গোগামুখ, ২ ডিচেম্বৰঃ মিচিং জনগোষ্ঠীৰ যুৱ প্ৰজন্মক খেলৰ প্ৰতি আকৰ্ষিত কৰিবলৈ আৰম্ভ কৰা মিচিং স্প’ৰ্টছ কাৰ্নিভেল(Mising Sports Carnival) বৰ্ণিল কাৰ্যসূচীৰে কালি পুৱতি নিশা সামৰণি পৰিছে৷
২৮ নৱেম্বৰৰ পৰা ধেমাজি(Dhemaji) জিলাৰ গোগামুখত ১ ডিচেম্বৰলৈ অনুষ্ঠিত হোৱা স্প’ৰ্টছ কাৰ্নিভেলৰ দেওবাৰে সামৰণি অনুষ্ঠানৰ মুখ্য আকৰ্ষণ আছিল অলিম্পিক ৰূপৰ পদক বিজয়ী মীৰাবাই ছানু৷ সামৰণি অনুষ্ঠানৰ মুখ্য অতিথি হিচাপে উপস্থিত থাকি উত্তৰ-পূৰ্বাঞ্চলত ক্ৰীড়া ক্ষেত্ৰত বহু প্ৰতিভা আছে যদিও ইয়াক উপযুক্তভাৱে প্লেটফৰ্ম দিব পৰা নাই৷
যিসকলে ক্ৰীড়াৰ বাতাবৰণ পাইছে এইসকল খেলুৱৈয়ে ৰাষ্ট্ৰীয় আৰু আন্তৰাষ্ট্ৰীয় পৰ্যায়ত খেলাৰ সুবিধা লাভ কৰিছে৷ তেওঁ লগতে কয়, মিচিং জনগোষ্ঠীৰ ছাত্ৰ সংগঠন টিএমপিকেই স্প’ৰ্টছ ফেষ্টিভেল পাতি নতুন প্ৰতিভাক আৱিষ্কাৰ কৰিব বিচাৰিছে তাত মই আনন্দিত হৈছোঁ৷
যদি মই সময় পাই থাকোঁ তেন্তে যুৱ খেলুৱৈসকলক উৎসাহ দিবলৈ বাৰে বাৰে এনেধৰণৰ ক্ৰীড়া প্ৰতিযোগিতাত উপস্থিত থাকিব বুলি অলিম্পিক মেডেলিষ্ট মীৰাবাই ছানুৱে(Olympic medalist Meerabai Sanu) দোহাৰে৷
সামৰণি অনুষ্ঠানত বিশেষ অতিথি হিচাপে উপস্থিত থাকি সদৌ অসম ছাত্ৰ সন্হাৰ মুখ্য উপদেষ্টা ড° সমুজ্জ্বল কুমাৰ ভট্টাচাৰ্যই(Dr. Samujjal Kumar Bhattacharya) টিএমপিকেই(TMPK) ক্ৰীড়াক্ষেত্ৰত লোৱা ভূমিকাক ভূয়সী প্ৰশংসা কৰাৰ লগতে কয়, টিএমপিকে আমাৰ ভাতৃ সংগঠন আৰু টিএমপিকেৰ শুভ কামত আমি সদায় সমৰ্থন দি আহিছোঁ৷
অসমৰ ইতিহাসত মিচিং জাতীয় সংগঠন টিএমপিকেই হৈছে মিচিং স্প’ৰ্টছ্ কাৰ্নিভেল অনুষ্ঠিত কৰা এটি জাতীয় সংগঠন৷ স্প’ৰ্টছ্ কাৰ্নিভেল এক সুন্দৰ পৰিৱেশত অনুষ্ঠিত হোৱা বুলি তেওঁ দোহাৰে৷ অনুষ্ঠানত লখিমপুৰ লোকসভা সমষ্টিৰ সাংসদ প্ৰদান বৰুৱা, জোনাই বিধানসভা সমষ্টিৰ বিধায়ক ভুবন পেগু, মিচিং স্বায়ত্তশাসিত পৰিষদৰ মুখ্য কাৰ্যবিহী সদস্য পৰমানন্দ চায়েঙীয়া, অধ্যক্ষ সুনীল কুুমাৰ পেগু, টিএমপিকেৰ কেন্দ্ৰীয় সভাপতি তিলক দলে আদিয়ে৷
অনুষ্ঠানটোৰ উদ্দেশ্য ব্যখ্যা কৰে টিএমপিকেৰ কেন্দ্ৰীয় সম্পাদক ছান কুমাৰ পাংগিঙে৷ উল্লেখনীয় যে, টিএমপিকেৰ ১৬খন জিলা সমিতিক সামৰি অনুষ্ঠিত কৰা মিচিং স্প’ৰ্টছ কাৰ্নিভেল দ্বিতীয় সংস্কৰণৰ শ্ৰেষ্ঠ দলৰ সন্মান লাভ কৰিছে ধেমাজি জিলা দলে৷ সোণৰ পদক ১২, ৰূপৰ পদক ৮, ব্ৰঞ্জৰ পদক ১৪টা লাভ কৰি মুঠ ৩৪ পদকেৰে শ্ৰেষ্ঠ দলৰ সন্মান লাভ কৰে৷
ধেমাজি জিলা দলে এইবাৰ সকলো ইভেণ্টতে দমনীয় খেল প্ৰদৰ্শন কৰি শ্ৰেষ্ঠ দলৰ সন্মান লাভ কৰিবলৈ সক্ষম হয়৷ মাজুলী জিলা দলে সোণৰ পদক ১০, ৰূপৰ পদক ৭ আৰু ব্ৰঞ্জৰ পদক ৬ লাভ কৰি মুঠ ২২টা পদকেৰে দ্বিতীয়, লখিমপুৰ জিলা দলে সোণৰ পদক ৮, ৰূপৰ পদক ১১ আৰু ৪টা ব্ৰঞ্জৰ পদকেৰে মুঠ ২৩টা পদক লাভ কৰি তৃতীয় স্থান লাভ কৰে৷
একেদৰে জোনাই দলে চতুৰ্থ, চিলাপথাৰ দলে পঞ্চম, ঢকুৱাখনা দলে ষষ্ঠ, শিৱসাগৰ দলে সপ্তম, শোণিতপুৰ জিলা দলে ৮ সংখ্যক স্থান, ডিব্ৰুগড় দলে নৱম, যোৰহাট দলে দশম, গোলাঘাট জিলা ১১ সংখ্যক স্থান, গুৱাহাটী দলে ১২ সংখ্যক স্থান, বিহপুৰীয়া দলে ১৩ সংখ্যক স্থান লাভ কৰিবলৈ সক্ষম হয়৷
শদিয়া, তিনিচুকীয়া আৰু চৰাইদেউ দলে এটা পদক লাভ কৰিবলৈ সক্ষম হয়৷ মিচিং স্প’ৰ্টছ কাৰ্নিভেলৰ শ্ৰেষ্ঠ দল আৰু শ্ৰেষ্ঠ খেলুৱৈসকলক কালি নিশা জনসমুদ্ৰৰ মাজত পুৰস্কাৰ সমূহ বিতৰণ কৰা হয়৷