অসম ৰাজ্যিক গ্ৰামীন জীৱিকা অভিযান, বৰপেটাৰ সৌজন্যত জিলাখনত থকা বিভিন্ন বেংকৰ সহযোগত আজি একেদিনাই ২৯২ টা মহিলা আত্মসহায়ক গোটৰ মাজত মুঠ ১১.৩২ কোটি টকাৰ ঋণ প্ৰদান কৰা হয়। আজি বৰপেটাত অনুষ্ঠিত এটি বিশাল ঋন মেলাত এই ঋণত মঞ্জুৰী প্ৰদান কৰাৰ লগতে ইয়াৰে সিংহভাগ বিতৰণো কৰা হয়। জিলা পৰিষদৰ সভাগৃহত অনুষ্ঠিত এটি অনুষ্ঠানত উপায়ুক্ত তেজ প্ৰসাদ ভূচালে আনুষ্ঠানিকভাৱে ঋণ মঞ্জুৰী-পত্ৰ বিতৰণ কৰি ঋণমেলাৰ আনুষ্ঠানিকভাৱে শুভাৰম্ভ কৰে। এই উপলক্ষে দিয়া ভাষণত তেওঁ কয় যে, গ্ৰামীণ জীৱিকা অভিযানৰ দ্বাৰা ৰূপায়িত এই কাৰ্যসূচীৰ দ্বাৰা এফালে গ্ৰাম্য অৰ্থনীতি সুদৃঢ় হোৱাৰ লগতে আনফালে মহিলা সবলীকৰণৰ দিশতো ব্যাপক ইতিবাচক প্ৰভাৱ পৰিলক্ষিত হৈছে। তেওঁ মহিলা সকলক নিজৰ উৎপাদিত সামগ্ৰীৰ গুণমান বিশিষ্টা আৰু আকৰ্ষণীতয়তা বৃদ্ধিৰ প্ৰচেষ্টা নিৰন্তৰ চলাই যাবলৈ পৰামৰ্শ আগবঢ়ায়। তেওঁ কয় যে বজাৰ দখল কৰিবলৈ হলে উৎপাদিত সামগ্ৰীৰ মান উন্নত হোৱাৰ লগতে কিছু নতুনত্ব থকাৰ প্ৰয়োজন। লগতে উপযুক্ত প্ৰচাৰৰো আৱশ্যকতাৰ বিষয়ে তেওঁ দোহাৰে। বৰপেটা জিলা গ্ৰামীণ জীৱিকা অভিযানৰ প্ৰকল্প প্ৰৱন্ধক সুমিত দাসে আতঁধৰা সভাখনত দিয়া ভাষণত জিলা তথ্য আৰু জনসংযোগ বিষয়া বিকাশ শৰ্মাই চৰকাৰে আগবঢ়োৱা এই আঁচনিৰ দ্বাৰা প্ৰতিগৰাকী মহিলাকে আত্মপ্ৰতিষ্ঠাৰ সুযোগ গ্ৰহণ কৰিবলৈ আহ্বান জনায়। ইয়ে মহিলাসকলৰ আৰ্থিক নিৰাপত্তা আৰু সামাজিক প্ৰতিষ্ঠাৰ ক্ষেত্ৰতো সহায়ক হ’ব বুলি তেওঁ মত প্ৰকাশ কৰে। সভাত জিলা পৰিষদৰ উপ মুখ্য কাৰ্যবাহী বিষয়া চিত্তৰঞ্জন ডেকা, গ্ৰামীণ জীৱিকা অভিযানৰ ৰাজ্যিক প্ৰকল্প বিষয়া দীপাংকৰ বৰুৱা, অসম গ্ৰামীণ বিকাশ বেংকৰ আঞ্চলিক প্ৰৱন্ধক ৰামকৃষ্ণ শৰ্মা, নাবাৰ্ডৰ সহকাৰী মহাপ্ৰৱন্ধক শ্যামল কুমাৰ দে আৰু ইউকো বেঙ্কৰ লীড প্ৰৱন্ধক প্ৰমোদ কুমাৰ, বৰপেটা জিলা গ্ৰামীণ স্বনিয়োজন প্ৰতিষ্ঠানৰ প্ৰৱন্ধক ৰঞ্জিত কুমাৰ তালুকদাৰ আদিয়েও চমু ভাষণ প্ৰদান কৰি আত্মসহায়ক গোট সমূহক উৎসাহিত কৰে। উল্লেখযোগ্য যে আজি প্ৰদান কৰা ঋণৰ সিংহভাগেই দিয়া হৈছে অসম গ্ৰামীণ বিকাশ বেংকৰ তৰফৰ পৰা। ইয়াৰ উপৰিও এপেক্স বেঙ্ক, চেন্ট্ৰেল বেংক, এইছ ডি এফ চি বেঙ্ক, কাণাৰা বেঙ্ক, ষ্টেট বেংক আদিৰ তৰফৰ পৰাও গোট সমূহলৈ ঋণ আগবঢ়োৱা হৈছে। জিলা জনসংযোগ বিষয়াই এই কথা প্ৰকাশ কৰি জনাইছে যে, ইয়াকে লৈ চলিত বিত্তীয় বৰ্ষত অবিভক্ত বৰপেটা জিলাৰ ১১১৪ টা আত্মসহায়ক গোটৰ মাজত ২০ কোটি ২৮ লাখ টকাৰ ঋণ প্ৰদান কৰা হৈছে।
