সমগ্ৰ দেশ তথা ৰাজ্যৰ লগতে নলবাৰী জিলাতো কোভিড-১৯ ৰ দ্বিতীয় ঢৌৰ প্ৰভাৱ বৰ্তমানেওঅব্যাহত থকাৰ পৰিপ্ৰেক্ষিতত জিলা উপায়ুক্তৰ তত্বাৱধানত জিলা স্বাস্থ্য বিভাগৰ তৰফৰ পৰা এই ভাইৰাছৰ সংক্ৰমন ৰোধ কৰাৰ বাবে তথা ইয়াৰ দ্বাৰা সৃষ্টি হোৱা অভাৱনীয় পৰিস্থিতিৰ সৈতে মুকাবিলা কৰাৰ বাবে প্ৰয়োজনীয় বিভিন্ন ব্যৱস্হা অব্যাহত ৰখা হৈছে। কোভিড- ১৯ৰ দ্বিতীয়টো ঢৌত এতিয়ালৈকে আক্ৰান্ত হোৱা মুঠ ৰোগীৰ সংখ্যা ২,৬৯৪ জন। ইয়াৰ ভিতৰত ১৮৬১ গৰাকী ৰোগী এতিয়াও সংক্ৰমণমুক্ত হোৱা নাই অৰ্থাৎ এতিয়াও সক্ৰিয় হৈ আছে। ইয়াৰে ভিতৰত মুঠ ১৬৩৩ গৰাকী কোভিড ৰোগী বৰ্তমান গৃহ পৃথকীকৰণত আছে আৰু বাকী সকলৰ ভিতৰত শ্বহীদ মুকুন্দ কাকতি অসামৰিক চিকিৎসালয়ত ৯৬ গৰাকী, বেলচৰ আদৰ্শ চিকিৎসালয়ত ৩০ গৰাকী আৰু মাখিবাহা আদৰ্শ চিকিৎসালয় আৰু খাতিকুছি আদৰ্শ চিকিৎসালয়ত ক্ৰমে ৩৫ আৰু ৭ গৰাকীকৈ কোভিড ৰোগী চিকিৎসাধীন হৈ আছে। জিলা স্বাস্থ্য বিভাগৰ তৰফৰ পৰা গৃহ পৃথকীকৰণত থকা কোভিড ৰোগীসকলৰ স্বাস্থ্যৰ দিশটো সূক্ষ্মভাৱে নিৰীক্ষণ কৰি থকা হৈছে । যোৱা এক সপ্তাহত সৰ্বমুঠ ১৫৮৬০ গৰাকীৰ কোভিড পৰীক্ষা কৰা হৈছে আৰু মুঠ ১১৯১ গৰাকী কোভিড পজিটিভ ( পজিটিভৰ হাৰ ৭.৫১%) পোৱা গৈছে। কোভিডৰ সংক্ৰমণৰ অভাৱনীয় পৰিস্থিতিৰ প্ৰতি লক্ষ্য ৰাখি বৰ্তমান জিলাখনৰ সকলো চিকিৎসালয়তে কোভিড পৰীক্ষাৰ ব্যৱস্থা কৰা হৈছে। ইয়াৰ সমান্তৰালকৈ কোভিডৰ প্ৰতিষেধক প্ৰদান কাৰ্য্যও বৰ্তমানে জিলাখনত অব্যাহত আছে। ৬০ বছৰ বা উৰ্ধৰ মুঠ ১৪০৪২ গৰাকীক প্ৰথম আৰু ২৬০৯ গৰাকীক দ্বিতীয় খোৰাক দিয়া সম্পূৰ্ণ কৰা হৈছে। ঠিক তেনেদৰে ৪৫ বছৰ বা উৰ্ধৰ ১৯৫৩১ গৰাকীক প্ৰথম খোৰাক আৰু ২৩৭০ গৰাকীক দ্বিতীয় খোৰাক দিয়া এতিয়ালৈ সম্পূৰ্ণ হৈছে। ১৮বছৰ বা উৰ্ধৰ মুঠ ২৭৬০ গৰাকীক প্ৰথম খোৰাক দিয়া সম্পূৰ্ণ কৰা হৈছে। জিলাখনত বৰ্তমানলৈকে কেৱল ৩ নং বালিতাৰা গাঁৱক ক’নটেইনমেণ্ট জ’ন হিচাবে ঘোষণা কৰা হৈছে। জিলাখনত এতিয়ালৈকে কোভিড- ১৯ৰ দ্বিতীয়টো ঢৌত মৃত্যু হোৱা মুঠ ৰোগীৰ সংখ্যা ১৬ জন । বৰ্তমানৰ অতিমাৰীৰ এই জটিল পৰিস্থিতিত নিজৰ লগতে আপোনজনৰ সুৰক্ষা সুনিশ্চিত কৰাৰ বাবে কোভিড-১৯ সম্বন্ধিত সকলো সাৱধানতা তথা বিধি কঠোৰভাৱে মানি চলাৰ বাবে জিলা উপায়ুক্তাই সমগ্ৰ নলবাৰী জিলাবাসী ৰাইজক আহ্বান জনাইছে।
 | ReplyReply allForward |