বৈঠালাংছ’, ১৭ ডিচেম্বৰঃ পাৰ্বত্য জিলা পশ্চিম কাৰ্বি আংলঙৰ অসম-মেঘালয় সীমান্তত(Assam-Meghalaya border) পুনৰ খাছীলোকৰ(Khasia) উদ্ভণ্ডালি তথা পথনিৰ্মাণত বাধা দিয়াৰ তথ্য পোহৰলৈ আহিছে৷ প্ৰাপ্ত বাতৰি অনুসৰি, অসম চৰকাৰৰ অসমমালা ২.০ আঁচনিৰ অধীনত এটি পথনিৰ্মাণৰ কাম হামৰেণৰ পৰা খান্দুলিলৈ চলি আছে৷
প্ৰায় ৩৭ কিলোমিটাৰ দৈৰ্ঘ্যৰ এই পথটিৰ নিৰ্মাণৰ কাম চলি থকাৰ মাজতে অসম-মেঘালয় সীমান্তৰ আম-ইহ অঞ্চললৈ আহি একাংশ খাছীলোকে পথনিৰ্মাণত বাধা প্ৰদান কৰি গুচি যায়৷ খান্দুলিলৈ দুই কিলোমিটাৰ থকা এই দুৰত্বত খাছীলোকে কেইবাবৰো আহি ধমক দিয়াৰ লগতে পথনিৰ্মাণৰ কাম বন্ধ কৰিবলৈ নিৰ্দেশ দিয়ে৷
পথনিৰ্মাণত জড়িত শ্ৰমিকসকলে উপায়ন্তৰ হৈ প্ৰাণৰ ভয়ত আম-ইহৰ পৰা খান্দুলিলৈ পথনিৰ্মাণৰ কাম বন্ধ কৰি দিয়ে৷ সমগ্ৰ বিষয়টি কাৰ্বি পৰিষদৰ অন্তৰ্গত সীমান্ত সুৰক্ষা সমিতিৰ অধ্যক্ষ আগষ্টিন হাঞ্চেই জ্ঞাত হোৱাত পশ্চিম কাৰ্বি আংলং জিলা প্ৰশাসনৰ লগতে আৰক্ষী প্ৰশাসনকো অৱগত কৰে৷
ইয়াৰ পিছতেই জিলা আয়ুক্ত সাৰংগপাণি শৰ্মাই উক্ত অঞ্চলটি পৰিদৰ্শন কৰি অসমভূমিৰ অন্তৰ্গত স্থান হোৱা বাবে পথনিৰ্মাণৰ কাম বন্ধ নকৰিবলৈ নিৰ্দেশ প্ৰদান কৰাৰ লগতে আম-ইহত থকা সীমান্ত পহৰা চকীক বিষয়টিৰ সন্দৰ্ভত সজাগ হৈ থাকিবলৈও নিৰ্দেশনা প্ৰদান কৰে৷
আনহাতে, পূৰ্বতে গঠন কৰা দুই সীমামুৰীয়া ৰাজ্যৰ সীমান্ত শান্তি সমিতিয়ে বিষয় সন্দৰ্ভত শান্তি-সম্প্ৰীতি অটুট ৰাখি উন্নয়নমূলক আচঁনি গ্ৰহণত কোনো বাধা প্ৰদান নকৰাৰ বিষয়ক লৈ আজি পুনৰ এক বৈঠক বহাৰ সিদ্ধান্ত গ্ৰহণেৰে মেঘালয়ৰ খাছীলোকসকলক আজি আম-ইহ অঞ্চললৈ মাতি পঠিয়াইছিল যদিও বিয়লি ৪ বজালৈ মেঘালয়ৰ পৰা কোনোলোক নহাত পুনৰ পথনিৰ্মাণৰ কামটি স্থানীয় ৰাইজ আৰু কাৰ্বি ছাত্ৰ সন্থাৰ উপস্থিতিত আৰম্ভ কৰা হয়৷
