অপৰাধ নগৰী হিচাপে পৰিগণিত হৈ পৰা গুৱাহাটীত নিতৌ সংঘটিত হৈ আহিছে এটাৰ পিছত আন এটা অপৰাধ। হত্যা, হিংসা, চোৰ, ডকাইতৰ উপৰিও অনেক অপৰাধ সংঘটিত হৈ আছে এইখন মহানগৰত। শেহতীয়াকৈ মহানগৰীত সংঘটিত হোৱা এক দলবদ্ধ ধৰ্ষণৰ ঘটনাই ৰাজ্যত চাঞ্চল্য সৃষ্টি কৰিছে। এগৰাকী দশম শ্ৰেণীৰ কিশোৰীক ৫ জনীয়া যুৱকৰ দলে দলবদ্ধ ধৰ্ষণ কৰাৰ লগতে সমগ্ৰ ঘটনাক ভিডিঅ’ আকাৰে ৰাখি ভাইৰেল কৰাৰ ভাবুকি প্ৰদান কৰিছিল। এই ঘটনাৰ প্ৰথমে পোহৰলৈ অহা নাছিল যদিও ৮ মাৰ্চৰ আন্তঃৰাষ্ট্ৰীয় নাৰী দিৱসৰ দিনটোতেই পানবজাৰ মহিলা আৰক্ষী থানাত এই ঘটনা সন্দৰ্ভত এক গোচৰ ৰুজু কৰা হৈছে।
ইয়াৰ পিছতে সমগ্ৰ ঘটনা পোহৰলৈ আহে। ঘটনা সংঘটিত কৰা ৫ পাষণ্ডই ইতিমধ্যে আত্মগোপন কৰিছে। আটাইকেইটাৰে অনুসন্ধান অব্য়াহত ৰাখিছে আৰক্ষীয়ে। সমগ্ৰ ঘটনাৰ তথ্য আৰক্ষীয়ে ৰাজহুৱা কৰা নাই যদিও ৫ পাষণ্ডৰ ফটো পোহৰলৈ আহিছে। আৰক্ষীয়ে ভুক্তভোগী কিশোৰী গৰাকীৰ স্বাস্থ্য পৰীক্ষা কৰিছে আৰু ধৰ্ষণকাণ্ড সংঘটিত কৰা আটাইকেইটা প্ৰাপ্তবয়স্ক বুলি প্ৰকাশ পাইছে। পৰিয়ালৰ লোকে ৰুজু কৰা গোচৰত উল্লেখ থকা অনুসৰি ৫ পাষণ্ড হৈছে ক্ৰমে, মহম্মদ বিকি আলী (২২), মহম্মদ ফজুল আলী, পুনা আলী, পিংকু আলী আৰু মহম্মদ ৰাজা আলী। এই আটাইকেইটা পাষণ্ড জালুকবাৰী থানাৰ অন্তৰ্গত গাড়ীগাঁৱৰ।