নেপালৰ সেনা প্ৰমুখ জেনেৰেল প্ৰভু ৰাম শৰ্মাক সন্মান সুচক ভাৰতীয় সেনাৰ জেনেৰেল উপাধি প্ৰদান কৰা হব । ভাৰতৰ ৰাষ্ট্ৰপতি ৰামনাথ কোবিন্দে ১০ নবেম্বৰত অনুষ্ঠিত হব লগা এক বিশেষ অনুষ্ঠানত জেনেৰেল প্ৰভু ৰাম শৰ্মাক এই উপাধি প্ৰদান কৰিব ।ভাৰতীয় সেনাৰ সেনা প্ৰমুখ মনোজ মুকুন্দ নৰৱানেৰ আমন্ত্ৰণ ক্ৰমে নেপালৰ সেনা প্ৰমুখ প্ৰভু ৰাম শৰ্মাই চাৰিদিনীয়া ভ্ৰমণ সুচীলৈ ভাৰতত উপস্থিত হব । ইতিমধ্যে দিল্লীলৈ ৰাওনা হৈছে জেনেৰেল প্ৰভু ৰাম শৰ্মা । ভাৰত ভ্ৰমণ কালত নেপালৰ সেনা প্ৰমুখ গৰাকীয়ে ভাৰতীয় সেনা প্ৰধান এম এম নৰৱানেক সাক্ষাৎ কৰাৰ উপৰিও সাক্ষাৎ কৰিব ভাৰতীয় সেনাৰ বহুকেইগৰাকী উচ্চ পদস্থ বিযয়াক ।উল্লেখ্য যে , বিগত বৰ্ষৰ নবেম্বৰত নেপাল ভ্ৰমণ কৰা ভাৰতীয় সেনা প্ৰদান এম এম নৰৱানেক নেপালী সেনাই বিশেষ সন্মান যাচিছিল । নেপালৰ ৰাষ্ট্ৰপতি বিদ্যা দেৱী ভাণ্ডাৰীয়ে বিশেষ অনুষ্ঠানত এই সন্মান প্ৰদান কৰিছিল জেনেৰেল এম এম নৰৱানেক । নেপাল আৰু ভাৰতে পৰস্পৰে পৰস্পৰৰ সেনা প্ৰধানক এই বিশেষ সন্মান জনোৱা পৰম্পৰা বহু দশক পুৰণি । এই পৰম্পৰাৰ আৰম্ভণি হৈছিল ১৯৫০ চনত ।
