দেৰগাঁৱৰ জেলেহুৱা গাঁৱৰ নিবাসী সমাজকৰ্মী, প্ৰবীন অভিনেতা ব্ৰজেন কুমাৰ দত্ত (৭৫) ৰ আজি পুৱা ৫-৩০ বজাত হৃদৰোগত আক্ৰান্ত হৈ নিজা বাসগৃহত শেষ নিশ্বাস ত্যাগ কৰে। সুদীৰ্ঘ দিন বৃহত্তৰ জেলেহুৱা গাঁও পৰিচালনা সমিতিৰ সম্পাদকৰ দায়িত্ব ভাৰ সুচাৰুৰূপে পৰিচালনা কৰি অহাৰ লগতে অঞ্চলটোৰ জোনাকী মইনা পাৰিজাত, অগ্ৰগামী যুৱ সমাজ, জেলেহুৱা গাঁও পুথিভঁৰাল আদি বিভিন্ন অনুষ্ঠান প্ৰতিষ্ঠানৰ লগত জড়িত হৈ সক্ৰিয় ভাৱে কাম কৰি ৰাইজৰ প্ৰিয়ভাজন হোৱা ব্যক্তি জনৰ অকাল মৃত্যুত ম্ৰীয়মান হৈ পৰিছে গাঁওবাসী। প্ৰাপ্ত বয়স্ক শিক্ষাৰ প্ৰকল্প বিষয়া হিচাপে অৱসৰ গ্ৰহণ কৰি সমাজৰ কাম কাজত ব্যস্ত হৈ পৰা সৰহবৰহী ব্যক্তি জনৰ নশ্বৰ দেহ পুৱা বাসগৃহৰ পৰা জেলেহুৱা নামঘৰৰ প্ৰাংগণলৈ লৈ গৈ অনেক শুভাকাংক্ষীৰ উপস্থিতিত ৰাজহুৱা ভাৱে এক শোকাকুল পৰিবেশত শেষ শ্ৰদ্ধাঞ্জলি জনোৱা হয়।এই স্থানতে অঞ্চলটোৰ বহু কেইটা অনুষ্ঠান প্ৰতিষ্ঠানৰ উপৰিও দেৰগাঁও গাঁও পঞ্চায়তৰ সভাপতি আনোৱাৰ হুছেইন, আঞ্চলিক পঞ্চায়তৰ উপ সভানেত্ৰী ৰশ্মি ৰেখা বৰা, গাঁও প্ৰধান সূৰ্যমোহন হাজৰিকা,জেলেহুৱা গাঁও পৰিচালনা সমিতিৰ সভাপতি গোপাল বৰা, আপকু দেৰগাঁও মহকুমা সমিতিৰ সম্পাদক কুমুদ বৰাই শ্ৰদ্ধাঞ্জলি জ্ঞাপন কৰে। সমাজৰ বিভিন্ন কাম কাজৰ মাজতে কবিতা, প্ৰবন্ধ আদি সাহিত্য চৰ্চা মাধ্যমেৰেও সমাজলৈ অৱদান আগবঢ়োৱা ব্যক্তি জন এজন সু-বক্তা আৰু অভিনেতা হিচাপেও ৰাইজৰ মাজত পৰিচিত।বহুমুখী প্ৰতিভাৰ গৰাকী দত্তই মৃত্যুৰ সময়ত পত্নী, পুত্ৰ আৰু এগৰাকী জীয়াৰী লগতে বহু আত্মীয়ক ইহ সংসাৰত এৰি থৈ যায়।
