নাজিৰা :
সীমান্তবৰ্তী গেলেকী শিঙিবিল অঞ্চল আজি পৰিদৰ্শন কৰে ৰাজ্যিক বিধান সভাৰ বিৰোধী দলপতি তথা নাজিৰা বিধান সভা সমষ্টিৰ বিধায়ক দেৱব্ৰত শইকীয়াই।বিৰোধী দলপতিগৰাকীয়ে সীমান্ত অঞ্চলটোৰ যি স্হানত অসমৰ ভূমিত নগাই গূহ নিৰ্মাণ কৰিছিল তাত উপস্হিত হৈ পৰিস্হিতিৰ বুজ লয় আৰু অসমৰ ৰাজহ ভূমিত বিগত সপ্তাহত চলোৱা আগ্ৰাসন আৰু তাণ্ডৱ দেখি হতবাক হৈ পৰে।উল্লেখ্য যে যোৱা ৯জুনত নগালেণ্ডৰ ইয়ংলক বস্তিৰ একাংশ নগা দূৰ্বত্তই সীমান্ত অঞ্চলটোৰ অসমৰ ৰাজহ ভূমি বেদখল কৰি বাঁহৰ গেট দি অসমীয়াৰ প্ৰৱেশ নিষিদ্ধ কৰাৰ পাছত শিৱসাগৰ জিলা আৰক্ষী প্ৰশাসনে নগাৰ গেট ভাঙি দিয়াৰ পাছত নাগালেণ্ড প্ৰশাসনৰসহযোগত নগা বাহিনীয়ে সীমান্ত অঞ্চলটোৰ বূহৎ ভূমি বেদখল কৰি চাৰিটাকৈ গূহ আৰু এটা নগা আৰক্ষীৰ বাংকাৰ নিৰ্মাণ কৰে।১০জুনত শিৱসাগৰ জিলা প্ৰশাসন আৰু নিৰপেক্ষ বাহিনীয়ে অসমৰ ভূমিত নগাই নিৰ্মাণ কৰা গৃহ ভাঙি উচ্ছেদ কৰাৰ লগতে নগাবাহিনীক খেদি পঠাইছিল।বিৰোধী দলপতি তথা স্হানীয় বিধায়ক দেৱব্ৰত শইকীয়াই ঘটনা স্হলীত উপস্হিত হৈ নগাৰ অসমৰ ভূমিত আগ্ৰাসনৰ বুজ লোৱাৰ লগতে নগাৰ অসমৰ ভূমি দখল কাৰ্যক তীব্ৰ ভাষাৰে গৰিহনা দিয়াৰ লগতে ভবিষ্যতে এনে কাৰ্য সংঘটিত নহয় তাৰবাবে অসম চৰকাৰক অনুৰোধ জনাই।আনহাতে বিধায়কজনে নগাৰ বিৰুদ্ধে সফল অভিযান চলোৱা শিৱসাগৰ জিলা আৰু নাজিৰা মহকুমা প্ৰশাসনক আদৰণি জনাইছে।সীমান্ত অঞ্চলটো পৰিদৰ্শনকালত বিৰোধী দলপতি গৰাকীয়ে কয় যে চলিত জুন মাহৰ আৰম্ভণি ৰ পৰাই অসমৰ এই ৰাজহ ভূমিত নগালেণ্ড আৰক্ষীয়ে নিৰাপত্তা দিয়াটো বা তহল দিয়াটো অতি দূৰ্ভাগ্যজনক আৰু অশোভনীয়।যিহেতু সীমান্তৰ এই অঞ্চলটো নিৰাপত্তা বা তহল বাবে শিঙিবিল, মুগাপাৰা, বৰহোলা, সোণাপুৰ আৰু চৰাইসজীয়াত পাঁচ টাকৈ অসম আৰক্ষী বেটেলিয়েনৰ চাউনি আছে।এইক্ষেত্ৰ তেখেতে অসম চৰকাৰক নাগালেণ্ড চৰকাৰক নাগালেণ্ড আৰক্ষীক নিজৰ ৰাজ্যৰ ভূমিত নিৰাপত্তা বা তহল দিয়াত বাধা দিবৰ বাবে বাধ্য কৰাবলৈ আহ্বান জনায়।বিধায়ক গৰাকীয়ে আৰু কয় যে কেন্দ্ৰ আৰু ৰাজ্যৰ দুয়োখন বি জে পি চৰকাৰ, সেয়েহে ৰাজ্য শাসনাধিষ্ঠিত মূখ্য মন্ত্ৰী সৰ্বানন্দ সোণোৱালে নাগালেণ্ড চৰকাৰৰ সৈতে এক বৈঠক অনুষ্ঠিত কৰি সীমান্তত চলি থকা ক্ষুদ্ৰ চাহ খেতিয়কৰ ওপৰত তাণ্ডৱকে আদি কৰি নাগালেণ্ড ৰ দিশৰ পৰা দেখা দিয়া সমস্যা সমূহ সমাধান কৰি সীমান্তবাসীৰ নিৰাপত্তা সুনিশ্চিত কৰিবলৈ আহ্বান জনাইছে ।