বিটিআৰত ভুৱা নথি-পত্ৰৰে চাকৰি লৈ কেবাগৰাকীও টেট শিক্ষক গ্ৰেপ্তাৰ হোৱা ঘটনাৰ চাঞ্চল্য মাৰ নৌযাওতেই এইবাৰ বাক্সা জিলাৰ মুছলপুৰত চলি থকা অসম আৰক্ষীৰ সাক্ষাৎকাৰত শিক্ষাগত অৰ্হতাৰ ভুৱা প্ৰমাণপত্ৰ প্ৰদৰ্শণ কৰি আৰক্ষীৰ জালত পৰে পৰীক্ষাৰ্থীসহ তিনি গৰাকী লোক ৷ জানিব পৰামতে কালি জিলাখনৰ মুছলপুৰ মহকুমাৰ অন্তৰ্গত বৰবৰীৰ আৰক্ষী চাউনীত চলি থকা অসম আৰক্ষীৰ সাক্ষাৎকাৰত উৎসৱ দাস নামৰ এজন যুৱকে তেওঁ প্ৰদৰ্শণ কৰা হাইস্কুল শিক্ষান্ত পৰীক্ষাৰ নথি-পত্ৰ সমুহৰ ওপৰত সন্দেহ ওপজে ৷ পৰৱৰ্তী সময়ত আৰক্ষীৰ ডকুমেন্ট চে’লৰ দায়িত্বত থকা বিষয়াই যুৱকজনৰ শিক্ষাগত অৰ্হতাৰ নথি-পত্ৰ সমুহ তন্ন তন্নকৈ পৰীক্ষা কৰাত ভুৱা বুলি প্ৰমাণ হয় আৰু জালিয়াতিৰ এই সমগ্ৰ ঘটনা পোহৰলৈ আহে ৷ যুৱকজনক এই বিষয়ে অধিক সোধ-পোচ কৰাত নথি-পত্ৰ সমুহ ভুৱা বুলি আৰক্ষীৰ আগত স্বীকাৰ কৰে আৰু পাঁচ হাজাৰ টকাৰ বিনিময়ত সংগ্ৰহ কৰা বুলি উল্লেখ কৰে ৷ পিচত উৎসৱ দাসৰ স্বীকাৰোক্তিৰ ভিত্তিত এই জালিয়াতি চক্ৰৰ লগত জড়িত থকা অনুপম দাস আৰু শৈলেন বৰ্মণ নামৰ আন দুগৰাকী লোককো আৰক্ষীয়ে গ্ৰেপ্তাৰ কৰে ৷ মুছলপুৰ সদৰ আৰক্ষী থানাৰ ভাৰপ্ৰাপ্ত আৰক্ষী বিষয়া নৰেন সোণোৱালে জানিবলৈ দিয়া মতে এই ভুৱা নথি-পত্ৰ যোগান ধৰাৰ অন্তৰালত এটা বৃহৎ চক্ৰ জড়িত হৈ আছে ৷ অৱশ্যে তদন্তৰ খাতিৰত আৰক্ষীয়ে কিছু তথ্য সদৰি কৰাৰ পৰা বিৰত থাকে । সম্প্ৰতি তিনিওগৰাকী অভিযুক্তকে আৰক্ষীয়ে মুছলপুৰ আৰক্ষী থানাত অধিক তথ্যৰ বাবে জেৰা অব্যাহত ৰাখিছে ৷ উল্লেখ্য যে উৎসৱ দাস আৰু অনুপম দাসৰ ঘৰ মুছলপুৰৰ সমীপৱৰ্তী বেলগুৰি পথাৰত আৰু শৈলেন বৰ্মণৰ ঘৰ বজালী জিলাৰ নিত্যানন্দত বুলি জানিব পৰা গৈছে ।
