পঞ্চাশৰ দশকতে প্ৰতিষ্ঠা লাভ কৰা নাজিৰাৰ শৈক্ষিক উত্তৰণৰ বাটকটীয়া স্বৰূপ নাজিৰা বৰতলা উচ্চতৰ মাধ্যমিক বিদ্যালয়ত ৫ জনকৈ শিক্ষক কৰ্মচাৰীক এক বৰ্ণাঢ্য কাৰ্যসূচীৰে বিদায় সম্বৰ্ধনা জ্ঞাপন কৰা হয়। বিদ্যালয়য়খনৰ উপাধ্যক্ষা দেৱযানী মহন্তৰ সভাপতিত্বত দহ ফেব্ৰুৱাৰীত বিদ্যালয়ৰ প্ৰেক্ষাগৃহত অনুষ্ঠিত হোৱা উক্ত বিদায় সভা আৰম্ভ হয় বিদ্যালয়য় ছাত্ৰ ছাত্ৰীয়ে পৰিবেশন কৰা গুৰু বন্দনাৰে। উক্ত সভাত বিদ্যালয়খনৰ সদ্য বিদায়ী অধক্ষ্য প্ৰশান্ত কলিতা, বিষয় শিক্ষক খৰ্গেশ্বৰ গগৈ আৰু ৰূপা দত্ত, সহকাৰী শিক্ষক অমিতাভ দিহিঙ্গীয়া বৰুৱা আৰু বিদ্যালয়ৰ চতুৰ্থ বৰ্গৰ কৰ্মচাৰী ৰবীন বুঢ়াগোঁহাইক একোখনকৈ সঁফুৰা, ফুলাম গামোচা, সম্বৰ্ধনা পত্ৰ আৰু কিতাপৰ টোপোলাৰে বিদ্যালয়ৰ শিক্ষক কৰ্মচাৰী আৰু ছাত্ৰ একতা সভাই বিদায় সম্বৰ্ধনা জ্ঞাপন কৰে। বিদ্যালয়য়খনৰ জ্যেষ্ঠ শিক্ষক প্ৰদীপ বৰুৱা আৰু ইমদাদ আলিয়ে আঁত ধৰা অনুষ্ঠানটিত বিশিষ্ট অতিথি হিচাপে বিদ্যালয় খনৰ প্ৰাক্তন অধ্যক্ষ তথা বিশিষ্ট শিক্ষাবিদ ৰামদেৱ গোস্বামী, বিদ্যালয় পৰিচালনা আৰু উন্নয়ন সমিতিৰ উপ সভাপতি দিলীপ চাংমাই উপস্থিত থাকি নিজ বক্তব্য দাঙি ধৰে। সভাত আদৰণি ভাষণ আগবঢ়ায় বিদ্যালয়ৰ নৱনিৰ্বাচিত অধক্ষ্য মুহিবুল হুছেইনে। বিদায়ী ভাসনত প্ৰাক্তন অধ্যক্ষ প্ৰশান্ত কলিতাই চৰকাৰ অভিভাৱক আৰু শিক্ষকৰ ঐকান্তিক প্ৰচেষ্টাৰ ফলত শেহতীয়াকৈ মাতৃভাষা মাধ্যমৰ বিদ্যালয় উজ্বলি উঠা বুলি মত পোষণ কৰে। বিদায়ী কেওজন শিক্ষক কৰ্মচাৰীয়ে কঠোৰ পৰিশ্ৰম আৰু অধ্যাৱসায়ৰ যোগেদি বিদ্যালয়খনক উজ্বলাই তুলিবলৈ ছাত্ৰ ছাত্ৰী সকলক গোহাৰি জনায়।
