হোজাই
হোজাইত এগৰাকী গুটখা ব্যৱসায়ীৰ অশালীন আচৰণৰ এটা ভিডিঅ’ সামাজিক মাধ্যমত ভাইৰেল হোৱাৰ পাছতেই তীব্ৰ প্ৰতিক্ৰিয়াৰ সৃষ্টি হয় হোজাই জিলাত। যোৱা ২০ মে’ তাৰিখে নীলবাগান চানাপট্ৰিৰ ৫৪ নং ৰাষ্ট্ৰীয় ঘাইপথৰ লগত থকা ইণ্ডিয়ান অইল পাম্পৰ কাষত থকা গেলামাল দোকানী ফৰিজ আলী নামৰ এগৰাকী ব্যক্তিয়ে হোজাই জিলা প্ৰশাসনক অশ্লীল গালি গালাজ কৰা এটা ভিডিঅ’ ভাইৰেল হোৱাৰ পাছতেই সচেতন মহলত তীব্ৰ প্ৰতিক্ৰিয়াৰ সৃষ্টি হয়। ফৰিজ আলী নামৰ গেলামাল দোকানী জনে হোজাই আৰক্ষীৰ উচ্চ পদস্থ বিষয়াসকলক অশ্লীল ভাষাৰে গালি গালাজ কৰা ভিডিঅ’ ভাইৰেল হৈ পৰিছিল সমগ্ৰ ছচিয়েল মিডিয়াত। উক্ত ভিডিঅ’ ভাইৰেল হোৱাৰ পাছতেই ফৰিজ আলীক মানসিক বিকাৰগ্ৰস্ত বুলি দাবী কৰে পৰিয়াল আৰু গাঁওবাসী ৰাইজে। ৭ বছৰ ধৰি নিখোঁজ হৈ থকা ফৰিজ আলীক যোৱা ডেৰ বছৰ পূৰ্বে পৰিয়ালৰ লোকে কাষত পাই চিকিৎসা চলাই থকাৰ সময়তেই অজানিতে ভুল কৰা বুলি পৰিয়ালৰ লোকে স্বীকাৰ কৰি প্ৰশাসন আৰু ৰাইজৰ আগত বিচাৰিলে ক্ষমা। ৰাষ্ট্ৰীয় ঘাইপথৰ কাষত দোকান খুলি গুটখাৰ অবৈধ বেহা চলোৱা ফৰিজ আলীক দীৰ্ঘদিন ধৰি মানসিক ৰোগৰ চিকিৎসা চলাই অহা বুলি দাবী পৰিয়ালৰ লোকৰ। চৰকাৰী গাঁওবুঢ়াও দুই হাত যোৰ কৰি লোকজনক ক্ষমা কৰি দিবৰ বাবে প্ৰাৰ্থনা জনায় জিলা প্ৰশাসনক।