দীপাৱলীত মাটিৰ চাকিৰ আলোকসজ্জাত ব্যৱহৃত কলগছ দীপাৱলী উদযাপনৰ পাচত এলাগী হৈ পৰে। আনহাতে অৱশিষ্ট এই কলগছ সমূহ য’তে ত’তে সিচৰিত হৈ পৰি থাকি পৰিবেশ বিনষ্ট কৰি তোলে। কালি নিশা দীপাৱলী উদযাপনৰ পাচত আজি পুৱা নগাঁও সদৰ সমষ্টিৰ বিধায়ক ৰূপক শৰ্মাৰ তৎপৰতাত নগাঁও জিলা কিষাণ মৰ্চাৰ সদস্যসকলে নগাঁও চহৰৰ আৱাসিক আৰু ব্যৱসায়িক এলেকাত সিচৰিত হৈ পৰি থকা অৱশিষ্ট কলগছ সমূহ একগোট কৰি উক্ত স্হানৰ পৰা আতৰাই চহৰখন পৰিস্কাৰ পৰিছন্ন কৰি ৰখাত উদ্যোগ গ্ৰহণ কৰে। চহৰখনৰ নাগৰিকসকলে দীপাৱলীৰ সময়ত ব্যৱহাৰ কৰা কলগছ সমূহেৰে কলাখাৰ প্ৰস্ত্ততৰ ব্যৱস্হা কৰাৰ লগতে বন্যহস্তী আহযাহ কৰা নিৰ্দিষ্ট পথত ৰখাৰ ব্যৱস্হা কৰে। যাতে এই কলগছ সমূহ বন্যহস্তীয়ে খাদ্য হিচাপে গ্ৰহণ কৰিব পাৰে । জিলা কিষাণ মৰ্চাৰ এই কাৰ্যসূচীত নগাঁও সদৰ সমষ্টিৰ বিধায়ক ৰূপক শৰ্মাই সম্পূৰ্ণৰূপে সহযোগিতা আগবঢ়ায়। বিধায়ক শৰ্মাই কিষাণ মৰ্চাৰ সদস্যসকলৰ হাতে হাত ধৰি চহৰখনত সিচৰিত হৈ থকা কলগছ সমূহ আতৰাই নিয়াৰ লগতে নিজে টেক্টৰ চলাই কলগছ সমূহ নিৰ্দিষ্ট স্থানলৈ স্হানান্তৰিত কৰাত সহযোগ কৰে। নগাঁৱৰ সচেতন মহলে বিধায়ক ৰূপক শৰ্মাৰ লগতে জিলা কিষাণ মৰ্চাৰ সদস্যসকলৰ এনে পদক্ষেপৰ শলাগ লয় ।
