দৈনন্দিন বাৰ্তাৰ আন্তৰ্জাতিক ডেস্ক
ক’ৰোনাত আক্ৰান্ত হৈ মৃত্যু হৈছে আণ্ডাৰ ৱ’ৰ্ল্ড ডন ডাউদ ইব্রাহিমৰ৷ চোৰাংচোৱাৰ সূত্ৰত প্ৰকাশ এই খবৰ৷ প্ৰাপ্ত তথ্য মতে পাকিস্তানৰ কৰাচী চহৰৰ লিয়াকট সামৰিক হাস্পতালত ডাউদ ইব্রাহিমক ভৰ্ত্তি কৰোৱা হৈছিল৷ মুম্বাই ধাৰাবাহিক বিস্ফোৰণা অন্যতম অভিযুক্ত আছিল আণ্ডাৰ ৱ’ৰ্ল্ড ডন ডাউদ ইব্রাহিম৷ প্ৰাপ্ত খবৰ মতে শুকুৰবাৰে নিশা ক’ৰোনাত আক্ৰান্ত হৈ ডাউদ ইব্রাহিমৰ মৃত্যু হয়৷ কৰাচীৰ চিকিৎসালয়ত ভৰ্ত্তি কৰোৱাৰ পাছত ডাউদক লৈ লিয়াকট সামৰিক চিকিৎসালয়ত চূড়ান্ত ব্যস্ততা দেখা গৈছিল৷ পাকিস্তান সেনাৰ শীৰ্ষ বিষয়া আৰু চোৰাংচোৱা সংস্থা আইএছআইৰ কেইবাজনো বিষয়াক এই চিকিৎসালয়খনত গম্ভীৰ মুখেৰে প্ৰৱেশ কৰা আৰু ওলাই যোৱা দেখিবলৈ পোৱা গৈছে৷ উল্লেখ্য যে ইয়াৰ পূৰ্বে কৰাচীৰ সামৰিক চিকিৎসালয়ত পত্নীসহ ডাউদ ইব্ৰাহিমক ভৰ্ত্তি কৰোৱা হৈছিল বুলি জানিব পৰা গৈছে৷ আনহাতে আণ্ডাৰ ৱ’ৰ্ল্ড ডনৰ ভাতৃ অনিছ ইব্রাহিমে কৰা দাবী মতে তেওঁৰ ককায়েক আৰু বৌয়েকৰ শৰীৰত ক’ভিড জীৱাণু পোৱা নাই৷ প্ৰাপ্ত খবৰ মতে ডাউদৰ সকলো নিৰাপত্তাৰক্ষী আৰু সহচৰসকলক কোৱাৰেণ্টাইনলৈ পঠোৱা হৈছে৷ উল্লেখ্য যে ডাউদ পৰিয়ালসহ পাকিস্তানত লুকাই আছিল আৰু তাৰ পৰাই অপৰাধ জগতৰ ৰিম’ট নিয়ন্ত্ৰণ কৰি আছিল৷ এই কথা আগেয়েই ইছলামাবাদক তথ্য সহকাৰে জনাইছিল নতুন দিল্লীয়ে৷ কিন্তু সেই তথ্য বাৰম্বাৰ অস্বীকাৰ কৰি থাকে পাকিস্তানে৷