ইনষ্টিটিউচনেল কুৱাৰেন্টীনৰ পৰা হ’ম কুৱাৰেন্টীনঃ দুৰ্বোধ্য হৈছে কোনোৰ বাবে ।

নাজিৰা : 

দূৰণি ৰাজ্যৰ পৰা ৰে’ ল অথবা আন বাহনেৰে অসমলৈ আহি পোৱা লোকসকলক প্ৰশাসনৰ ভূমিকাৰে কুৱাৰেন্টীন কেন্দ্ৰত বিধিগতভাৱে আৰু তাৎক্ষণিকতাৰে ভৰ্ত্তি কৰোৱা হৈছে । নাজিৰাৰ দৰে স্থানত নিৰ্দিষ্ট বাহনেৰে কুৱাৰেন্টীন গৃহত উপস্থিত কৰোৱাই স্বাৱ পৰীক্ষা পৰ্য্যন্ত অতি মসৃনভাৱে কৰি যোৱাত জনসাধাৰণে চৰকাৰী দায়ৱদ্ধতাৰ শলাগ লৈছে । নাজিৰাৰ মহকুমা কুৱাৰেন্টীন কেন্দ্ৰ হিচাপে ঘোষিত গড়গাঁও কলেজত শিমলুগুৰি জংচনত ৰেলৰপৰা নমা  শিৱসাগৰ মহকুমাৰ যাত্ৰী সকলেও পথৰ কাষৰ প্ৰথম কেন্দ্ৰ হিচাপে ইয়াতে স্বাৱ পৰীক্ষা কৰি গৈছে । কেন্দ্ৰটোৰ চিকিৎসা বিষয়া ডাঃ প্ৰদ্যুৎ কোঁৱৰে জনোৱা মতে ৩১ মে’ পৰ্য্যন্ত কেন্দ্ৰটোত পাঁচশতাধিক ব্যক্তিৰ শৰীৰৰ নমুনা গ্ৰহণ কৰি পৰীক্ষা কৰা হৈছে । আনহাতে শেহতীয়া এক নিৰ্দেশ অনুসৰি কোনো মহিলা যাত্ৰী অকলশৰীয়াকৈ আহিলে ইনষ্টিটিউচনেল কুৱাৰেন্টীন নকৰি স্বাৱ পৰীক্ষা কৰি ঘৰৰ অভিভাৱকৰ তত্বাৱধানত হ’ম কুৱাৰেন্টীন কৰোৱাৰ ব্যৱস্থা কৰা হৈছে.।  মন কৰিবলগীয়া যে যিসকল লোকে সাতদিন ধৰি কুৱাৰেন্টীন কেন্দ্ৰত থাকি স্বাৱ পৰীক্ষাৰ নিগেটিভ প্ৰমাণ পত্ৰ হাতত পায় তেওঁলোকক পৰৱৰ্ত্তী সাতদিন নিজ গৃহত হ’ ম কুৱাৰেন্টীন কৰোৱাৰ দিহা দিয়াৰ পাছত একাংশ তেনে লোকে ঘৰলৈ যোৱাৰ পথত স্বাস্থ্য বিষয়াৰ পৰামৰ্শ পাহৰি কুৱাৰেন্টীন মূক্তৰ দৰে আচৰণ কৰাও দেখা গৈছে । ঠায়ে ঠায়ে যান-বাহন আদিত কোনো সাৱধানতা নোহোৱাকৈ উঠি যোৱাৰ বাবে স্থানীয় গাঁও বাসীৰ নানা ওজৰ আপত্তি আৰু আতংকিত হোৱাৰ দৰে বাতাবৰণে গা কৰি উঠিছে । এই ক্ষেত্ৰত ব্যক্তিজন কভিড — ১৯ নিগেটিভ প্ৰমাণিত হৈয়ো স্বাস্থ্য বিভাগৰ নীতি সাতদিনলৈ কঠোৰভাৱে পালন কৰিবলৈ কোনো এম্বুলেন্স বা নিৰ্দিষ্ট বাহনেৰে ঘৰত উপস্থিত হোৱাৰ দিহা কুৱাৰেন্টীন কেন্দ্ৰ পৰাই যুগুত কৰি দিয়াৰ প্ৰয়োজন বুলি সচেতন মহলে উনুকিয়াইছে । গড়গাঁও কেন্দ্ৰত কালি ১০ জন নতুনকৈ উপস্থিত হোৱাৰ বিপৰীতে  ৬জনক হ’ম কুৱাৰেন্টীনলৈ প্ৰেৰণ কৰা হয় । সম্প্ৰতি ৬ গৰাকী মহিলাসহ সৰ্বমুঠ ৪৪ জন আবাসী হৈ ৰৈছে গড়গাঁও মহাবিদ্যালয়ৰ কুৱাৰেণ্টীন চেণ্টাৰত ।