নগাঁও :
সমগ্ৰ দেশ কঁপোৱা অভি-নীল হত্যাকাণ্ডৰ গোচৰত অভিযুক্ত হৈ সম্প্ৰতি নগাঁও কেন্দ্ৰীয় কাৰাগাৰত ন্যায়িক জিম্মাত থকা ৪৭জন অভিযুক্তৰ জামিন আবেদন পুনৰ নাকচ কৰিলে নগাঁও আদালতে। গোচৰটোৰ সাক্ষীৰ শুনানী প্ৰক্ৰিয়া চলি থকাৰ মাজতে কালি অভি-নীল হত্যাকাণ্ডৰ ৪৭ গৰাকী অভিযুক্তৰ জামিন বিচাৰি নগাঁও জিলা ও সত্ৰ ন্যায়াধীশৰ আদালতত আবেদন কৰাৰ পিছত এক শুনানী গ্ৰহণ কৰা হয়। আদালতে দুয়ো পক্ষৰ অধিবক্তাৰ বক্তব্য শুনে যদিও জামিন আবেদন ৰায়টো আজিলৈ স্থগিত ৰাখিছিল। আজি নগাঁও জিলা ও সত্ৰ ন্যায়াধীশৰ আদালতে অভিযুক্ত কেইজনৰ জামিন আবেদন নাকচ কৰে। ইপিনে, আদালতে এই গোচৰটোৰ বিচাৰ প্ৰক্ৰিয়া অহা ডিচেম্বৰ মাহৰ ভিতৰত সম্পূৰ্ণ কৰাৰো আশ্বাস দিয়ে বুলি অভিজিৎ নাথৰ পিতৃ অজিত নাথে সংবাদ মাধ্যমৰ আগত সদৰী কৰে। আদালতৰ এনে স্থিতিত সন্টুষ্টি প্ৰকাশ কৰে নাথে। আদালতৰ এই ৰায়দানক আদৰণি জনাইছে নিলোৎপল দাসৰ পিতৃ গোপাল চন্দ্ৰ দাসেও। স্মৰ্তব্য যে, মহামাৰী কৰ’ণা ভাইৰাছৰ আতংকৰ পৰিপ্ৰেক্ষিতত ভাৰচোৱেল ক’ৰ্ট চলি থকাৰ বাবে কালি অভিযুক্ত পক্ষৰ অধিবক্তা মানস শৰনীয়াই ভি ডি অ’ কনফাৰেন্স যোগে তেওঁ আদালতত যুক্তি প্ৰদৰ্শন কৰাৰ বিপৰীতে গোচৰীয়া পক্ষৰ হৈ অধিবক্তা জে কামাৰ তেওঁৰ দুজন সহযোগীৰ সৈতে নগাঁৱৰ চৰকাৰী অধিবক্তা বিভা ফুকনৰ নেতৃত্বৰ অধিবক্তা এটা দলে আদালতত যুক্তি প্ৰদৰ্শন কৰিছিল। দুয়ো পক্ষৰ যুক্তি শুনাৰ পিছত আজি জিলা আৰু সত্ৰ ন্যায়াধীশে জামিন আবেদনৰ ৰায়দানৰ সিদ্ধান্ত লয়।