অসমত কঠোৰ লকডাউনৰ প্ৰয়োজন

• ৰীতা ডাকুৱা

সমগ্ৰ বিশ্বৰ লগতে অসমতো ধাৰাবাহিকভাৱে বৃদ্ধি পাইছে কৰ’নাত আক্ৰান্ত ৰোগীৰ সংখ্যা। প্ৰতিদিনে দ্ৰুতগতিত বাঢ়িছে  Covid 19 পজিটিভ ৰোগী। কিন্তু তথাপিও যেন একাংশ লোক এই ৰোগৰ ভয়াবহতা সম্পৰ্কে অলপো সচেতন নহয়।  অসমৰ মাননীয় মুখ্যমন্ত্ৰী সৰ্বানন্দ সোণোৱালৰ লগতে স্বাস্থ্যমন্ত্ৰী হিমন্ত বিশ্ব শৰ্মাই বাৰে বাৰে আহ্বান জনাইছে যে জনসাধাৰণে সহযোগ কৰক আৰু ১০০ শতাংশই লকডাউন মানি চলক। অতি প্ৰয়োজন নহ’লে ঘৰৰ পৰা বাহিৰলৈ নোলাব। অন্যথা অসমৰ পৰিস্থিতি নিয়ন্ত্ৰণৰ বাহিৰত হ’ব। কিন্তু বাস্তৱত দেখা গৈছে যে জনসাধাৰণে চৰকাৰৰ লগত সহযোগ কৰা নাই। তেওঁলোকে এই লকডাউনক কিবা যেন ভাৰত বন্ধ, অসম বন্ধ, বুলি ভাবি বাৰে বাৰে লকডাউন উলংঘা কৰাৰ চেষ্টা কৰিছে। ৰাজপথ, বজাৰ সকলোতে মুক্তমনে ফুৰিছে একাংশই । মুখত কোনো মাস্ক নাথাকে, কোনোধৰণৰ সামাজিক দুৰত্বও তেওঁলোকে মানি নচলে। কঠোৰ লকডাউনৰ ফলত জনসাধাৰণৰ কোনোধৰণৰ সমস্যা নহওঁক বা কোনো লোক যাতে ভোকত থাকিবলগীয়া নহয় তাৰ বাবে চৰকাৰ-প্ৰশাসনে কিছু কিছু ক্ষেত্ৰত লকডাউন শিথিল কৰিছিল। কিন্তু এই লকডাউনৰ শিথিলতাৰ সুযোগ লৈ , প্ৰশাসনৰ চকুত ধূলি দি বাৰে বাৰে লকডাউন উলংঘা কৰিছে।  উল্লেখনীয় কথা যে যেতিয়া অসমত এজনো কৰোণা ৰোগী নাছিল তেতিয়া লকডাউনো কটকটীয়া আছিল। কিন্তু এতিয়া অসমত কৰ’না আক্ৰান্তৰ সংখ্যা ২০০ কেতিয়াবাই পাৰ কৰিলে কিন্তু লকডাউন সম্পূৰ্ণৰূপে অৰ্থহীন হৈছে।  এনেদৰে থাকিলে অসমৰ পৰিস্থিতি অধিক ভয়ানক হ’ব। গতিকে চৰকাৰলৈ কাতৰ অনুৰোধ যে অসমত প্ৰথমৰ দৰে কঠোৰ লকডাউন দিয়ক অন্যথা পৰিস্থিতি বহুত বেয়াৰ দিশলৈ যাব।