আৰু বিজিপিৰ দুই মিত্ৰদলৰ – আসম গণ পৰিষদ (অগপ) আৰু ইউনাইটেড পিপলছ পাৰ্টি লিবাৰেল (ইউপিপিএল)ৰ। উল্লেখ্য যে, শপত গ্ৰহণ কৰা নৱ-নিৰ্বাচিত বিধায়ক কেইগৰাকী হ’ল ক্ৰমে বিহালীৰ বিজেপি বিধায়ক দিগন্ত ঘাটোৱাৰ, চামগুৰিৰ বিজেপি বিধায়ক দীপ্লু ৰঞ্জন শৰ্মা, ধলাইৰ বিজেপি বিধায়ক ৰঞ্জন দাস, চিদলীৰ ইউপিপিএলৰ বিধায়ক নিৰ্মল কুমাৰ ব্ৰহ্ম, আৰু বঙাইগাঁৱৰ অগপ বিধায়ক দীপ্তিময়ী চৌধুৰী।
স্মৰ্তব্য য়ে, এই পাঁচটা সমষ্টিত সদ্য সমাপ্ত উপ-নিৰ্বাচনত বিহালীত বিজেপি প্ৰাৰ্থী দিগন্ত ঘটোৱাৰে বিশাল জয় লাভ কৰে। ঘটোৱাৰে ৫০,৯৪৭ টা ভোট লাভ কৰি নিকটতম প্ৰতিদ্বন্দ্বী কংগ্ৰেছ প্ৰাৰ্থী জয়ন্ত বৰাক ৯,০৫১ টা ভোটৰ ব্যৱধানত পৰাস্ত কৰে। আপৰ প্ৰাৰ্থী অনন্ত গগৈয়ে মাত্ৰ ১২১৭ টা ভোট লাভ কৰে। চিদলীত এন ডি এৰ মিত্ৰদল ইউ পি পি এলৰ প্ৰাৰ্থী নিৰ্মল কুমাৰ ব্ৰহ্মই ৩৭ হাজাৰৰো অধিক ভোটৰ ব্যৱধানত জয়লাভ কৰে। তেওঁৰ নিকটতম প্ৰতিদ্বন্দ্বী বিপিএফৰ সুধো কুমাৰ বসুমতাৰীক পৰাস্ত কৰি তেওঁ ৯৫,২৪৩টা ভোট লাভ কৰে।বঙাইগাঁৱত কংগ্ৰেছ প্ৰাৰ্থী ব্ৰজেনজিৎ সিংহৰ বিৰুদ্ধে অগপৰ দীপ্তিময়ী চৌধুৰীয়ে ৭৪,৭৩৪টা ভোট লাভ কৰি জয়লাভ কৰে। কংগ্ৰেছৰ প্ৰাৰ্থী তথা ৰকিবুল হুছেইনৰ পুত্ৰ তাঞ্জিল হুছেইনৰ বিৰুদ্ধে বিজেপিৰ দীপ্লু ৰঞ্জন শৰ্মাই ২২ হাজাৰৰো অধিক ভোটত জয়লাভ কৰে। ইপিনে কংগ্ৰেছৰ ধ্ৰুবজ্যোতি পুৰকায়স্থৰ বিৰুদ্ধে ধলাই সমষ্টিত বিজেপি প্ৰাৰ্থী নিহাৰ ৰঞ্জন দাসে ৯ হাজাৰৰো অধিক ভোটৰ ব্যৱধানত জয়লাভ কৰে।
আজি অসম বিধান সভাৰ মজিয়াত অনুষ্ঠিত শপত গ্ৰহণ অনুষ্ঠানত নৱনিৰ্বাচিত পাঁচোজন বিধায়ককে ৰাইজৰ প্ৰতিনিধি হিচাপে তেওঁলোকৰ নতুন ভূমিকাক অসম বিধান সভাৰ অধ্যক্ষ বিশ্বজিৎ দৈমাৰীয়ে আন্তৰিক শুভেচ্ছা জনায়। বিধানসভাৰ কাৰ্যসূচীত তেওঁলোকৰ সক্ৰিয় অংশগ্ৰহণেৰে তেওঁলোকক প্ৰেৰণ কৰা লোকসকলৰ আশা আৰু আকাংক্ষা পূৰণৰ বাবে যৎপৰোনাস্তি চেষ্টা কৰিবলৈ পাঁচজন বিধায়ককে আহ্বান জনাই অধ্যক্ষগৰাকীয়ে।