এই পথনিৰ্মাণ কাম আম-ইহৰ পৰা খান্দুলিৰ দিশলৈ প্ৰায় ৫০০ মিটাৰ দূৰত্বলৈ আৰম্ভ কৰি গৈ থকা অৱস্থাতেই হঠাতে মেঘালয়ৰ পশ্চিম জয়ন্তীয়া পাহাৰ জিলাৰ উপ-আৰক্ষী অধীক্ষক আৰু এগৰাকী গাঁওবুঢ়া আহি উপস্থিত হৈ পথনিৰ্মাণৰ কাম বন্ধ কৰিবলৈ নিৰ্দেশনা প্ৰদান কৰে৷
উক্ত স্থানত উপস্থিত থকা কাৰ্বি ছাত্ৰ সন্থা আৰু স্থানীয় ৰাইজে পথনিৰ্মাণৰ কাম বন্ধ কৰা নহ’ব বুলি প্ৰত্যুত্তৰ দিয়াত দুই ফৈদৰ মাজত বহুসময় ধৰি বাকবিতণ্ডা হোৱাৰ লগতে মতানৈক্যৰ সৃষ্টি হয়৷ ইয়াৰ পিছতেই মেঘালয়ৰ খাছী গাওঁবুঢ়া আৰু উপ-আৰক্ষী অধীক্ষকগৰাকীৰ কিছু শান্ত হোৱাত অসমভূমিৰ অন্তৰ্গত অঞ্চলটিত পুনৰ পথনিৰ্মাণৰ কাম আৰম্ভ কৰা হয়৷
বাতৰি লিখা পৰলৈকে পথনিৰ্মাণৰ কাম অব্যাহত ৰাখি অতি সোনকালে উক্ত অঞ্চলৰ কাম সম্পূৰ্ণ কৰিবৰ বাবে প্ৰচেষ্টা চলাই নিৰ্মাণকাৰী সংস্থাটোৱে৷ আনহাতে, এই সন্দৰ্ভত কাৰ্বি ছাত্ৰ সন্থাৰ কেন্দ্ৰীয় সমিতিৰ সভাপতি প্ৰশান্ত ইংতিয়ে কয় যে আমাৰ অসমভূমিত আমাৰ চৰকাৰৰদ্বাৰা গ্ৰহণ কৰা উন্নয়নমূলক আঁচনিসমূহ ৰূপায়ণ কৰাত আমি সদায় সহায় কৰিম৷
গতিকে, আজি আমাৰ ছাত্ৰ সন্থাৰ বহু সদস্যই আহি অসম-মেঘালয় সীমান্তত পথনিৰ্মাণৰ এই কামটোত সুৰক্ষা প্ৰদান কৰিছোঁ যাতে আমাৰ এই গুৰুত্বপূৰ্ণ পথটো নিৰ্মাণ হৈ যায়৷ সমান্তৰালকৈ কাৰ্বি পৰিষদৰ সীমান্ত সুৰক্ষা সমিতিৰ অধ্যক্ষ আগষ্টিন হাঞ্চেইও সাংবাদিকৰ আগত প্ৰকাশ কৰে যে আমি কোনোধৰণৰ সীমাৰ বাবে ইয়াত মতানৈক্যৰ সৃষ্টি কৰিবলৈ অহা নাই বা কৰিবও বিচৰা নাই৷
আমি মাথোঁ উন্নয়নমূলক আঁচনিৰ কাম কৰাতহে গুৰুত্ব প্ৰদান কৰিছোঁ, সেইয়া লাগিলে অসম চৰকাৰৰ পৰাই হওঁক বা মেঘালয় চৰকাৰৰ পৰাই হওঁক৷ আমি উন্নয়নমূলক কাম-কাজ কৰাত কেতিয়াও বাধা প্ৰদান নকৰোঁ বা কাকোৱেই বাধা প্ৰদান কৰিব নিদিওঁ বুলিও মন্তব্য কৰে হাঞ্চেই৷
উল্লেখযোগ্য যে অসমভূমিত থকা খাছীলোকে কৃষিকৰ্মৰ কাম সম্পূৰ্ণ কৰি খেতি চপোৱাৰ পিছতেই সীমান্তকেন্দ্ৰিক সমস্যাৰ সৃষ্টি কৰাৰ লগতে কৃষিকাৰ্য চলি থকাৰ সময়ত কোনোধৰণৰ সংঘাত সৃষ্টি নকৰে বুলি একাংশলোকে সাংবাদিকৰ আগত সদৰী কৰে৷