ডুবিয়া
গহপুৰ মহকুমাৰ শঙ্কৰী কলা কৃষ্টি বিকাশ কেন্দ্ৰ, পূৱ বৰঙাবাৰী প্ৰাথমিকৰ বৰ নামঘৰত যোৱা নিশা চুৰি কাৰ্য সংঘটিত হয় ৷ মহকুমাটোৰ খাটৰবাৰীৰ ১৫ নং ৰাষ্ট্ৰীয় ঘাইপথৰ দাঁতিতে অৱস্থিত নামঘৰ ভাগত চোৰে নিশা তলা ভাঙি মণিকূটৰ পৰা ৰূপৰ ফুলি, পিতলৰ চাকি, কাঁহৰ ঘটি – বাতি, ষ্টীলৰ গিলাচ আদি সামগ্ৰীৰ লগতে মণিকূটত জমা থকা পাঁচহেজাৰ টকা চোৰ চুৰ কৰি নিয়ে ৷ উল্লেখ্য যে, চোৰে নামঘৰভাগত মলত্যাগ কৰি থৈও যায় ৷ ইপিনে, আজি পুৱা নামঘৰীয়া নামঘৰলৈ অহাৰ পিছতে চুৰিকাণ্ডৰ কথা পোহৰলৈ অহাত তীব্ৰ প্ৰতিক্ৰিয়াৰ সৃষ্টি হয় ৷ নামঘৰ পৰিচালনা সমিতিয়ে ঘাঁহিগাঁও আৰক্ষীক বিষয়টো অৱগত কৰাত আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে ৷ সঠিক তদন্তৰে চোৰৰ দলটোক কৰায়ত্ব কৰিবলৈ ৰাইজে আৰক্ষী প্ৰশাসনক দাবী জনাইছে ৷ ইপিনে, গাঁৱৰ যুৱক বৃন্দই আজি দিনত নামঘৰ ভাগ পৰিস্কাৰ কৰাৰ লগতে চেনিটাইজ কৰি পৰিবেশ বিশুদ্ধ কৰি তোলে।