চুবুৰীয়া ৰাজ্য অৰুণাচল প্ৰদেশত অব্যাহত থকা নেৰেনেপেৰা বৰষুণৰ ফলত ক্ৰমাৎ উফন্দি উঠিছে চৰাইদেউ জিলাৰ মাজেৰে বৈ যোৱা নৈ-উপনৈ সমূহ। দিচাং , টাওকাক নদীৰ বাঢ়নী পানীয়ে সোণাৰি, চফ্ৰাই আদি বিভিন্ন প্ৰান্তত জলমগ্ন কৰাৰ সময়তে টিয়ক নৈৰ বাঢ়নী পানীয়ে বুৰাই পেলাইছে সোণাৰিৰ ৰতনপুৰ চাহ বাগিচা। ভজো গাঁও পঞ্চায়তৰ অন্তৰ্গত ৰতনপুৰ চাহ বাগিচাৰ অধিকাংশ এলেকা পানীৰ মাজত আৱদ্ধ হৈ পৰাত এতিয়া হাহাকাৰ লাগিছে শ্ৰমিকসকলৰ মাজত। বাগিচাখনৰ সিংহভাগ শ্ৰমিকৰ বাসগৃহ পানীৰ মাজত আৱদ্ধ হৈ পৰাৰ লগতে কোনো কোনো শ্ৰমিকৰ ঘৰৰ ভিতৰলৈ পানী সোমোৱাৰ ফলত ওচৰৰ ওখ স্থানত আশ্ৰয় গ্ৰহণ কৰিবলগীয়া হৈছে। আনহাতে দুদিন ধৰি পানীৰ মাজত আৱদ্ধ হৈ থকাৰ পাছতো চাহ বাগিচা কৰ্তৃপক্ষৰ লগতে ভজো গাঁও পঞ্চায়ত কৰ্তৃপক্ষই কোনো ধৰণৰ গুৰুত্ব নিদিয়াৰ অভিযোগ উত্থাপন কৰিছে স্থানীয় শ্ৰমিকে। ইফালে চাহ বাগিচা অঞ্চলত পানীৰে ভৰি পৰাৰ ফলত এতিয়া বাগিচাখনৰ কাম-কাজ বন্ধ হৈ পৰা পৰিলক্ষিত হৈছে।
