পোহৰৰ উৎসৱ দীপাৱলী আৰু শ্ৰী শ্ৰী শ্যামা পূজা উদযাপনেৰে মুখৰিত হৈ পৰিছে ৰাজ্য । দেশজুৰি আনন্দ-উছাহেৰে পালন কৰা হৈছে দীপাৱলী । কাতি মাহৰ অমৱস্যা তিথিত দীপান্বিতাৰ লগতে উদযাপন কৰা হৈছে শক্তিৰূপিণী দেৱী দুৰ্গাৰ কালৰূপ মা কালীৰ পূজা । অন্ধকাৰ নাশ কৰি, অশুভ শক্তিক বিনাশ কৰাৰ সংকল্পৰে নিশা বন্তি প্ৰজ্বলন কৰি উজলাই তোলা হয় চৌদিশ ।
ৰাজ্যৰ ভিন্ন প্ৰান্তৰ লগতে পশ্চিম নলবাৰীৰ বাটসৰ গাঁও উন্নয়ন সমিতিৰ উদ্যোগত ঐতিহ্যমণ্ডিত শ্ৰী শ্ৰী কালী মন্দিৰ প্ৰাঙ্গণত বৃহস্পতি বাৰে ৰাতিপুৱাৰে পৰা বিভিন্ন কাৰ্যসূচীৰে কালী পুজাৰ আয়োজন কৰা হৈছে । কালী পুজা উপলক্ষে সন্ধিয়াৰে পৰা মনৰ কামনা পুৰণৰ অৰ্থে মন্দিৰত অগণন ভক্তৰ সমাৱেশ ঘটে । বাটসৰৰ এই বিখ্যাত কালী মন্দিৰটোত বহু দূৰ-দূৰণিৰ পৰা ভক্তৰ আগমন ঘটে । এইবেলি সম্পূৰ্ণ কোভিড প্ৰট’কল মানি বাটসৰৰ ৰাইজে পুজাভাগ আগবঢ়াইছে ।উল্লেখ্য যে এই ঐতিহ্যমণ্ডিত কালী মন্দিৰটোত কালী পুজাৰ দিনা এক বৃহৎ সংখ্যক ৰাজহুৱা বলিৰ প্ৰথা আছিল কিন্তু কোভিডসৃষ্ট পৰিৱেশৰ বাবে বিগত বৰ্ষৰ দৰে এইবেলিও ৰাইজৰ মংগলৰ অৰ্থে দুটি পঠা ছাগলী বলি দিয়াৰ ব্যৱস্থা কৰিব বুলি উদ্যোক্তা সকলে জানিবলৈ দিয়ে ।
পোহৰৰ উৎসৱ দীপাৱলী আৰু কালী পূজাক লৈ উখল-মাখল ৰাজ্য ।
