ধেমাজি জিলাৰ গোগামুখৰ অন্যতম স্বেচ্ছাসেৱী সংস্থা লোকেল ইউনাইটেড ডেভেলপমেণ্ট অৰ্গেনাইচনৰ উদ্যোগত আৰু গোগামুখ ক্ৰীড়া সংস্থাৰ সহযোগত গোগামুখ নগৰ হাইস্কুল খেলপথাৰত(Ludo Cup football) অনুষ্ঠিত হৈ থকা লুড’ কাপ প্ৰাইজমাণি আৰু ট্ৰফি ফুটবল প্ৰতিযোগিতাত গোগামুখ স্প’ৰ্টছ একাডেমী চেম্পিয়নৰ খিতাপ দখল কৰিছে ৷ দেওবাৰে উত্তেজনপূৰ্ণ ফাইনেল খেলখনত গোগামুখ স্প’ৰ্টছ একাডেমীয়ে গা-ডাঙৰ চুক ২-১ গ’লত পৰাজিত কৰি দ্বিতীয়বাৰৰ বাবে লুড’ কাপ দখল কৰিবলৈ সক্ষম হয় ৷
আক্ৰমণ-প্ৰত্যাক্ৰমণেৰে ভৰা খেলৰ প্ৰথমাৰ্ধত গোগামুখ স্প’ৰ্টছ একাডেমীয়ে দুয়োটা গ’ল কৰিবলৈ সক্ষম হোৱাৰ বিপৰীতে গা-ডাঙৰ চুক এফ চিয়ে প্ৰথমাৰ্ধত অন্তিম মূহুৰ্তত এটা গ’ল পৰিশোধ কৰে ৷ খেলৰ দ্বিতীয়াৰ্ধত খেলখনৰ উত্তেজনা ম্লান পৰাৰ বিপৰীতে দুয়োটা খেলুৱৈৰ পৰস্পৰৰ টনা-আঁজোৰা, তৰ্কা-তৰ্কিলৈ পৰিণত হয় ৷ ফলত দুয়োটা দলে দ্বিতীয়াৰ্ধত কোনো গ’ল দিবলৈ সক্ষম নহ’ল ৷ খেলৰ অন্তত বিজয়ী দল গোগামুখ স্প’ৰ্টছ একাডেমীক এক লাখ টকাৰ লগতে ট্ৰফি প্ৰদান কৰে ধেমাজি জিলা ক্ৰীড়া সংস্থাৰ সম্পাদক যতীন বুঢ়াগোঁহায়ে ৷
বিজিত দল গা-ডাঙৰচুক এফ চিক ৫০ হাজাৰ টকাৰ লগতে ট্ৰফি প্ৰদান কৰে মিচিং স্বায়ত্তশাসিত পৰিষদৰ কাৰ্যবাহী সদস্য প্ৰভাত বসুমতাৰীয়ে ৷ খেলখনৰ শ্ৰেষ্ঠ গ’লদাতাৰ সন্মান লাভ কৰে স্প’ৰ্টছ একাডেমীৰ জুমলা ব্ৰহ্মই ৷ খেলখনৰ শ্ৰেষ্ঠ খেলুৱৈৰ সন্মান লাভ কৰে স্প’ৰ্টছ একাডেমীৰ অমিত ঠাকুৰীয়াই ৷ শ্ৰেষ্ঠ গ’লৰক্ষকৰ সন্মান লাভ কৰে স্প’ৰ্টছ একাডেমীৰ মেঘৰাজ বসুমতাৰীয়ে ৷ শ্ৰেষ্ঠ খেলুৱৈ, গ’ল দাতা, গ’লৰক্ষকৰ পুৰস্কাৰসমূহ প্ৰদান কৰে লুড’ কাপ অভ্যৰ্থনা সমিতিৰ সভাপতি গমুগ পেগু, সম্পাদক শুক্লেশ্বৰ স্বৰ্গীয়াৰী, যুৱ সমাজকৰ্মী ৰাহু পাতিৰ, লুড’ৰ সম্পাদক মন্টু টাইদ, ৰাজু চিন্তে, কমল কিৰণ পেগুৱে ৷ আজিৰ খেলখন পৰিচালনা কৰে ব্ৰজেন বুঢ়াগোঁহাই, মহানন্দ মিলি, দীপক গগৈ, জিন্টু ফুকনে ৷ ৰেফাৰী ইন্চাৰ্জ হিচাপে থাকে মণিৰাম পেগুৱে ৷ মেচ কমিচনাৰ হিচাপে থাকে বিমল স্বৰ্গীয়াৰীয়ে ৷